سٹیٹ وانقلاب ۔۔۔ ولادیمیر

          مارکسہ نظریہ آگوں اے وختاں ہمانر گا بیغیں چوکہ ہسٹری لافا بازیں دھکاں انقلابی مفکر اور مظلومیں کلاسانی لیڈرانی نظریہ آں گوں آزادی خاطرا آنہانی سٹرگلہ اندرا بیثہ۔ مزن شانیں انقلابیانی زیندھا ظلم کنوخیں کلاس دھروذ آنہانی رندا کپتغنت، آنہانی نظریہ آنی خلافا باز بدنیتی، باز نفرت کثیش، او دروغ و تہمت جنائی ئے سک بے شرمیں مہم ھلائینتغنت اش۔ آنہانی موثا رند، اے کوشیش برجاہ اَنت کہ آں بے ضرریں مذہبی بُھتانی اندرا تبدیل کنغ بنت، آں پاک ٹاہینغ بنت، آنہانی نام  یک حدے آداں مشہور کنغ بنت،تاکہ  مظلومیں کلاسان ءَ”تسلی“ دیغ بی او آں پرامغ بنت۔ ہمشی پجی پجیاانقلابی رَہ کُنٹ کنغ و کوجھا کنغ بہ بی۔ مرشی بورژوازی او ورکنگ کلاسہ اندرا گیغ گند (opportunists)مارکسزم ئے ہمنگیں ”مکسچرے ٹاہینغنہ“ سرا متفق انت۔آں ہمے نظریہ ئے انقلابی رُخ ءَ، آنہی انقلابی روح ءَ شموشنت، گاروکوجھاکننت۔ آں ہماں ٹوکا اگھہ اگھہ کارنت او ساڑا ینت کہ بورژوازی آپہ قابل ِ قبولِ ایں یا قابل قبول معلوم بی۔ اے وختا سجہ ایں سوشل شاونسٹ، ”مارکسسٹ“ ٹھیثغنت (کنداِنت نہ!) او جرمن بورژوا سکالر کہ زی آ داں مارکسزم ئے ختم کنغا پہ جراں لانچثی ایثنت نِیں یکّو ”قومی جرمن“ مارکسہ پچارہ کننت گشئے کہ آہاں مزدور یونینائی ٹریننگ کثہ او آں لُٹ و پل ئے جنگاپہ اکھر شانداریں ڈولا منظم کثغنت!۔

          ہمے حالتانی لافا ”مارکسزم ئے اکھر بے نظیر ومزن پاند ی آ خراب کنغئے صورتا مئے کلاں ژہ پیشی ڈیوٹی اشیں کہ ماسٹیٹ ئے بارہا مارکس ئے اصلیں نظر یہ آ بیاروں۔ ہمشی خاطر ا مارکس و اینگلز ئے جند ہ لِکھاں ژہ بازیں دراژیں حوالہ دیغ ئے ضرورتیں۔ اے ٹوک راستیں کہ دراژیں حوالہ مضمونہ گراں تریننت او آنہیا مقبول ٹاھینغہ مں بالکل کمکہ نہ ذی انت۔ پر شمشیاسوا کار نہ چلی۔ سٹیٹ ئے سرحالہ چکا مارکس واینگلز ئے کتاباں ژہ سجہ ایں یا بہر حال ہرچی کہ بیثہ بی سجہ ایں ضروری بہرانی حوالہ دیغ پہ کاریں تاکہ وانوخ سائنسی سوشلزم ئے بنیاد ایر کنوخانی خیالانی چکا، او ہمے خیالانی ارتقا ئے چکا مجموعی ڈولا وث گنڑتیا کثہ بہ کنت، تاکہ مرشی بانگھا رواج کپتغیں ”کاؤتسکی از ما“ ہماں ڈولے کہ آں گڈ مڈ کثغنت آں گوں ڈاکو منٹاں ثابت کنغ بی اور جوانیا ڈسے جیثہ بی۔

           مااینگلز ئے کلاں ژہ مشہور ونامی ایں کتاب”خاندان، پرائیوٹ پراپرٹی اور سٹیٹ ئے بنیاد“ اژہ شروع کنوں۔

