بشانگ ۔۔۔ عبداللہ شوہاز

زندگی چوں وش اَت ہمے وڑاگندئے ہاسٹلابہ نشتین وبس بہ ونتیں۔تہت ئے سر آ پناد شپ وروچ پچ بوتیں اَنت وکتابانی الماری ئے دپ پچ بوتیں ۔ٹیبل ئے سراہم ہر وھدا کتاب ونبشتہ ئے تاک ایر بوتیں اَنت۔ کجام وھدا کہ دلا ھب پاد اتکیں کتابے زرتیں ونتیں یاچیز ے نشبتہ کُتیں۔ دومی چاہ ہم بازوش اِنت۔ زندگی بس ہمے بوتیں ۔ سیہ چاہ ، ہاسٹل ، کمرہ وکتاب۔
’’یاراشی آبیدگہ ہم بازیں جنجال است‘‘۔ کریم ئے توارامنی دلگوش وتی نیمگا ترینت ۔ دگہ جنجال ئے نام گرگ آگوں منی جانا لرز گے چیر کپت۔ چیا کہ کریم چونا ہاگپ نہ جنت بلئے ہروھد ے کہ آنہی زبانا حبرے درکیئت گڑا الم بزاں مزنیں زورا کی یے بوتگ من ہم آنہی عادتاں جوان سرپداں۔ ہمے حاتر امن وتی کتاب ٹیبل ئے سراایرکُت وپاداتکاں کرہ شت وچاہے پرکُت۔کریم چو مُدامی ڈولاگوں وتی ترندیں گالوارے آ شروع بوت رپٹگا’’ یار تو عالیہ ئے مرگاسئی بوت ئے؟‘‘ ’’انا!کجام عالیہ؟‘‘ ’’ہماتئی دز گوہار ؟ ‘‘’’ ھؤ‘‘۔ کریم آپہ ناکامیں دلے گشت ۔ آنہی چمانی ارس گلگل بوت اَنت ۔’’ نہ چے بوتگ بیجار گا؟ اے وسلامتیں جوانیں زالے اَت ،انوں ماہے نہ بیت اشی ئے سانگ ہم بوتگ ‘‘۔
یک زنڈیں دمانے آکمرہ خاموشی آوتی امبازاں زُرت ۔ ہیڑئے سر آ کرہ ئے ہم لہڑئے توار مّچ اِت۔ کریم سیہ چاہ ئے گٹے گپت وپداگپّے بناکُت۔
’’ عجیں چاگردے آمانشتگ ایں۔ یار چونیں جوانیں جنکے اَت۔ مہذبیں سرپدیں ووانوکیں مردمے اَت۔ بلئے اداکئی گلہ آکنئے کہ ادا پہ نامیں وانندہ چہ جاہلان گنتراَنت۔ ہماکہ دگراں ہمینچو سروسوج کن انت گشئے دنیائے دانا تریں مردم اَنت۔ بلئے باریگ کہ وتی کئیت جلدی پد کنزانت۔ عالیہ ئے پت وبرات ہم ہمے آسا آستکگ اَنت ۔ ہمیشانی کتگیں کاران دوشی آروسی بشانگ ئے تہاز ہر وارتگ یے یک جوانیں جنکے پداز مانگ ئے ارجان بوت‘‘۔
’’چوچوں بیت یار عالیہ وباز سرپدیں جنکے بوتگ ۔ وانندیں وزانوگریں ۔من باز برا شمے دیواناں ہم دیستگ زالبولانی جنزئے سرگرمیں باسکے بوتگ ہر وھدا گشتانکے ہم داتگ وزالبو لانی حقانی پاسداری آ شپ روچ جہلا بالا بوتگ ، اے چوں زہروارت؟ گڑا الّم د گرے آپندلے سازاتگ وزہر وار ینتگ‘‘۔
