Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » قصہ » مئیزل ۔۔۔ مہتاب جکھرانی

مئیزل ۔۔۔ مہتاب جکھرانی

روشا ٹک ڈاثغ اث۔درشکانی سرا مرگانی چیکار اث۔کڑدے مرگ اے درشکا شہ آں درشکا روغ اثنت۔ اے مڑد بنوے پہناذا آفی ڈُبہ ئے کندھی آ دائیں وپتھغو وھاو اث۔ ایشی ئے راستی وٹاآف کھلی، لٹھ و تھِی گنڈھے ایر اث۔ کمیں دیر ایشی ئے لاغ گومازاں چھرغ اث۔ بز گل ہمے ساعتاں آف ڈبہ پلوا پھیذاغ اث۔کڑدے بزانی گڑدنا ٹلی بستی اثنت۔ ہمشانی ٹڑینگ ٹڑینگ توار لا غ گوشاں کپتہ۔لاغا واژہ پلوا دیثہ تہ آں بے سدھی آ کپتی اث۔گشے کہ لاغا دلاسوچثہ ”چھیاپ نواں واژہا را روش بیئغ و آبادی حالاں دیاں۔“ہذیں لاغا ہینژانٹے جثہ۔

ایشی گوشاں ہینژانٹ کپتہ تہ کھڑو بیثہ لاغارا چھبوے گوا داث ئی۔”گیذی لغور وشیں وھاو گار کث ئے۔“اغد اکسغ ارادہ کث ئی۔ روش ڈانڈھ ئی آ دیث ئی تہ بامبھرثہ۔ چھماں ملوہانا کھڑو بیثہ۔ گنڈھا شہ کاسغے کشت ئی۔ دیم ششت و آفی گڑمبے تھِنگث ئی۔ہمے ساعتاں بز گل دہ آفا آختغ انت۔ گیشتریں بز شیران اثنت۔اینگو آنگو دیث ئی نزیخا کس نیّث۔بُزے ڈھنگ جثو دشت ئی، گنڈھا شہ ساڑتیں ٹُکرے کشتو سوارغ کث ئی۔

لاغا را آف ورائنتو، گنڈھ زڑتو لاغا زوار بیثہ۔ ہماں بنو کندھی گفتی۔چھیاریں پلواں مال چھرغ اثنت۔ سوزیں آسمانا مُرگ بال اثنت۔ کڑدے مرگ گل میہی آنی سرا نشتو وثی زوانا ٹونکا کنغ اثنت۔دھنار گل لئیوا وذھان۔۔۔!دیربزیں لذانی ایندمی پلوا کھرگلے سیرہا تھشغیں! لاغا ہمے پلوا دیثو گوش کِیٹ کثغ انت، دُمب ٹُور کثو ژانگاٹے جث ئی۔ واژہا دیثہ لاغ ئے جزغ مرضی نئیں پوانکہ گڑدنا ٹھَپانا گوئشت ئی ”لاغووو!!! جُز مئے مئیزل دیریں۔۔۔! دیریں مئیزلانی جزوخ ساڑتی نہ کن انت۔“

گشے کہ لاغ واژہے ٹونکا پوہ بیثہ، ہیژانٹ اِشتواغد اولی ٹورا رائی بیثہ۔

نی سوزیں الکہہ کُٹِثغ اث۔دگ ئے وٹا یک کہیرئی  درشک ئے اث، تھُنا شہ آنہی حال ناششتیں زالے ئے چھوٹو ڈولا اث۔بنوانی کندھی آ نیم ہشکیں کھرغ  و گچھانی ول اثنت۔ گچھانی ولاں گوئر مشکے کھڈا شہ ایشاں گندغ اث۔۔۔گوئشے آنہیا خطرہ ئے دیثغ اث۔پرانہیں پٹ سرا نی لاغ رُمبغ اث۔واژہ وختے سیٹی  ئے جنت وختے سر وثی ٹونک کنت۔۔۔!

