آف ئے رَند ۔۔۔ مہتاب جکھرانی

گوش انت کہ آف ئے رَند کلیں رنداں شہ جوان این، پچے کہ آف ئے رند دیئغ ءَ ا شہ پذا  ڈغار ءَ ریم و بوچ، درشک و دار رْذنت۔ ہمے ڈول ءَ زندگی روان بیث۔ بلوچستان یک ھشکاوغیں ڈیہے، ایذا گیشترا بے  آفی و ڈکالیں۔ پوانکہ تہ مڑدم ہردم حذا ءَ  شہ دعایاں لوٹ انت کہ

اللہ حیرکی ہؤراں دئے

پْر کن اوٹغاں شیریناں

وختے دعا قبول بنت تہ ہؤر گوار نت، زندگی اغدِہ خوشی ءَ رواں بیث۔ سیوی، کچھی، ناڑی  و دوہمی  الکہاں زرت، کرپاس و مونگ کِشغ بنت، ہمے رنگ ءَ زند ئے ہر روشی ضرورت پیلو بنت۔ وختے کہ ھؤر نہ گوار نت تہ مڑدم لوغانی دراں ڈھنگراں دینت و لاف ئے لاف شوہاز ءَ  خراسان و سندھ ءَ رونت۔

وخت وختے مزانیں ہؤر گوارنت تہ سیلاف کاینت و کِشت کشار ئے امیداں اواری ءَ لوغ، مڑدم، مال و سہداراں اواری ءَ بستغیں بند و بنواں دِہ بر انت۔اے رنگیں حالاں غریبیں مڑدمانی زند اغدِہ جنجالاں کفی۔ پچے کہ بے نغن و خوراکی، بے درمانی و سہولتانی ءَ ژ ہ دِ  ہ بازیں مردم مِر انت۔ گیشترا سرکار فنڈاں نہ داث، اگر نیخے بذے داث دِہ آنہاں گیشترا سرکاری عملدار و علاقہ ئے  میر و معتبر یا آنہانی مڑدم بہر بانگ کن انت۔ چوکہ جولائی 2022 ءَ پی ڈی ایم اے ئے دیم داثغیں کْل ورغ ئے سامان نصیرآباد ءَ بہر بانگ کنغ بیثغ انت۔ پذا کہ سیلاف آختہ انتظامیہ ءَ گور ویلی ایں مڑدماں را دیئغ ءَ پہ ھچ نیست اث۔ داں روش مروشی ءَ آں روش سرا نشتی انت۔

بلوچستان ءَ گوئشے کہ حکومت ئے بس نام ایں پچے کہ حکومت ئے عملی کڑد و کار گندغ ءَ نئیث۔ نہ خاصیں روڈے و نئیکہ خاصیں بنیادی سہولتے استیں۔ نصیرآباد ڈولیں جاگیرداریں علاقہ تہ گوئشے کہ تباہ و بربادیں۔ ایذا ھچ بنیادی انفرا اسٹرکچر نیست ایں۔ سرکاری اسپتالے ءَ نہ ڈاکٹرے نئیں سغر دڑد ئے گولی ئے دِہ کسے ءَ را دست کفی۔

ایذا کہ سیلاب کئیث گڑا نقصان و فاعدہ اواری کاینت۔ نقصان آنہاں پہ کہ غریب و بے وس انت، فاعدہ پہ ھمانہاں پہ کہ بااثر انت۔ یعنی ویلی آں پہ آختغیں زر زردانی لوغ ءَ  روث۔ اے لکا 2010 و 2012 ئے سیلافاں گِندغ بیثغ انت۔

جولائی 2022 ءَ بیثغیں وشیں ہؤراں پذا ڈیہہ سوز گلزار بیثہ۔ جْو سوز بیثغ انت، لاغریں مال لاندو بیثہ، ڈیہا کنبھی رستغ انت، چک کنبھیانی پولغ ئا درکپتغ انت:

کنبھی، کنبھی پاڑ ءَ دئے

پاڑ نہ دئیے تہ جاڑ ءَ دئے

ناغمانی اغدہ ہؤر پذا گڑتغ انت۔ پذا داں اگست ئے گڈی روشاں بھڑی ءَ گْڑت اِش۔ حکومت ئے برائے نام بستغیں ڈیم پْرشتغ انت و پیلویں بلوچستان ءَ را آفاں بیڑثہ۔ انبری آفاں را مزانیں زارے مان اث کہ انگریزانی بستغیں دَگ و پہل دِہ بھورینتغ انت کہ صذ سال ءَ شہ دِہ گیشتر وخت بیئغ ءَ باوجود دِہ آنہاں را  آفاں ھچ نہ کثغ اث۔ کوہ سلیمان ءَ گِر داں مکران ءَ ہر جاہے آف ئے بادشاہی بیثہ۔ لہڑ و کؤرانی کس ءَ بستغیں شہر آفاں گوں وث ءَ بْڑتغ انت۔ مِروخ بْھروخانی دانکو ھچ اندازہ نیست ایں۔ حکومتی کار سوائے ٹی وی و اخباراں ڑہ علاوہ تھِی ہنداں کس ئا نئیثہ۔

کوئٹہ ءَ دہ ہند ہندے ءَ سیلافی آف ءَ نقصان داثہ۔ کوئٹہ ئے رابطہ ہؤراں ژہ پذا سستہ۔ پنجرہ پہل،بی بی نانی پہل و بولان ئے دگ ئے مستریں بہرے ءَ اواری ءَ گیس پائپ لائن آفاں بڑتہ۔

جھل مگسی اول ءَ شہ آفاں پْر اث، پذا  نصیرآباد، جعفرآباد و صحبت پور دِہ سیوی ئے کؤر و بندانی پْرشغ وجہ ءَ ژہ باز متاثر بیثغ انت۔ نصیرآباد ڈویژن  اگر 100 فیصذ نہ تہ 99 فیصذ ضرور متاثر بیثہ۔ پٹ فیڈر و ربیع کینال ءَ حلکانی حلک آف ئے شیری شکار بیثغ انت۔ مڑدماں ساہ رکغ ءَ پہ شاخ و روڈانی کَڑ گپتغ انت۔ ڈیرہ مراد جمالی روڈے ءَ شہ مڑدماں را کَڑو کنغ ءَ پہ جاگیردارے ئے پلوا ڑہ فائرنگ ئے واقعہ دِہ اشکثیں۔ جاگیردارانی پسل رکغ ءَ پہ بازیں حلکاں آف یلہ دیئغ بیثہ۔

بازیں روشاں شہ شْذی ءَ نشتغیں مڑدماں پہ رضا کار و حذا تڑسیں مڑدم و تنطیماں نغن ئے بندوبست کثہ۔ پاسکو ئے دان خراب بیئغ ءَ ژ ہ باوجود دِہ سرکار ءَ کس ءَ را ہچ نہ داثہ۔ کوہ سلیمان ءَ دَہ ہؤراں بھڑیں نقصان داثغ انت۔ مڑدم و مال مڑتغ انت۔ لوغ آفاں بڑتغ انت۔ راجن پور  دِہ دربدر بیثہ۔ اوذا دِہ سرکاری کمک باروا ہچ نہ اشکثیں۔ وثی مڑدمانی مذت کنغ ءَ پہ “بلوچ راج” و بلوچانی پلوا ژہ کوہ سلیمان ئے ویلی آں پہ پیاذغی ءَ کوہ  و درنگاں سرکنان ءَ ہموذا سر بیثغ انت۔ ہمے ورناہانی ہمت ءَ سلامیں کہ پذا آنہاں موٹر سائیکلانی دگ ِ دِہ بحال کثہ۔ ڈیرہ غازی خان، کوئٹہ،مکران، کراچی و دوھمی بازیں ھنداں ژہ ویلی آں پہ پھوڑی کنغ بیثہ۔ ھذیں اے کار کمیں آسان بیثہ۔