سیہ چاہ ئے شرّیں گٹے گرگاپد کریم حبر الگ اِت بلئے نوں آنہی گالوار گشئے چہ پیسریگاتر ند تر ات۔ ’’کجام زانت کجام سرپدی یار ۔ ہماز البول کہ پہ زالبولانی حقانی پاسداری آروچے بوتگ نہ شپ ہماہم پہ وتی زند ئے فیصلہاں وتی مات وپتانی چمدار بوتگ ۔ عالیہ ئے پت کہ وتا دانشورو سرپدیں مردمے لیکیت جنکانی باریگاآنہی زانت ہم چہ کورا نہ گوزیت غلام رسول (عالیہ ئے پت) آ وتی کستریں بچ الطاف اسلامک یونیورسٹی اسلام آباد اروان دات پہ لائے وانگا ۔ بلئے اے کم بخت اینچو کہ ہمداتر بتاکچکی پادئے پروشگا عادت اَت ہودا ہم وتی دندایے یلہ نہ دات۔ ہماسلیں عادت کہ آنہیا چہ کسانی آگون اِتنت انگت یلہ یے نہ داتگ اتنت دگرانی جنیں چکانی نمبرانی پچگرگ وآہاناستائینگ ہمروچیں کاراتے برے اشی آ Smsکنگ برے آنہیا آفون کنگ، ہمے پیم وتی وھدا زوال کنگا ابیدآنہیاگوں وانگاہچ نزیکی نیست اَت۔
اناگتایکروچے یک گچکی جوانیں کہولے ئے جنکے ئے فون نمبرے دست کپت ۔ بس اشی ئے و دندا ہمیش اَت نند فون کن Smsکن بس حبر کن ۔ روچاں شپ کن ۔ بچک وت ہم گچکی یے اَت گوں زال آہر روچ حال احوالے بوت تا آ ہم گوں ہمیشی آلوڈ تراِت واِشی آہم نوں دگہ کارنیست اَت شپ روچ گوں ہمے زال آحبر وتران آ ابید۔
بجلی شتگ اِتنت کمرہ تہاری ئے چنگلاں مانگیش اتگ اَت۔ بلئے من ہچی ئے سماآنہ اِتاں ۔ بس نشتگ اِتاں کریم ئے حبراں گوشدار گا اِتاں ۔ دمانے ئے خاموشی آمن سما کُت پا داتک آں موم بتی یے بُن دات ودگہ پیالہ یے چاہ ٹلات پدانشت آں۔
’’ گڑا وھد گوزان بوت اے بچک چٹ پہ جنکا شیدابوت گرماگ ئے موکلاں وھدے لوگا اتک تہ گرے بست کہ الم من ہمے جنکا گراں ۔ مات و پتاں گشت تو پہک گنوک ئے چوں اے جنک ئے پت وتی ھندئے ایم ۔ پی ۔ اے اِنت تراچوں زوریت بلئے بچک ہچ پدانہ بوت واروار ہمے گشتے زانا ماچیا چرآں کمتریں ۔ نہ دولت آنہ چہ رنگ ونسل آ۔ ماہروڑ اہم سنگیں بلئے پت ہچ پیم منگا آتیار نہ بوت گڈی آ بچک آوار وار پا دتراپ دئیگ شروع کُت کہ اگاں شما منا گوں ہمے جنک آ سورنہ دئے من وت آکش آں ۔ مات ئے دل ہر وھدآ بزگ پہ وتی چکا موم بیت ۔ گڈا مات ہم بدل ئے بوت وپت ومستریں براتے پہ زورے منا رینت اَنت۔ ہمے شومیں روچ اَت کہ عالیہ زند ا تہا رونکی آ مانشانت۔
کریم آسگریئے بُن دات وپدا کمرہ ئے دلبند آ وتی دل ئے گکاں دوتانی درو شماتالان کنگا لگ اِت ۔ آپی ترماس ئے ٹنگیں نل آچہ ترمپ ترمپا آپ پٹگاِاتاں جہل آ پرُیں ڈبک ہم سر رتکگ اَت بلئے نہ منا واک بوت کہ چستے بہ کناں نہ کریما آدیما چاراِت بس آپ پٹ پٹار چان اِتنت وقالین میسان اَت ۔
