نہ پروشاں من اے دیوالا ۔۔۔۔۔۔۔ زاھدہ رئیس راجی

گمان ئِ ساھگ ئَ نشتگ ، پدا ستک ئَ شُھازیگاں
ھما ستک ئَ کہ مہر ئِ سرزمین ئِ پھَر بندوک اَت

امیتا نااُمیتی ئِ سپر وَ دیریں کُٹینتگ
نزاناں چہ کجا باریں
دری گواتا کلوھے پمنا گون ات کہ بیا مرچی،
تئی بے آزمانیں سرزمین ئِ کینگ ئِ کوشا
اجب یک جارے پرینتگ
کہ تئی بُن پیروکی ھند ا
مروچی مہرئِ ڈکال انت،
تپاکیں ھمبلاں دژمن،
درآمد ماں دل ئِ توکا،
گلامیں پگر ئِ واجہ ئی
سما وسد ئِ ڈکّالی
تپر بے دستگ ئَ زرتگ
روان انت رونگراہاناں
ھمک ھند کہ چم شانک ئے
بہ گندئے دردئے سرھال انت
نگیگیں مہر ئِ اھوال انت

”اگاں زورئے منی گپاں!
وتی اوستانی دیوالا
یلا دئے بیا منی ھمراہ
نہ گندئے کینگ ئِ آسے ،
نہ گندئے کست ئِ کاٹارے
کہ دنیا ئِ بہشتا
زندمان ئِ داب نوکین انت“

دمانے ھُشک ئُ ھیرانی ،
دلا گوں ترکگ ئَ جیڑات
ستر آھنڈ لرزان انت، منی اے مُھریں دیوالے
نہ پروشاں من اے دیوالا
کہ اے دیوال ئِ پُشتہ زندمانئے
واب، آگاہ انت