اے بالڑا کہڑا بالڑا اے! ۔۔۔ ابنِ انشا؍عابد میر،ریشم بلوچ

1

اے بالڑا کہڑا بالڑا اے
اے کالا کالا جیڑھا
اے کالا جیڑھا، مٹی ہالا جیڑھا
اے بالڑا بُکھا بکھا جیڑھا
اے بالڑا سُکا سُکا جیڑھا

اے بالڑا کیہندا بالڑا اے
اے بالڑا کہڑا بالڑا اے
اے واری تے چَھڑا بیٹھا اے
نہ ایندے پیٹ اچ مانی اے
نہ ایندے تن تے کپڑا اے
نہ ایندے سر تے ٹوپی اے
نہ ایندے پیر اچ جُتا اے
نہ ایندے کولوں کھیڈنڑلئے
کوئی بھالو اے، کوئی گھوڑا اے
نہ ایندا جی بہلاونڑ کوں
کوئی لوری اے، کوئی جھولا اے
نہ ایندی جیب اچ ٹکا اے
نہ ایندے ہتھ اچ پیسہ اے
نہ ایندے آئی ابا ہن
نہ ایندی آپا، خالہ اے
اے سارے جگ وچ کلا اے
اے بالڑا کہڑا بالڑا اے!

2

اے صحرا کہڑا صحرا اے
نہ ایں صحرا وچ جُھڑالا اے
نہ ایں صحرا وچ برکھا اے
نہ ایں صحرا وچ کنڑک اے
نہ ایں صحرا وچ کپاہ اے
نہ ایں صحرا وچ ساوانڑ اے
نہ ایں صحرا وچ سایہ اے

اے صحرا بُکھ دا صحرا اے
اے صحرا اجل دا صحرا اے

3

اے بالڑا کیویں بیٹھا اے
اے بالڑا کڈوکا بیٹھا اے
اے بالڑا کیا کجھ پچھدا اے
اے بالڑا کیا کجھ آکھدا اے
اے دنیا کہڑی دنیا اے
اے دنیا کینہدی دنیا اے

4
ایں دنیا دے کجھ ٹکر اِچ
کجھ گل نِکتے ہن، کجھ ساوا اے
کتھئیں جُھڑ وَدھ ودھ اوندا اے
کتھئیں چشمہ اے، کتھئیں دریا اے

کتھئیں اُچے محل ماڑیاں ہن
کتھئیں محفل اے، کتھئیں میلہ اے
کتھئیں جوڑیں دے بازار سجیل
کتھئیں ریشم اے، کتھئیں دیبا اے
کتھئیں کنڑک دے ڈھیر لگیل
سب اَن کنڑ ملیا اے
کتھئیں پیسے دے صندوق بھریل
ہا، تانبا اے، سونا اے، روپیا اے
تو جو منگیں سب حاضر اے
تو جو منگیں، سب ملدا اے

ایں بکھ و ڈکھ دی دنیا وچ
اے کیہڑا سکھ دا سپنا اے
اے کینھ دھرتی دے ٹکرے ہن
اے کینھ دنیا دا حصہ اے

5

اساں جینھ آدم سے بال ہسے
اے اُوں آدم دا بالڑا اے
اے آدم ہک ای آدم اے
او گورا اے یا کالا اے
اے دھرتی ہک ای دھرتی ای
اے دنیا ہک ای دنیا اے
سب ہک داتا دے بندے ہن
سب بندیں دا ہک داتا اے

کجھ اُتر ، ڈکھنڑ دا فرق نئیں
ایں دھرتی تے حق سب دا اے

6
اے کلا بالڑا وے چارہ
جیکو اِتھاں بیٹھا اے

ایں بال دی کیویں بکھ مٹے
(کیہڑی ڈکھائی اے، تھی سکدا اے)
ایں بال کو کیویں کھیر ملے
(ہا، کھیر اِتھاں ودھارا اے)
ایں بال دا کوئی تن ڈھکے
(کیا جوڑا اتھاں تھولا اے)
ایں بال کوں کوئی چا گھنے
(مانڑھوں جیکو ایاں جیئرا اے)

7
ایں جگ وچ سب رب دا اے
جو رب دا اے او سب دا اے
سب اپنڑے ہن کوئی پرایا نئیں
سب کجھ سب دا سانجھا اے
جیکو ودھدا اے، جیکو پلدا اے
او دانڑا اے یا میوہ اے
جو رِلی اے جو کپڑا اے
جو چاندی اے، جو سونا اے
او سب کجھ اے ایں بالڑے دااے

اے بالڑا کنھ دا بالڑا اے
اے بالڑا سب دا بالڑا اے