”اڑے!!! لاغووو!!!             اے دیریں پندھ زیث نہ کُھٹی۔۔۔! ہمے ڈولا رُمب بیگہا لوغا سر کھن۔۔۔! کھندانا کھندانا شئیرے گوئشغا شروع بیثہ۔۔۔! گوئشے کہ لاغار دہ ہمے شئیر چسا دیئغ اث۔ پوانکہ لاغ ئے جُزغ لوڈ یک چھاپے ڈولا مان کاخت۔۔۔! آنہی چھیاریں پھاذانی زیرغ و ایرکھنغ شئیرے زینورا شہ چس ئے ڈسا دیئغ اثنت۔

”جُز مئیں ڈڈو جزانا

جُز مئیں بڈو جزانا

جُز جُزانا۔۔۔ جُز جُزانااا!۔

بیگہا سیوی آآ سر کاں ں ں

 

اڑے گوں تھۂ مئیں یاری

اڑے مئیں بور ہزاری

جُز جزانا۔۔۔جزجزانااا!۔

بیگہا سیوی آآ سر کاں ں ں

 

مئیں سہرنگ مئیں موری

مئیں بور کھمیثیں گواثا چوری

جز جزانا۔۔۔ جز جزانااا!۔

بیگہا سیوی آآ سر کاں ں ں!!۔

 

واغ تلاہیں تنگاں تھنگو

مئیغا پہ چھاری مئیں براث بنگو

جز جزانا۔۔۔جز جزانااا!۔

بیگہا سیوی آآ سر کاں ں ں!۔

 

کُڑپَک کُڑپَک۔۔۔۔کُڑ کُڑ کُڑ۔۔۔۔!!!۔

کُو کُو کُو۔۔۔! مئیں بور ہزاری۔۔۔ کُو کُو کُو۔۔۔!۔

 

نیٹ کھندانا کھندانا شئیر دہ اشت ئی۔

”ہَش۔۔۔! ہَش۔۔۔!گزے وٹا لاغ داشت ئی۔ نی روشا وثی مئیزل نزیخ کثغ اث۔ ایشی مئزل دہہ دیر نیّث۔کھلی آشہ آفی قدحے تھِنگث ئی۔۔۔ لاغا دہ جوڑ  و  گرانزانی اشارہا شہ تھُنی بیئغ حال داثہ۔ لاغارا دہ آف داث ئی۔

گزئے شمباں شہ گواث گوئزغا گوں یک وشیں توارے پھیذاغ اث۔ گشے کہ مسافرا را وھاو کنغاپہ گوانکا جنغ اث۔کمیں نشتہ شمبانی پلوا دلگوش کث ئی۔ ناغمانی ایشی دیم سرا مونجھائی ئے نشان پدھر بیثغ انت۔ شوکارے  پُر کثو گشت ئی ”ہئے ے۔۔اڑے!!کوڑی ئے ساڑتیں گواث۔۔۔!“

چھیاریں پلوا دیثو زوار بیثہ۔لاغا اغدے بھیڑغ شروع کثہ۔”لاغو۔۔! جلدی کھن، دل مونجھا کنغیں، حذا رحمتاں کنت۔“لاغا را انڈی جنت، لاغ ٹور ودھینیث۔ اے مڑد پیشا شہ باز بے چین بیئان رؤث۔

نی مئیزل نزیخ بیثغ اث۔ روش سُہرغان اث۔ روش ٹُب ئے پلوا روش ئے سُہرغا جُڑاں گوں پھجی بیثو آسمانا را جوانیں رنگے داثغ اث۔ ”لاغووو۔۔۔!گند۔۔۔! روشا وثی مئیزل سر کثہ، دائیں مئے مئیزل نہ کُٹثہ۔۔۔! تھرا ڈوہ نئیں لاغو۔۔!تھۂ مئیزل کُٹینغا پہ وثی جان داثہ۔“ وختے لاغ ئے گڑدن مہنٹِیث، وختے کشاں ٹھَپِیث۔۔۔!

لاغ گوں واژہا مئیزلا روان ایں۔نی دیر دیرا مڑدمانی آبادی دہ پدھر بیئغ ایں۔ روش ٹُب وختا دہ لاغ ئے ٹورا شہ پھُلک ئے دنزانی دودلائی ایں۔ناغمانی ہمشانی پشتا شہ دنزے رُستہ۔ ہمے دنز گھڑی گھڑی آ لاغ ئے نزیخا پھیذاغ ایں۔لاغ و واژہ ایشی آ شہ بے سُدھ انت۔

