بلوچی دوچ۔۔۔عبداللہ جان جمالدینی

چُکی ئے حبَر چوں مردم ئے دِلا نشک ماننت۔۔ منا ہما بانگو اا نگتان جوانی آ گیر انت۔ آروچ بشام ئے پُر سیل و سواتیں روچ اتنت۔ نوداں کہ ہر بیگہ دیما گواریتنت وتی وہداش بدل کرتت۔ اونوں صحبہ مہالہ یک شلیکے داتنت و شُتنت۔ یک صُحبے آ ہیلاکیں ہَور ا گوارت و صحب ئے زیبائیں سمیناں پُشت کُرت۔ نیلگیں آزمان ئے دیم درا بُوت۔ گس ئے دیما چہ ہمروچی ئے ہورانی گوارگا مزنیں تالا پے جوڑ بوتگت۔ بان ئے دیما ساہگا پَرچ ئے چرّے ئے سر ا ماہ گل نشتتگ و سوچن ئے کار کرت۔ بُرزو دورین چونیلا سوزیں آزمان ئے دیما کلاگے آ کار تِت۔ ماہ جان سوچن بہ کار ا شولت و اِشت۔ وتی ہر دو دستان بست۔دراجیں شیپگ وکوشیں موردانگان کُرت ودستانی پُشت  بہ وتی دوئیں یکجا او ہوریں زانانی  سر ا دات و چکت۔موردانگانی یک براں کتر کار مگ بوت۔ ماہ گل ئے زنڈیں چم چست بوتنت و آئی بُرز بہ گلاگ ئے نیمگا چارت۔ کلاگ دور بہ آزمان ئے دیما چُومرگ ئے پُٹ ئے اِلاجے آ ودی ئت۔ کلاگا دومی گشتاں کار تِت و چہ ماہ جان ئے دپا درشت۔

”جی جی کلاگ جان۔ وشیں حوالے بیارئے“۔ماہ جان ئے زنڈ و سُہریں چم نزائیں پرچے پُربوتنت۔آئی وتی سرجہل کُرت و سوچن چہ کار ا چکت وپدی کار ئے شروع کُرت۔ چہ ماہ جان ئے چماں ارسانی زنڈیں ترمپ ٹپ ٹپ کپتنت و آئی زان سر اِش ترکرت و کارش مینیت۔ رند ا آئی چڑ ینگیں گُٹ ءَ چہ یک ہنچشیں بارگیں و دراجیں لیکو وزھیریکے بنا کُرت کہ من ہُشک و حیرانا منتوں کہ اے چونیں ماجرا ہے۔

تاں روچِ مروچی منی سراے راز ا نہ کپت و نہ سر پد بوتون کہ ماہ گل ئے چم پر چے چوبشامی سیاھیں کوکراں شلینتنت۔ آئی نازُرک و اسپیتیں دست آئی زان سر ئے کار ا ترکے جتنت و دُور بوتنت۔ ہرچی کہ آئی توار زھیر زھیر بوت ہمنکہ آئی دست تیز شُت وکات۔ آئی وتی سری گُد ئے بوک دیمی چکت ماہیں اور گردیں دیم ئے گپا چہ گیشتر چیر بوت بلے منی چم دور ا چہ ماہ جان ئے پُرکمالیں لنککان و آئی زیبا، نازُرک و ہورتیں چگیناں (چکن)سک متنت۔

ماہ گل مازہگانا بازدو ست ئت پر چیکہ آپہ زہگان چے بلکین پہ میتگ وہلک ئے درستیں مردمان مہر کرت۔ ہر حبر ئے جواب آئی پہ کندئگ و دیم روژنی دات بلے آئی کندئگ ئے تہا در دو دور ہورئت۔ماہ جان ہر کسا زیات کار کرت وبے تک و توارات بلے گس ئے مزنیں دُرست گوں آئی ریٹتنت او کس آ را آئی چیہے نہ گوشت۔ اے گراں سَنگ و زیبائیں گودی ئے سِتا باز ئتنت۔ بلے آئی مزنیں گناہ ہمیشنت کہ بزگ و نادارئت او بے وس و بے کس ئت۔

منا شری آ یات ئنت کہ ماہ گلا نہ ماس ئت و نہ پس۔ آچوری ئت۔آئی مستریں گہار شاہ گلا بہ سندھ آئی سیال و وارثاں بہا کُرتئگت او یکیں براسے داشت کہ شالکوٹ ئے زمین جمب ئے بہر بوتت۔ ماہ جان خدائی اے پرا ہیں دُنیا ئے تہایک وایوک ات۔

