نام داتہ امروز ئے ناما ۔۔۔۔ فیض احمد فیض؍ گل خان نصیر

ناما امروزئے
او ، امروزئے غمانی ناما
زارَنت اش زندگی ئے گُلکَدگا پُرّین

زَردیں پَنّانی لدانی ناما
زَردیں پَنّانی لدانی، کہ منی مُلک انت وتی
دردئے دیوانا پہ ناما کہ منی مُلک انت وتی

ناما مُنشیانی گیمر تگ و مونجھاڑِتگین
ناما کِرم کپتہ دلانی و زبانانی گوئشان
ناما ٹَپّالئے بَروآرانی
ناماٹانگایانی واگ دارانی
ناما واہری کَشّیں ریل بانانی
ناما کارجایانی لاپ گُشنگیں جید ارانی

ناما دھکانئے ، کہ آشاہ انت جہانئے درائین
والی وواجگ انت
ہم نیستی دگہ مَٹّ و بدل
او ، زمینئے مں سرا ، نائب انت اللہ پاکئے
بلے گوکانش جتگ برتگنت ظالم قہرین
اَوکہ ڈاکیگاں ، آئی دُحتگا پھُلین، برتگ
یک اَرِشّے ئے کساس ، داشتی ڈگھار
برتگ چائیا یک ٹکّرے پٹواریا
کوٹگَے مالیہ ئے عیوضا برتگ سرکار
پاگی، زورا وراں چیرا وتی پادانی جَتگ
دِرتگ ، راڈراڈی کتگ
ناما غمز یریں ہما ما تانی
شپ شپاں زھگِش پِلینگَنت مں گوئرا
وابئے دَکّ وارتگیں دستانِش گوں چیٹینت نہ بنت
درد ئے سوجا نہ دئینت
منّت وزاریا سہڑینت نہ بنت

ناما شررنگیں ہما کا ڈانی
کہ دوئیں چمّانی پُھل آوانی
پیِشدر و دَربَچَگانی لَڑیں ولّانی سرا چارانا
پَچ شَلان ، بینژتگ ئنت بے کارا

ہما با نورانی ناما کہ بدن آوانی
کپتہ بے مہر و ر یا کاریں مں بزمانی سرا
وتا سازیناں وسینگاراں مدام نیں چہ وت بَژِّ تگنت
ناما بے وسّیں جنوزانا نی
ناما پَلاّنی،
گَلی، مہتگ و ہنکینانی،
کہ، گونآ وانی دَرئے کھتّر ونا پاکیں کَھداں
ماہکان کئیت و شپاں کنت وضو
اَو کہ، مں سایَگاں آوانی جننت زارو پِراد
چُرمُٹانی انّام
بَنِگڑیانی شَلنگ
ڈَکّمیں بیکانی درھنزیں ھارود
وتی ہیداں مں شُلُنچ بیتگ ووازمندگیں گودانانی بو

ناما وانو کیں ہماز ہگانی
کہ شُتنت بَیرک و طبل واجگیں مردانی درا
لوٹَگاں زُرتہ کتاب و قلمئے
دست شہارانا شُتنت
بِرنہ گشت وتی لوگھاں مں پدا
چہ وتی سادگیا
زرتگ نازاکیں چراگھاں مں وتی
مہر برئمشاسا شُتنت
ہدیں اوداں کہ شُتنت
بہروبانکامں اتنت
بے کساس ، لُنجیں شپانی سایگ

ہما بندیگانی ناما کہ مں آوانی دلان
شپ چراغیں گوہربانداتگیں باریگانی
بندیجایانی مں ابر ستگیں گوش گواتا ، شپئے
بُنگراں، بُنگراں
روک بیتگنت چواستارا
دیمئے روچانی کُلہ یارتگیں مردانی پہ نام
کہ وت اِش پُھلئے چوو شبوئے وڑا
وتی بیگھامئے سرا بیتگنت نذر