شاہ لطیف او بلوچ ۔۔۔ پروفیسر رحیم بخش مہر

سندھ و بلوچستان چہ کہنیں زمانگا تاریخی، سیاسی،راجمانی و مالی سرشونا چہ یک دومیگا نزیک بوتگ انت۔ بلے شاہ عبدالطیف بھٹائیا وتی شعرانی وسیلگا سندھ و بلوچستانا را یک دائمی ربیدگی سیادیا جوڑینگ ئے سمائی جہد کرتگ۔ آنہیا سندھ و بلوچستان ئے ہواریں مہرانکی داستان سسی و پنوں وتی شاعری پنچ سُرانی تہا بیان کنانا بلوچ ، بلوچی و بلوچستانئے ذکر گوں مزن مہر و ستک دلی آکرتگ۔ شاہ لطیف ئے شاعری ئے مزنیں بہرے ہما مہرانکی داستانانی پژدرا انت کہ سندھ ڈیھ ئے سرزمینا گوں سیادی دارنت۔اشانی تہا مومل رانو، جام تماچی،عمر ماروی، سسی پنوں و دگہ ہوار انت۔ اے توامیں داستانانی بیانا یک چیزے ہواریں دروشماگندگ کیت،آ ایش کہ شاہ لطیفا اے داستانانی کارست و آہانی ہند و دمگا آں نگاہاں کنانا زبان و بیانئے ردا زبانانی ہندی تب و گالوارئے ہاسیں حیالداری کرتگ و اشی ئے ہمرائیا ہما تجربت و مارشتاں بیان کنانا ہما کارستانی ذاتی زندو چاگرد وتی توامیں جزئیاتاں دیما آؤرتگ انت۔پمشکہ مارا شاہ لطیف ئے شعراں اے داستان و اشانی گواچنی کارست و آہانی چاگردئے راست و گواچنی دروشم دیما کاینت۔
دنیائے نامداریں فلسفی شاعر شاہ لطیف وہدے سئے سال ئے ڈکھی ایں سفرا دراتک تہ آنہیا بلوچستانئے بازیں ہندانی سیر کرت۔ شاہ لطیف سیرئے ہاترا ہما جوگی او سنیاسی آنی کہ ہمراہ ات آہانی سیمسرو حد گنجو ٹکر (حیدرآباد) ھنگلاج و لاہوت (بلوچستان ) اتنت۔ اے بنجلاں پہ سر بوہگا جوگی آں بازیں ہندا داران کت۔ شاہ لطیفا وتی تروتاب و سفرئے توامیں احوال سُر ’رامکلی‘ و ’کاھوڑی‘ آداتگ انت۔ آنہیا سرجما سئے سال سفر کت۔ آ چہ کراچی ئے راہا حب، لاہوت و ھنگلاجا شت۔ ھنگلاج چہ کراچیاسد مئل دور انت۔ اے سفرئے میانا شاہ لطیفا بلوچستان ئے یک مزنیں بہرے ئے چہ نزیکا گندگ وچارگ ئے موہ رس اِت۔ شاہ لطیف ئے گورا لاہوت و لاہوتی آں مزن ارزشت و واہگ یے گندگ کیت۔
جوگی وہدے سفر کننت تہ منزل بیت لاہوت
گرنچاانت یاقوت، بید اشاں اے زند چی یے
شاہ لطیف ئے گرا بلوچستان ئے ہند و جاہانی ہمرائیا بلوچی زبانئے کارمرزی ئے اوں درور و مثال دست کپیت چوشکہ جہل ئے اے شعراں بچار اِت کہ شاہا بلوچی لبز و ردانی کارمرزی گوں مزن ازمی و معنائی کمالا کرتگ۔

اے شعرانی اندرا ’’ شما واوَ شموش‘‘، ’’گئاخ(گوانک/ توار)‘‘ ، ’’ گوش‘‘ ، یا اے سرجمیں رداں دلگوش کن ات ’’رواں مروشی روش‘‘ ، ’’ ’’ مروشی جبل رواں‘‘ (جبل کوہاگشنت)، ’’ گندا گوشی‘‘ سرجما بلوچی لبز و ردنت کہ شاہ لطیفا وتی شعرانی اندرا کارمرز کتگ انت۔ شاہا وتی شعرانی اندراسندھی آ ابیددو زبان کارمرز کتگ انت، یکے عربی ودومی بلوچی۔ آزمانگا فارسی ئے لس ربیّت بیگا ابید ہم شاہاوتی شاعری چہ فارسی لبزیات وشعری جوڑشتاں پہریز اِتگ۔ عربی ئے کارمرزی گوں نیکراہا نزیکیا درا کنت وہدیکہ بلوچی ئے کارمرزی گون بلوچا آئی مہرئے درشان انت۔بلوچی و بلوچستاناابید آنہیا بلوچ ذات ئے ذکر ہم بازیں جاہاں پہ عزت و شرف کرتگ۔
شاہ لطیف ماں بلوچی لبزانکا :