           وثی تاریخی تجزیہ ئے نتیجہ آں کشّاناں اینگلز ا لکھثہ: ”سٹیٹ ہچبر ہمنگیں طاغتے نہ ایں کہ دراژہ سماجہ چکا نازل کنے جیثہ۔ ہمے ڈولا سٹیٹ“ اخلاقی نظریہ ئے حقیقت“ ”عقل وپوہ ئے صورت او حقیقت“ دِہ نہ ایں چوکہ ہیگل آ دعوی کثہ۔ سٹیٹ رذوم ئے خاصیں ہندے آ سماجئے پیداواریں، سٹیٹ اے ٹوکہ منغ ایں کہ سماج وث وثی نہ گی ایشوخیں تضاد ہ لافا بجثہ۔ او یک ہمنگیں صُلُح نہ ویوخیں تضادانی اندرا کپتؤ پرشتہ کہ آنہانی دِیر کنغا ژہ آں لاچاریں۔ پر،پہ اے خاطرا کہ ہمے تضادانی اندرا، متضادیں مالی مفاد داروخیں کلاس یک دوہمی آ، او سماجا،ہمے بے سیثیں سٹرگلہ اندرا تباہ مہ خن انت، طاغتہ ضرورت کپتہ کہ بظاہر سماجا ژہ بُرزِ تربی۔ ہماں طاغت کہ تصادم آبلّاں نرم کنت، آنہیا”قاعدہ“ءِ اندراداری۔ او ہمے طاغت، کہ ژہ سماجا پیدابی،پر وثار شمشیابڑز ترداری او ہمشیاژہ زیاتاں زیات بے گانہ بیاناں روث، سٹیٹ ایں“۔

          ایذا صاف صافی آ سٹیٹ ئے تاریخی کڑدار او مطلبہ معاملہ ءَ چکا مارکسزم ئے بنیادی نظریہ درشاں کنغ بیثہ۔ سٹیٹ کلاس تضاد انی صُلُح نہ وی غئے پیداوار  او  مظہرایں۔ سٹیٹ ہموذا  ھذیں او دھماں سندھو ءَ  پیدابی، اوذکہ ہر وختے او دھماں سندھو آکہ کلاس تضادانی اندرا صُلح پیدا کثہ مہ یئے۔ او ہمیشی برخلاف  سٹیٹ ئے وجود اے ثابت کنت کہ کلاس تضاد صُلُح کنغہ حداژہ  گوئستغنت۔

          ہمے باز ضروری او بنیادی ٹوکہ چکا مارکسزم ئے گڈ مڈکنغ شروع بی او دو خاصیں پلّواں چلّی۔

          یہ پلوے بورژوا او خاص کں پیٹی بورژوا نظریہ دان مزائیں تاریخی واقعہ آنی زورا اے ٹوکہ چکا مجبور بنت کہ سٹیٹ ءَ وجود چھڑو ہموذہ بی  او ذکہ کلاس تضاد او کلاس سٹرگل بی، مارکس ئے ”رذی ءَ“ اے ڈولہ دِیر کننت کہ شما نہیا اے ظاہر بی  کہ سٹیٹ کلاسانی صُلُح سازی ئے ادارہ ایں۔ مارکسہ چناں نہ تہ سٹیٹ پیدابیثہ بیث او نہ اشیاوثار برجاہ داشتہ کُث اغر کلاسانی اندرا صُلُح بیثہ بیثیں۔ پیٹی بورژوا او تنگ نظریں پروفیسر او مبلغ ہرچی کہ گشنت (مارکس ئے باز او خیر خواہیں حوالہاں پجی آ!) شمشاں ظاہر بی کہ سٹیٹ کلاسانی نیاما صُلُح سازی ءَ کنت۔ مارکس گشی کہ سٹیٹ کلاس قبضہ ءِ ادارہ ایں، یک کلاسے ءِ دوہمی کلاسہ شیرغی کنغئے ہتھیار،ہمے ”لااینڈ آرڈر“ ئے برجاہ داری ایں کہ کلاسانی نیاما جھیڑوا  نرم کنت وہمے پریشرا قانونی او مدامی ٹاہینی۔ بہر حال پیٹی بورژوا سیاستدانانی خیال اشیں کہ لا اینڈ آرڈر ہ مطلب یک کلاءِ ئے دوہمی کلاسہ شیرغی کنغ نہ ایں بلکنا کلاسانی اندرا بس صُلُح سازی ایں، جھیڑو ءَ نرم کنغہ مطلب کلاسانی صُلُح ایں، نہ کہ پریشر ئے شکاریں کلاسا نا ظالمانی تختہ چپی کنغ ئے جہد ئے خاصیں طریقہ او بھیراژہ بے نصیب کنغ ایں۔