’’گڑا گڈی آ غلام رسول مجبور بوت چہ چکاوجنک ئے پت ئے گورا گواجارے بُرت۔ آہاں ہم نہ کت نہ کت چیا کہ غلام رسول وتی ھند ئے مہذبیں مردمے وٹک آہم گچکی یے اَت مال زرّاہم چرآں کم نہ اَت ۔ ہمے حاترامردا ہاں کُت بلئے ہمے شرط آکہ غلام رسول ہم وتی یک جنکے آہاں پہ سانگ آبہ دنت ۔و ہما جنک کہ آہاں دوست بیت۔ غلام رسول ئے رستگیں جنک دواتنت ۔ آہم مجبور بوت و من اِتے آہاں عالیہ ئے مستریں گوہار لوٹ اِت بلئے آئی آ تچکا تچک گشت کہ من اے بچکا نہ گراں۔ ہمے حاترا بانز عالیہ ئے سرانشت ۔ آئی آوس کُت کہ منامہ دئت بلئے کساآئی ئے حبر گوش نہ داشت گڈی آ چہ دوئیں ینمگاں حبر سندی بوت ونشانگ ئے زرہم دئیگ بوت اَنت۔
حبر سندی آپد پورا عالیہ ئے زند آتہارونکی یے آمانشانت ہما جنک کہ ہر سال وتی کلاس ئے پوزیشن ہو لڈراَت وسہب آداں شپ نشت وونتے نوں وانگ آوانگا برے یک کنڈآے نشگ وجیڑ گا اَت ماہے ہمے تو کاپر گوست چہ دوئیں ینمگاں آروس ئے تیاری سرجم بوت ۔ ہرکس چہ گل آدرنگ اَت۔ آروس بندات بوت ۔مردم رؤگ وآہگ بوت۔ بگروبداراَت بلئے عالیہ چہ درساں یک کرا وتی بانا سہب آتا بیگاہ گوں ھڈوسکگا مشکول اَت
آروس نے اولی سئیں روچ پر گوست اَنت ۔ عالیہ آتا گڈی ساعتا انگت گشت کہ من نہ گرآں اے مردا۔ چیاکہ آئی آوتی دل پہ دگرے آبستگ اَت و اے مرد کہ آئی آزندانہ دیستگ اَت پہ آئی آہرپیما درامدے اَت گڈی آچوں ہم گشتے اگاں شما منا رادئت یے من وتاکُشاں بلئے پدا ہم کسے آدلگوش نہ کُت ۔ پہ زور عالیہ سبئمینگ وبانور کنگ بوت۔ بانور بشانگ آ نندا رینت اِش پہ سالونک ئے ودارا سالونک سرشپ آاتک نکاح وانینگ بوت وسالونک لوگا آؤرت اِش۔
شپ کہ دیما جنران بوت مردم دروایک یکا درکپت اَنت وگڈی آسرگوپ ہم دراتک۔ نوں گشئے آزماں عالیہ ئے کو پگاں کپت ۔ یک زندگیں جونے ئے درورا تہت ئے سرا نشتگ اَت ۔ اے بانوری بشانگ گشئے چودوزہ ئے آسا آئی ئے جان ئے ہررگ وبنداں آس دیئگااَت۔ شپ دیمتر ا گام جناں بوت۔ یک پاسے آسالونک پہ آپ دستے آڈنّا درکپت تہ عالیہ دروازگ چہ توکا کڑی کُت وتی سہگریں اروا ہے گٹ گیر کُت ۔ بوٹ کشیں زہرے آپ کت وجوانیں گلاسے تنگ اتے۔پدا تہت ئے سرا تچک بوت۔ سالونکاسما کت تہ لوگ بنداِنت۔ دراجیں مدّتے آودارے کت گڈ سر امجبور بوت۔ عالیہ ئے ماتے گوانک جت ۔ دروامچّ بوت اَنت ۔ وھدے دروازگ بازیں ٹکگاں پچ نہ بوت تہ دروازگ اِش پروشت ۔ ہر گورا یکیّں کوکارمچ اِت ابڑے ماتی من نہ بوتاں ۔ بلئے نوں چے پشت کپتگ اَت۔ عالیہ وَ سہگریں دودانی دیمپانی آعوضی ئے ارجان شتگ اَت۔ بس یک بانوریں جونے بشانگ ئے تہا تچک اَت۔
گشئے گوں ہے حبراں کریم ئے ھاٹیگ ہم ہلاس بوت ۔ زبانا جواب دات۔ گوں گلگلیں ارساں دگہ سگرٹیے بنے دات ۔ پداترماس ئے آپانی پٹ پٹ ئے توار وسگریٹانی دوتاں کمرہ ئے خاموشی وبے رنگی ایرکش اَت ۔