ماہ گل بہ سوچن ئے کار ا میتگ ئے جنینانی  تہا نام ئت۔ آئی پکئگیں دوچ وہورتیں کار ئے ستاتاں در شُتت۔  چہ دگہ ہلک و شہران پہ آئی کار کات۔آئی وتی دوچ ئے مُزّ و پوریا گپت۔ آئی چہ وتی اے کمال ئے پد ا پہ دستا گراں سُہر و جرمن گواپیں پشکے گپتت و جواں پہ دل ئے حُب دُتکت۔آئی شلوار گراں سوزئت و سری سوزو دوپٹیں ویلے ئت۔ دست چہ سنگو، گب ودستو نکان پُر تنت۔ بندوک ئے گوگ۔ زباد دان گوش کونڈو نتاں پاچ آبریشم ئے پُلاں گون لونجان ئت۔ گوش چہ زر ئے دُرو کڑیہاں لڑئتنت۔ اے دُرست چہ سوچن ئے کار ئے پد ا۔ ہلک ئے ماسی وتی جنئک و دتگانا بہ ماہ جان ئے کرا دیم د اتنت۔ تانکہ چہ آئی سوچن ئے کار ا ہیل بکننت۔

لہتیں سالان پد ماہ جانا گون یک جنوزانیں مرد کے آ آروس داتنت۔ آں سئے وچہار سال زندگ بوت۔ ماہ جان سے و چار زہگ ئے ماس بوت آں مرد زوت مُرت۔ انوں نہ چہ ماہ جان ئے زہگان کسے پشت کپت اور نہ مردئے زندگ انت۔ ماہ جان چو آپا دنیا آ ودی بوت، کترکے گشت و پد ا گمنامی ئے زرِ ا ہک اے وارت وایرشت او بُنی گاربوت!۔

بلوچی دوچ وچگین ئے گودی ماہ جانا منا بلوچی ئے اے فن و کمال ئے قدر و قیمتا نشان دات۔ یک مزنیں بے انصا فی اے بیت اگہ من بلوچی دوچ ئے سر ا نوشتگ پکنیں او ماہ جانا یات مہ کنیں۔

بلوچی دوچ ئے ہند باز بُرزانت۔ وبلوچانا اے حبر ئے سما نہ انت۔ ماہنچو اُشکتہ کہ امریکہ (زاناں نیویارک) ئے بین الاقوامی دوچ ئے نمائشا بلوچی دوچ اول در آتکہ۔ چونا چماں گیشتر د یستنگنت کہ مروچاں پاکستان ئے تہادگہ فیشنی جنیناں بلوچی دوچ ئے پوشئگ و رواج بہ دستا گپتہ۔ پاکستان ئے مزنیں شہراں جاگہ جاگہا دکانانی تہا بلوچی دوچ ئے پشک سدری پیلک (Purse) گندئگ بنت۔

بلوچی دوچ ئے سدری و جنینانی پیلک پاکستان ئے فیشنی ئین بانُکانی تہا باز سک رواج گپتہ۔ بلکیں انوں پہ درزیاں ہم اے ضرورع انت کہ آگوں دگہ کمالا بلوچی دوچ ئے آدینک ایر کنگ ئے کار ا ہم ھیل بکننت دانکہ جنینانی پشک آستونک، دامن ئے کِرّ، جیگ وشلوارانی دپانا پہ بلوچی دوچ ئے آدینک ایر بکننت۔ اے آدینک ئے ایر کننگ بکیں بلوچی دوچ ئے کارے کہ دگہ قومانی دوچا اے کار برنہ انت۔

مئے بلوچی وانندگیں براس و گہارانا تاں مزنیں وہدے آ چہ و تی بلوچی لبیس،دوچ، چگین و دود و ربیدگ ئے چیہان سک بدکات ووتی اے چیہانا پشت کپئگی ئے نشان زانتنت۔ انوں کہ دگہ قومان مئے فن و کمال ئے اے بے مٹیں چیانا وش کرتہ و ایشانی ستاآ کتگ۔ تہ مارا ہم ایشانی قدر معلوم بوآن انت۔ چہ گہاراں رندانوں مئے کالج و سکول ئے ورنایان بلوچی دوچ ئے پشک ئے گور ا کنگ شروع کرتہ وھدیکہ شہر ئے تہابہ بازار ا دگہ مردم مئے ورنایانی اے پشکانا بہ آہانی گور ا گندنت چو مورو مدگا آہانی سر ا رِچنت، دانکہ بلوچی آرٹ ئے اے کمال ئے ندارگا بکننت۔

