منی شپ تاک ۔۔۔ اسحاق رحیم

درویشیں غنی نقش

منا آ مدام پہ کتابانی چاپا پریسا ایندگہ کارانی ھاترا برے صدر، برے سٹی کورٹ، برے اکبر روڈ ا ،مارکیٹا برے اردو بازار ہ دمکاں وئیل اتیں۔۔۔
او برے برے بیگہانی وھد ا گولیمار ا پٹھان ئِ چاہ والا ھوٹل ئِ دپا گوں استاد ظفرعلی ظفر ا ایندگہ شائرانی پجی ئَ ھم دیوان اتیں۔۔
من 21 سال ئِ نوک ورنا ء، غنی 60 سال ئِ نزیک ئَ اسپیت ریشیں کماشے اَت بلے مئے نیامجی ئَ اے تپاوت نیست اَت گوشے زاناں ما ھمسریں سنگت اِتیں۔۔۔
2008 ئِ سالا وھدے من نوک پہ وانگ ئِ ھاترا کراچیئَ سربوتگ اِتاں تہ اے وھدا مناں وتی تاکبندمروارد ئِ اولی تاک ھم پہ چاپ کنگ ئِ ھاترا گون اَت بلے کتاب ئِ چاپا پریس ئِ کار وتی جاگہ ئَ اے وھداں من کراچی ئَ جند ئِ ترو تابا ناسوہو اِتاں۔گڈا چہ بازیں جست و پرسے ئَ پد مناں سنگتے ئَ غنی نقش اوواحد کامریڈ ئے نام دات کہ پہ چشیں کاراں ھمے دویں واجکار سک گشاد اِنت گوں ترا بے مز و لالچ ئَ جوانیں وڑے ئَ ھمراہ بنت۔۔کامریڈواحد گوں سیاسی چست و ایراں سک دست گٹ اَت تہ پمیشکہ من گوں درویش صفتیں غنی نقشا رابطہ کرت۔ تہ آئی ئَ مناں پہ جوانی دست گپت و گوں من ھمراہ بوت۔۔۔گڈا ما ھردوں گیشتروھداں پریس مارکیٹا برے پہ یک کارے ئَ ھوار ترگ اِتیں۔
من کہ سہبا چہ ملیر ادراتکاں تہ غنی ھم چہ گولیمارا بسے ئَ درنگ ات و چہ من پیش ھمودا کہ مارا کارات آ ساڑی ات۔۔۔
پدا آودا ما ھوار سرجمیں پریس ئِ مارکیٹاں تراتیں او وتی کاراناں دیما برت۔۔۔۔۔
سادگیں اِنسانے اَت کہ کدی ھم من چو ایندگہ لس مہلونکہ پئیما دومی مردم ئے پچکاں بئیگ یا دومی مردم ئَ را باپشت ئَ اِیرجنگ ئَ ندیست۔ بے شان و بے مڑاھی ھم چہ غنی ئَ ھلاس ات ۔
مناں یات اِنت یک سالے من ئُُ آ چہ پریس ئِ بازیں کاراں دمبرتگ اِتیں کہ مناں نوں شد محسوس بئیگ اَت گڈا من گوشت کہ “غنی! نوں بریں ھوٹلے ئَ نانے بہ وریں ” گوں ھمے گپا آ برانز گپت ” ھوٹل ئَ چے کن اِیں بریں دیما ٹیلہ والاے ھست بٹ و ڈال اَرزان بہا کنگ ئَ ایں ھمودا وریں ، پہ بلوچی زبانا اے زرّانی جم کنگ ئَ ما شما چنکس جکانسر اِنت گڈا اِے زرّاں گوں ھوٹلاں پرچا زوال بہ کن ایں ”
گوں غنی ئِ اے گپانی اِشکنگ ئَ پد من گوں وتی ھبر ا نہ تہنا پشل بوتاں بلکہ مناں یک انچیں سوجے رس اِت کہ من داں زندگاں بلوچی زبان ئِ ھاترا پنڈتگیں زراں پہ جوان و پہریز ھرچ کن آں۔
