پیچھا نہ چھوڑو گے؟ ۔۔۔ احفاظ الرحمن

( نیب والوں سے)

خزانہ لُوٹنے والوں کا تم پیچھا نہ چھوڑو گے؟
خزانہ لُوٹنے والے اِدھر بھی ہیں، اُدھر بھی ہیں
مگر سب ایک ہیں،
سب چٹّے بٹّے ایک تھالی کے
یہ سارے ہٹّے کٹّے چٹّے بٹّے ایک تھالی کے
یہ جو حمام پاکستان ہے، سب اس میں ننگے ہیں
ملائی حلوہ کھانے والے سب ننگے دھڑنگے ہیں
اِدھر بھی ہیں، اُدھر بھی ہیں
انہیں روکو گے؟
اچھا روک لو، ہم بھی ذرا دیکھیں
ترستی ہیں جسے آنکھیں، وہ منظر تو ذرا دیکھیں
ہجومِ مُفلساں دیکھے،غریبوں کا جہاں دیکھے
لٹیروں ، زّر پرستوں کا جہاں کیسے بکھرتا ہے
تمہارا دعویٰ بھی دیکھیں، تمہارا حوصلہ دیکھیں
مگر اِک بار پھر سمجھانا ہم پر واجب آتا ہے
یہ جو حمام پاکستان ہے، سب اس میں ننگے ہیں
ملائی حلوہ کھانے والے سب ننگے دھڑنگے ہیں
یہ سب ہیں ایک اوران سب کا اک کنبہ گھرانا ہے