اللہ بشک بُزدار

تُرس

دیغریں
کوہئے سرا نشتہ وداریگاں کہ
گِنداں رولہے
ساھے ، دمے کشاں، نواں
گامیگ باں
(بالاں بدلی زُڑتگیں پندھانی پیچگ چون بی)
مئیں ومنی بام ئے نیاما لرزغیں
ڈئینڑیں شفے
مں تُرسگاں
ڈُنگے براثانی ھمیذا گوں کفی
گُڈیث پاذاں
ٹیلغاں کشیث
بام ئے وزّتاں بے نور کنت
شف تُرسگیں
ماہئے برانزانی سفر کُٹیث
ڈیہا روش بیث

شمُش تئے

شمُش تئے اے دِہ کارے ایں
شکیں بی آزماں بُڑزیں
نا
ڈیہہ ئے دل ترکّی
اُستمان ئے کار مہتل بنت
من لبزے یاں
شہ رکّاں رِتکغیں روشے
گواثانی سرا شِنگیں
یہ حرفے یاں
منی فہمگ
زمانہ ڈِکشن ئے
وقت ئے سوالیگیں
مئیں وشبو
ہیذ،ھونانی نذر بیثہ
مئیں زیبائی
لِواراں تِنگثہ
بڑزئیلاں ھوشینتہ
شمُش تئے
جواں کثئے
لبزانی باندی
قول اقرارئے
مُریذانیں
مناں کئے نیں شفاں ٹوہی
مریذاناں یا
ھانواں؟
مئیں نام ئے شائری کئی غیں
عطائے غیں یا
مست ئے غیں
مں لبزے ثاں
شلِثہ، گوستگاں دیری
مں نامے ثاں
پُلِثہ ھانوآ دیری
شمُش تئے اے دِہ کارے ییں
کیا کئے گیر کاری عمریاں پُریں
دل ئے ٹپاں ، گیاباناں
چنکر یادئے شہیدانی ادیراہ ہاں
کیا گیریں
شمُش تئے ؟
جواں کثئے ھانُل
شمُش تئے؟
جواں کثئے سمُل

ھماں روشا۔۔۔

ھماں روشا کہ میرا بذ بُڑتہ شہیں مُریذئے راستیں ٹونکاں
مناں گیریں
دُراھیں شفچراں مُچی کثہ
گوئشتہ
ما دانا عاقلیں ، بینا
مئے فہم ئے لوغ دیما زیند موت ئے راز سجدہ کنت
مئے شاندا آزماں چری
زمیں لُڈی
زرانی چول ھامی بنت
نفا نُکسان ئے لیکوّ مئے درا بِندات بنت کُٹنت
مئے بخت ئے آزماں ہمروش کندان اِنت
(اسیلیں واجہاں گوں ہمسری چوں بی؟)
گِہیں کُلیں زباں بثّنت
گنوخانی چے بستاریں
غریب ئے قول چے کرزی
وفاداری، مڑاہداری وثی واندالغئے ٹونکنت
مناں گیریں
مُریذانا
وثی لوھیں کماں تیراں گوں پرّینتئی
وتن اِشتئی
گُشئے گوئشتئی
شئے دیذئے شہر بر باثنت
شئے کوہاں لبز رُلاثنت
شئے جیذاں گَرد ننداثنت
من ھیراناں
ناں رندانی گہیں پوہ بنت
نا ں شہہ ٹونکاں پذاگڑدی