غنی ھمنکس نیزگارو لنگڑ ات کہ گریبی ترندیں شھماتا چٹ ڑند و جور کرتگ اَت ۔آ مالی حالتا سک نزور و ناتوان اَت، بلے دل ئَ چو وتی نام ئِ پئیم ئَ غنی ات زند ئِ روچاں پہ عذابی تیلانک دیگ ئَ اَت، بلے آ من کدی پہ لاپ ئِ ھاترا پریشان بوگ ئَ ندیست ۔اگں آ یک گپے ئَ مدام پریشان اَت گڈا آ راج ئِ بزگی او زبان ئِ پدمنتگی اَت۔ پمیشکہ مدام ھمے جھدا اَت کہ منی راج و زبان چوں چرے جنجالاں دربہ کپ اَنت ۔
یک رندے منا وت چہ گولیمار ا پیدل دیم پہ گارڈنا سنگنل ئَ پیداک اِتیں کہ گارڈنا سنگنل جام ات او بازیں گاڑی ئے اوشتوک اَت گوں گاڑیانی مچی ئے گندگ ئَ گوش ئے زاناں آئی ئِ دل ئَ آسے لگ اِت دیم ئے گوں من کرت و گوشگ ئَ لگ اِت ” اسحاق ! منی دل گوش اِیت اے شوک ئَ ڈولداریں گاڑیاں سواریں مردماں بہ گر ، اِشانی گٹا بدار او جست ئے بہ کن کہ شما چہ کجا اَتکگ ئے ؟ او اے زراناں چوں جم کرتگ ؟ من کہ ھمے زمین ئِ واھنداں شدا آماچاں او تو کہ چہ درااتکگ ئے عیش و نوش کنگ ئَ ئے ۔
“تو ولی ئے من ولی پرچا نہ باں
دنیا سیراِنت من غنی پرچا نہ باں”
مناں یات انت یک رندے ما گوں سنگتاں نندوک اِتیں تہ یک سنگتے سرمچاراں ساڑاھگ او شائرو اَدیباں اِیرجنگ ئَ اَت گوں ھمے گپا غنی سک زھر گپت او دیم ئے گوں ھما سنگتا کرت او گوں ترندی ئَ مان ئے بست۔۔
“سرمچار کئیں ؟ سرمچار کئیں ؟
سرمچار مناں ، سرمچار منی وڑیں ادیباں ، شائراں ، جھدکاراں تھنا تپنگ بڈا کنوک و کوہا شتگیں سنگت سرمچار نہ اَنت۔ما دراہ کہ پہ زبان و راج جھد کنگ ئَ اَنت تری ھرچ پڑے ئَ جھد کنگ بہ بئیں سرمچارانت پرچا کہ ما پرے کارانی ھاترا سر نہ چاراتگ ما چہ زندئے ھمک کاراں سر گوستگیں او تھنا پہ وتی راج و زبان ئِ نپ ئِ ھاتراکار کنگ ئَ اِیں۔ما دراہ سرمچاریں ، ما دراہ سرمچاریں”
گوں آئی ئِ ھمے گپاں سنگت پوڑے بیت آپا کپت۔
سئے ماہ پیسر منی گوں غنی ئَ عبدالوھاب دامنی ئِ کتاب ئِ چاپ ئِ حوالہ ئِ فون سرا رابطہ بوت تہ آ پہ ما سک زھیر وار اَت ، من آ سدکی دات کہ تو پریشاں مہ بو منی سرھردیں کراچی ئَ کپت تہ تئی گندگ ئَ الم کایاں۔۔۔
بلے ھیب! کہ چہ منی روگا پیش۔۔ غنی گوستگیں ماہا ملکمیتا وتی پنجگاں زُرت۔