شاہ عبدالطیف بھٹائی ئے سرا چوش کہ دگہ زباناں نویسگ بوتگ بلوچی زبانا چوشیں گنجیں موادے دست نہ کپیت ۔ بلوچی زبانا آنہی ئے چندئے شعر آزات ترجمہ عطا شاد ا کرتگ ۔ بلوچی زبانئے نامی ایں شاعر ولبزانت واجہ میر گل خان نصیر ہماں اولی مردم انت کہ شاہ لطیف ئے بازین شعر مان بلوچی زباناٹرانسلیٹ کرت ا و ’’ شاہ لطیف گشیت ‘‘ ئے ناما چاپ کرتنت۔ اے اکیلائیں کتابا ابید شاہ عبدالطیف ئے سرا بلوچی زبانا دگہ چوشیں گنجین کارے نبوتگ۔ میر نصیراشاہ لطیف ئے ہما شعر گچین کرتگ وٹرانسلیٹ کرتگ انت کہ آہانی تہا وڑے نہ وڑے آ بلوچ ، بلوچی و بلوچستان ئے ذکر اہتگ۔اے کتابئے سرھال ئے تہا میر نصیراہمے فکر ولیکہ دیما آؤرتگ کہ شاہ لطیف ئے بُن پیرک سیدمیر علی ات کہ ہرات ئے سید ات۔ میر نصیر ئے ھیال انت کہ میر علی ئے کہول کہ سید گشگ بیت بندراشے کہیری بلوچ انت۔ اے بلوچ درویشانی ہما ٹک انت کہ مسلمان بیگا پیش بُدھسٹ یا بھکشو بیتگ انت۔ وہدے مسلمان بیتگ انت تہ ایشانا شیخ گشگ بیتگ کہ بلوچستاناشے گشگ بنت و اے شے توامیں بلوچستانا تبلیغی کار برجاہ داشتگ انت۔ میر نصیر ئے حیال انت کہ بلوچستانا وتا سید گشوکیں توامیں بلوچ ہمے شے آنی اوبادگ انت، شے کلان، شے عیسی، شے مبارک، شے مرید، شے حسین نورانی، شے حسن بلانوش، شے سماعیل، شے سہراب، شے غریب شاہ و دگہ۔۔۔۔۔۔۔۔۔۔۔میر علی و شاہ لطیف ئے بلوچ بیگ ئے بابتا میر نصیرئے دلیل ایش انت :
اولی آ میر ئے سرناما زیریت، آنہی حیال انت کہ میرئے سرنام اے ہندا تہنا پہ بلوچا کارمرز بیت۔
دومی ایش کہ شاعری شے آنی میراث انت چوشکہ شے کلان، شے عیسی، شے مرید و دگہ ہمے پیما شاہئے شاعری اوں ہمے درچئے یک بہرے۔
سیمی ایش کہ شاہ چہ ہراتااتک و سندھاجاہ منند بوت، وہدے آئی عشق ئے چاڑاں جاہ جت و آئی شاعری ئے زبان بُتک تہ آئی بلوچی حون وتی رنگا در آؤرت و آئی پنوں وتی ہیرو ٹاہینت۔
چارمی ایش کہ آنہیا ہما حدا کہ وتی شاعریا بلوچئے ستا کرتگ و بلوچستان ئے کوہ و
دشتان پہ زہیرنالیں دلے آ یات کرتگ بید چہ بلوچ ئے حون دوستیں شاعرے آ دگہ راجے ئے شاعر چوش کرت نکنت۔
پنچمی ایش کہ پہ سید اں شاہ ئے سپت انت، ایش ہم بلوچ سید انی تہا رواج بوتگ۔
ہمے پنچیں آسرانی پدا میر نصیر شاہ لطیفا شے کہیری بلوچ گشیت و چوش ہم گشیت کہ سندھئے تالپور و دگہ بازیں رندا سندھی بیتگ انت ہمے پیما شاہ لطیف ہم سندھی بلوچے۔
میر نصیرا وتی اے توامیں حیال و لیکہ وتی کتاب ’شاہ لطیف گشیت‘ ئے سرھالئے تہا جتگ انت۔ اے کتاب چہ بلوچی اکیڈمی کوئٹہ ئے نیمگا 1983آ چاپ بوتگ او آنہیا اے کتابہ تہا ٹرانسلیٹ کرتگیں شعر چہ شیخ ایاز ئے رجانک کرتگیں رسالہا زرتگ انت۔ میر نصیرا شاہئے نسلی سیادی ئے بابتا ہرچ گپے کہ جتگ دراہ قیاسی انت۔ آنہیا ہمے پنچیں دلیل کہ شاہ لطیف ئے بلوچ بوہگ ئے بابتا وتی کتابا داتگ انت ایشانی بابتاہچ رنگیں تاریخی سرشون وحوالہ نداتگ وہدیکہ شاہ لطیف چو بلوچی ئے کلاسیکل شاعرانی وڑا گار و بیگواہیں شاعرے نہ انت بلکیں آئی پشپد و نسلی تاریخ ئے بابتا سرجمیں راستی ہمے پیش لبزئے تہا سرا دیگ بوتگ انت۔ شاہئے بن و بیھ گوں امام موسی کاظماروت و سر بیت۔ پمشکہ بے کچو ا اے گشت بیت کہ شاہئے کہولئے مردم نیکہ بُدھسٹ یا بھکشو بیتگ و نہ رندا مسلمان بیتگ انت بلکیں آہانی سیادی تچکاگوں دُریں نبی ﷺآ روت و سربیت۔
میر گل خان نصیرئے اے کتاب ’’ شاہ لطیف گشیت ‘‘ ئے ارزشت ایش انت کہ ماں بلوچی زبانا شاہ لطیف ئے شعرانی اولی ٹرانسلیشن انت۔ شاہئے گوں بلوچ ، بلوچی و بلوچستانا ستکین مہر ودلبستگی چیریں گپے نہ انت بلے آنہیا چہ بلوچاں گیش سندھا آباتیں لس مہلوکئے بابتاہم بازیں شعر نبشتگ کہ آنہی انسان دوستی ئے مستریں درور و مثال انت۔