          مثال: وختیکہ 1917ئے انقلابہ لافا سٹیٹ ئے قدر او کڑد ءَ ٹوک پیلویں زورا گوں ہمنگیں عملی سوالے ڈولا کڑو بیثہ کہ آنہی مطلب سُذتی گام زیرغئے غث۔اے دِہ کہ مزں پاندیں گامہ بھیراسجہ ایں سوشلسٹ  انقلابی او منشویک یکدم او پیلوی آاے پیٹی بورژوا نظریہ آ چکا آتکغنت کہ ”سٹیٹ“ کلاسانی اندرا  ”صُلح سازی“ ءَ کنائینی۔ ہمے دوئیں پارٹیانی سیاست دانانی بے اُشماریں ریزولیوشن او مضمون ہمے پیٹی بورژوا او تنگ نظریں صلُح سازیں“ نظر یہ آژہ  پُرانت۔ سٹیٹ یک خاصیں کلاسے قبضہ گیری ءِ ادارہ اے کہ آنہی صلُح آنہی ضد (آنہی مخافیں کلاسا گوں)کثہ نہ ییث۔ اے ہمنگیں ٹوکے کہ پیٹی بورژوا ڈیموکریسی ہچبر پوہ بیثہ نہ وی ثی۔ سٹیٹ ءَ پلواآنہانی رویہ اے واقعہ ئے یک بازسہرائیں مظہریں کہ مئے سوشلسٹ انقلابی او منشویک بالکل سوشلسٹ نہ ینت (اے یک ہمنگیں نکتہ اے کہ مابالشویکاں یکو ثابت کثہ) بلکنا آں پیٹی بورژوا ڈیموکریٹ انت کہ سوشلسٹا نی بیانہ طریقہ ءَ اختیار کننت۔

           دوہمی پلوا مارکس ازم ئے ”کاؤتسکی والائیں“گڈمڈی زیات ہیڑت ایں۔ ”نظریاتی ڈولا“ اشیا ژہ انکار کثہ نہ یئے کہ سٹیٹ کلاس قبضہ گیری ءِ ادارہ اے، او، کلاس تضاد انی نیاما صُلُح ناممکن ایں۔ پر، اے ٹوک ہانسکار گندغ نہ وی یا مژاروکنغہ بی: اغر سٹیٹ صُلح بیثہ نہ یوخیں کلاس تضاد ءِ  نتیجہ ایں، اغر اے یک ہمنگیں طاقتے کہ وثار سماجاژہ بڑزداری او”سما جاژہ زیاتاں زیات ببیگانہ بیاناں روث“ تو اے ٹوک صافیں کہ مظلومیں کلاس ئے آزادی نہ چھڑو بغیر تشدد والائیں انقلابا ناممکن ایں، بلکہ سٹیٹ اقتدار ئے ہمے مشینری ئے تباہ کنغا بغیر دِہ ناممکن ایں آں کہ حاکم ایں کلاسا  ٹاہینتغ اث او آں کہ ہمے ”بیگانگی“ ئے عملی دروشم ایں۔ چوکہ ما دیما گندوں کہ مارکسا نظریاتی ڈولا ہمے صفائیں نتیجہ انقلاب ئے فرضانی پکوئیں تاریخی تجزیہ ئے بنیادا پیلویں ثبوتاں پجی آ کشتہ۔ او اصُل ہمے نتیجہ ایں، چوکہ ما تفصیلا گوں دیمہ ڈسوں،کہ کاؤتسکی آ ”شموشتہ“ اوگڈ مڈ کثؤ مسخ کثہ۔