بلوچ چونا پہ دود ربیدگا ایرانیانی براس ئنت۔ اودنیا مجی ایشیائے قومان چہ باز نزیک انت۔ چُنتے سال پیش لندن ئے بر لنگئن ھاؤس آ دو چ ئے نمائش بوت۔ اے نمائشا اصفہان ئے شاہ عباسی دور ئے ہفدہ صدی ئے ایرانی جنینانی پشکے نشان دیئگ بوت۔اے پشک ئے ڈیل وڈول برگرئگ (Cut) چست بلوچی ئت۔ پشک دراج و دشاہیبت گوں چین و گپتانا ئت۔ اے پشک ئے جیگ ہم بلوچی ئت۔ چے بگوشیں کہ اے پشک پہک بلوچی پشکے ئت۔ بس بلوچی پشک ئے و ایرانی پشک ئے تہاہمے پرک ئت کہ آئی چگیں (چکن) بلوچی نہ ئت۔ بلکیں ایرانی ئت ہنچیں نشک کہ ما ایرانی غالیانی سر ا گنداں۔ تاجک و اُزبک جنینانی دوچ ہم ہمے بلوچی دوچ ئے ڈولا ئنت۔ آھانی جیگ ہمے رنگ ئے انت ہر کسا کہ بہ لاہور و کراچی آ روسی دودئے ڈل (وفد) ئے نامداریں روسی رقاصہ تمارا خانم آ دیستگ۔ آنہیا معلوم ئنت  کہ تاجک وازبک جنینانی پشک ودوچ چنکس چہ بلوچی آ نزیگ ئنت۔ پرچیکہ رقص و چاپ ئے وہد ا بانک تمارا ئے گور ئے ہمرنگیں پشکے ئت۔ نیا مجی یورپ ئے چیک  سلواک ئے دوچ ئے بازنشک و چگین گوں بلوچی دوچا ہوار کپنت۔

ہنچو کہ مکران بلوچانی دودر بیدگ ئے دگہ چتیانی بُندر بوتہ۔ ہمے رنگا بلوچی دوچ ئے کار چہ مکران ئے دوچ باز مہیم ہورت، زیبا و پائیدار و سک پکئگیں گارے کیچ ئے پاز گزارانی (چبو وگوش) سر تلانی چگیں ونشک ئے صفت او مہاری و اُشترانی پاکوڑہ، جُل و مہارانی پُل و لاڈو ئے ستا مدام بہ بلوچی شیئرانی تہا بُوتہ۔ بلوچی کلاسیکل (کوہنیں) شاعری اے حبر ئے شاہدانت کہ مکران ئے اے کمالانا چہ قدیما بلوچ منانا کاینت۔

چہ مکرانا رند کراچی ئے بلوچانی دوچ کہ مکران ئے دوچ ئے یک وڑے چہ دگہ بلوچی دوچان گہترو باج بُرتہ۔ پَد ا حاران چاگئے و سراوان ئے وارکیت۔ پہ رنگ ئے دور دئیگا (رنگانی گچین و ہوار گیجگا) چہ درستان دیما ئنت۔ مکران ئے کار گیشتر بہ نرم نازرگیں گُد ا بینت، پشک باز شاہبیت و پراہ نہ کننت۔ بلے حاران و چاگئے او  سراوانا بہ بزیں  گُد ئے سر ا کار کننت و پشکا پراہ و شاہ بیت کننت۔ جھالاوانئے دوچ و چگینا من نہ دیستہ۔ چہ پشک ئے ابید  استرہ جل،کیسگ، ٹوپی،سر مہ دانی و دگہ با ززیبا ئیں چی جوڑ کننگ بنت۔

مری بگٹی، لغاری، مزاری، ودگہ رو در آتکی  بلوچانی دوچ شرانت بلے انکس دیما نہ  شُتہ۔ جنینانی جیگ باز زیبا جوڑ کنئگ بنت بلے اے ڈولا پر برگرئگ  (CUT) و گپتان ئے رواج نہ انت۔ رنگداریں پُچ کم پوشنت۔ وا سپیتیں جرّ زیات۔۔۔۔ واہم ایشانی دوچ چو ہورت نہ انت۔

ایرانی بلوچستان ئے جنینانی پوشاک سیاہ انت و دوچ اش گوں سُہرے بند یکا باز سادگ انت۔ پشکا باز دراج کننت۔ ہنچش کہ تاں ڈگار ا گِر بیت۔ بلے ٹوپی آ گرد کننت و دیم نہ بُرنت۔

گرم سیل او گانی بلوچستان ئے بلوچانی لبیس گیشتر حاران و چاگئے لبیس و دوچ ئے پیما انت۔ استرہ جل، زردّ  تمباک ئے کیسگ، سرمہ دان او بلوچی کُلاہ ئے رواج ہر جہ است۔ حاران و چاگئے ئے چکین ئے کارہم باز دیما نہ شُتہ۔ ہنچو کہ منی زند ئے روچ ہمے نیمگ گوستہ۔ من گیشتراے نیمگ ئے دوچ ئے سر ا لوٹیں کہ پہ سر جمی آ نبشتگ بکنیں۔ منا او میت انت کہ دگہ وانندگیں براس و گہار وتی نیمگ ئے دوچہ سر ا ہنچو پہ سر جمی آ نبشتگ کننت۔ دانکہ اے کار پیلو بیئت و ماروتی مراد برساں۔