نصیرآباد ءَ یونیورسٹی کالج آف ڈیرہ مراد جمالی، خادمین نصیرآباد، نصیرآباد لٹریری فورم و تھِی  تنظیم و مڑدماں ویلی ایں مڑدمانی مذت کنغ و آنہاں  پہ نغن ئے بندو بست کثہ۔ اوستہ محمد، جھٹ پٹ، صحبت پور، تمبو و تھِی بازیں ھندانی سوشل ایکٹِوسٹاں وثی وس و واک ءَ مذت کثہ۔ اے باروا ہندو کمیونٹی ئے کرد دِہ قابلِ تعریف ایں۔

سیلافی صورتحال ءَ پذا پذا 25 اگست 2022 ءَ حکومت ئا نیسشنل ایمرجنسی ڈکلیئر کثہ۔ حکومتی لیکو ئا 33 ملین مڑدم دربدر و بے لوغ بیثغ انت، 937 مڑدم  مڑتغ انت۔

نیشنل ڈیزاسٹر مینجمنٹ اتھارٹی ئے  گوئشتن ءَ انبرا 167 ملی میٹر ہؤراں گْڑتہ۔ اے ہؤر شہ معمول ءَ 241 فیصذ زیاث اثنت۔ ھمے ڈیٹا ئے مطابق ءَ بلوچستان ءَ اے ہؤر 784 فیصذ ہرسالی ہؤراں ژہ گیشتر اثنت۔

گراؤند ریئلٹی و حکومت ئے گوئشغ ءَ اے سیلاف 2010 ئے سیلافا شہ باز مزن ایں َ 2010 ءَ  تقریباَََ 1985 مڑدم مڑتغ اثنت۔ ھمے رنگ ءَ 2012 ءَ  کوہ سلیمانا شہ آختغیں آفاں نصیرآباد ڈویڑنا را مزانیں نقصانے داثغ اث۔ مان کئیث کہ 2022 ئے سیلاف ئے نقصان ہڑدوئیں  سیلافاں ڑہ گیشتر یں۔

۔28 اگست 2022 ئا وزیراعظم شہباز شریف نصیرآباد ڈویڑن ئے حال گِرغ ءَ آختہ۔ ہموذی سوشل ورکر و گراؤنڈ سرا کار کنوخیں مڑدمانی گوئشغ ءَ قدوس بزنجو و آنہی مڑدماں شہباز شریف ءَ را گراؤند ریئلٹی لِکئینغ ءَ پہ یک عارضی ایں ریلیف کیمپے دِہ جثہ۔ پذا شہباز شریف ءَ را گڑدینتہ۔

بلوچستانا را مین سٹریم میڈیا کوریج نہ بیئغ کچّ ئا ءَ یں، ہذیں ورنایاں سوشل میڈیا سرا وثی ڈکّ و مسئلہ  ملکی و در ملکی میڈیا ءَ داں سر کثغ انت۔  ملک ءَ ہند ہنداں ژہ پھوڑی ءَ  پہ دِہ سوشل میڈیا ءَ ژہ کار گِرغ بیثہ۔حکومت ئے کلیں کارکردگی سوشل میڈیا ءَ پدھر کثہ پذا میڈیا سرا اے مسئلہ ئے توار بڑز بیثہ۔

سگنل بند بیئغ وجہ ءَ ڑہ آفا کپتغیں و دری مڑدمانی نیاما رابطہ  نئیں۔ نی کس نہ زانت کہ کئے مڑتہ، کئے زیندغیں، کئے نادراہیں۔۔۔۔۔ امیدیں ڈکھی ایں وخت زیث گْز انت۔