دنز نزیخ بیثہ تہ لاغا فرڑاٹے جثہ۔ آں دہ زانتکاریں مڑدے اث۔ لاغ فرڑاٹ مطلو خطرہ زانت ئی۔۔۔جلدی لٹھ دستا کثو،پھذا دیث ئی تہ رسترے زوم زورا تشانا پھیذاغ ایں۔لاغا شہ ایر کپتو مڑغا پہ سنبرثہ۔لاغا ژانگاٹے جثہ۔مڑدا لٹھ رستر پلوا دراژ کثو یہ ہکلے رسترا داثہ ”بوووشت۔۔۔!“ دوہمی دراژیں گوانکے جث ئی۔۔۔! ”مئیں واہری آ کھنے ے ے ے“گومن رسترے مڑغ ایں۔“ رستر کانوئے کچھا آختو ڈھڑو بیثہ۔ وروخیں نغاہاں گوں گُرَّغا شروع بیثہ۔۔ لاغ ئے ژانگاٹ چکھا ژانگاٹ، فرڑغ چکھا فرڑغ۔۔۔! نیٹ انسان و رستر ئے نیاما زیند و لاف ئے جنگ مان آختہ۔

رستر ایشی چکھا چھالے  داث۔ اے مڑد گوہی داث یہ پلوے بیث۔ رستر ناسوبی آ  آنہی زہر گیش کثہ۔ ڈغار ئے سرا رسترے گُرّغ  ولاغ ئے ژانگاٹ اث۔ گشے کہ آں وثی واژہ رکھغا پہ نزیخیں آبادی آرا حالا دیئغ اث۔وختے لٹھ کڑکائے دہ کئیث۔ اے مڑد کوشیش کنت کہ لٹھ رسترے پھونزا را جنغ ئیغا تاکہ رستر تشی بروث۔ رستر دہ ہمے کوشیش لافا ایں کہ جلدی وثی شکارا واڑت۔آنہی ئے تیزیں دتان، دراژیں زوان و سہریں دفا شہ گِکھانی اوئیل ایں۔ اے گُرّغ و جنگ ئے آواز بیگھن ساڑتی سوبا شہ داں دیرا روغ ایں۔ اے مڑد وختے لٹھ چوٹی آ گوں رستر چھمانی لافا ہاخ مان کھنغ کوشیشا دہ کھنغ ایں۔

یہ برے جنگ اغدے تیز بیثہ یک دو لٹھ رسترے سغرا مان آتکہ نیٹ لٹھ پرشتہ۔ مڑد دستا لٹھ یہ ہرشے کچھا بچثہ۔ مڑدا دیثہ کہ اے لٹھ ہچ کار نہ داث پوانکہ مڑدا  وجھ  دیثو اغدے کوکارے کثہ۔”واہری۔۔۔واہری ی ی۔۔۔!!!“ رسترا مڑدا را نیٹ ولاڑثہ تہ ہڑدوئیں بکھا کفتغ انت۔مرشی زیند سرا آختغ اث۔ زیند رکھغا پہ ضروری اث کہ رسترے دو بدو بیث۔ کمیں جنگا پھذا مڑدئے راستی کشا نیش گلے مان آتکہ۔ حون بُسکغا گوں ایشی سیخ درکفانا روغ اث۔ رستر گڑدنا شہ ایشی دست درکفغ اثنت۔ رسترا دف ایشی گُٹا جثغ اث۔ایشی گُٹا شہ حون درکفتو رسترئے دفا  او  ایشی ئے سینغ ئے سیاہیں میذو گذاں میسینانا جہلا روغ اث۔ ہمے ساعتاں سئے مڑد ایشی واہری آ  آختو سربیثہ۔آں مڑدا ں رستر بیڑثہ۔ اے کپتہ ڈغارا حون و حاخاں شہ ایشی جان دِہ  ہمے ڈولا  بیثہ چھو روش ٹُبغ وختا  آسمان ئے بیث۔اے بے سُدھ بیئانا روغ اث۔ چھِڑی آں جنانا راستی پلوا کفتہ۔ اے وثی آخری ساہا دوزواہے گندغا باڑا اث۔ایشی نغاہ روش پلوا شثہ۔ دیث ئی روش ٹبثہ۔نی سہرغ ہند سیاہغا گفتغ اث۔ساہ شہ بالاذا درکفتہ۔سئیں مڑداں رستر کشتو ایشی پلوا آختغ انت، دیث اِش مڑد ساڑت اث۔

لاغ واژہ، روش و رستر ہڑسئیں وثی مئزلاں سر بیثغ اثنت۔

Check Also

سمندر کے نام ایک غنائیہ ۔۔۔ سبین علی

میرے اردگرد بے شمار لوگ ہیولوں کی مانند رواں ہیں۔ مگر ان کے سر نظروں ...

Leave a Reply

Your email address will not be published. Required fields are marked *