چاگئے و حارانا گیشتر تڑو (جیگ آستونک و گُپتان) جتا ہنچائیں گُدے ئے سر ا پہ جوانیں ابریشما دو چنگ و چگین کننت رند ا ہمے تڑو آ جوانیں گُدانی سر ا دو چنت و ہوار گیجنت او پشکا ٹاہیننت۔ چہ آرو چان کہ جاپانا ورند ہندوستان و پاکستان ئے بازیں پامکان رواج کپت دوچ ئے کار باز پشت کپتہ۔ ہر کس پہ وتی آسانی ئے چگین ئے جاگہ آ پامکاناجنت و دو چیت۔ انوں دگہ کارے آ سر زُرتہ کہ آنہ تیوگا چگین انت او نہ پامک انت۔ بلکیں ہر دو کیں ہوروہوارئنت۔پشک ئے کارا پامُک کننت۔ ونیامئے ہورکا کلنت رندا ہمے پشت کپتگ وہور گیں جاگہاں پہ چگینا پُر کننت۔

بلوچی دوچ ئے کریک تیوگیں آرٹے کہ چہ دگہ آرٹاں کم نہ انت۔مئے گُہار سوچنا گون ہما کارانا کننت کہ آڈولیں نشک مصور گوں بُرش و پنسلا جوڑ کننت۔ اگہ اے کمال (آرٹ) ئے دیم برئگ ئے جہد ہیبت تہ ہنچیں روچے کیئت کہ اے کمال بہ مصوری ئے درجہ آ رسیت کہ پہ سوچنامئے گہارو جنک تصویر و عکس جوڑ کننت۔

اے نیمگ ئے د وڈول ئے دوچ اِنت۔ یکے پکگیں کارانت اودومی ھامگیں کارانت۔ پکگیں کارباز  مُہیم و نازُرک انت او کمال ئے گودی لوٹنت جاگودی کہ آھانی لنکک چو مصور و ساز جنوک ئے  لنکُکان روان ببنت زانوکیں سر اے ترکانا ہنچو پج کارنت چو کہ باکمالیں مصور تصویر ئے کشکانا زاننت۔ اگہ مصور کمالا نہ رستہ تہ آئی کشک مُداما وچوٹ بنت ہمے ڈولا اگہ گودی باکمال مہ بیت تہ آئی سوچن سر پہ وَت روت۔

پکگیں کار ئے تہا چہ دُرستان زیات رُدتّو ئے ترک جنئگ بنت پرچیکہ زُرتو ئے کار باز ہورت انت۔چہ زُرتو آ ابید پڑیوال موسم، بگدا دی، خام چکن ؔ او چابکو کار بنت۔

ہامگیں کار ئے مزنیں دوچ بُست لوپو، چوٹل، گل ونجک، پولوٹک کپ وکنڈ، بند رومی وٹ انت۔ وٹ ہامگیں کار ئے تہا باز کار بیت۔ وٹ ئے وڑہم باز ئنت۔ بندی، یک وکپ، سُندو کی، سندوکی ئے  ہم دو وڑ ئے انت۔ پنچ ترکی وسئے ترکی توئی سرئے جہلا دِل ئے سر ا گردیں ٹکے بیت کہ آئی ئے گردو گوشنت دو نشکانی نیاما کشکے بُرنت آنہیا تار ئے ایر کننگ گوشنت۔

کمالی شیرزال چگین بید چہ کچ و تار ئے کشنگا کننت۔آہانی گِتنز و گچیراو لنککانی کچ ئے گِرئگ وت آہانا وت پیمانہ ئے کار ا دینت۔ پنسل ئے کشکانی بدلاچہ گُد ا تار کشنت۔ و پداتار ئے کشک آسانی کار ا راست بارت یک سر ئے مود ئے کساسا ہم آہانی کار ئے تہاپرک نہ کیت۔ہر وڑیں چہار کُنڈی، (مربع)،شش وَہشت کُنڈی (مستطیل) و زاویہ بیدچہ جیومیٹری و ٹرگنا میٹری ئے وانئگا جوڑ کننت۔چہ اے درُستیں گپ و گالاں رند دور و باری لوٹیت کہ اے کار انگتاں دیمابرئگ ببیت۔ دوچ ئے نوکیں وڑ و ڈول درگیجگ بہ بنت۔پشکانا نوکین باری ئے ڈولا زیات و کم کنئگ ئے جہد ببیت۔ رنگانی دور دئیگ ئے کمالا پہ جوانی ہیل کنئگ ئے کوشست ببیت۔اے کار ا مئے وانند گیں جنئک  و گہار شر تر کُرت کننت۔