زندگی ۔۔۔ شفیق شاد

زندگی سد رند ءَ اگاں بئیت اِنت
زندگی نوکیں رنگے ءَ کئیت اِنت
زندگی ہر رنگ ءَ بلئے روت اِنت
زندگی الّم اُوں دوبَر کیت اِنت
زندگی پیشی نوبتاں نئیت اِنت
زندگی اے پیمیں گُڈا مئیت اِنت
*
زندگی رنج ءُُ وشّی ءِ نام اِنت
زندگی ہر دم مَرگ ءِ پیگام اِنت
زندگی اَنچو مَرچاں بے تام اِنت
زندگی نگد ءُُ زندگی وام اِنت
زندگی سیر ءُُ روچے ہمشام اِنت
زندگی شپ نمب ءِ گُلیں بام اِنت
*
زندگی پہر اِنت زندگی شان اِنت
زندگی ہر رنگ ءَ پریشان اِنت
زندگی نشتگ درد پیچان اِنت
زندگی نُکس ءُُ زند تاوان اِنت
زندگی زند ءِ ساہ ءُُ ارجان اِنت
زندگی زندان ءِ وڑا گران اِنت
*
زندگی ذکر ءُُ تاہت ءِ رنگ اِنت
زندگی سَنگ ءُُ تور ءُُ پارسنگ اِنت
زندگی چرس ءُُ وت مِر ءُُ بنگ اِنت
زندگی شئر ءُُ لچّہ ءُُ چنگ اِنت

زندگی جاہ یے مہوش ءِ پنگ اِنت
زندگی درد ءِ پاہو ءَ درنگ اِنت
*
زندگی روچ ءِ کنڈگ ءَ ایر اِنت
زندگی وار ءُُ زندگی سیر اِنت
زندگی جاہ اِنت جاہ ءُُ جہگیر اِنت
زندگی ورنا زندگی پیر اِنت
زندگی گوات ءِ زرد ءِ تاہیر اِنت
زندگی نزّیک زندگی دیر اِنت
*
زندگی زند ءِ سرجمیں ذات اِنت
زندگی مَرگ ءِ پُلّیں سوگات اِنت
زندگی بندیگ زند آزات اِنت
زندگی وابانی کرامات اِنت
زندگی مہر ءِ ترندیں شہمات اِنت
زندگی سد سال ءَ منا یات اِنت
*
زندگی جاہ یے شادؔ ءُُ آباد اِنت
زندگی زیادہ وار ءُُ برباد اِنت
زندگی رنجانی گُشئے سیاد اِنت
زندگی مُنڈ ءُُ لَنگ ءُُ بے پاد اِنت
زندگی پرچا کور ءُُ کورماد اِنت
زندگی ربّ ءِ داتگیں داد اِنت
***