Sangat Academy Monthly Sangat Quetta
واب دزگیر نہ بنت
واب گٹگیر نہ بنت
واب آزاتی و واب وت وا جہی
واب وت واکی ئے اوست ئے گنجیں چراگ
واب باندات ئے وشیں مرادانی باگ
واب مثلِ سُہیلا سباہاں تُرپنت
واب چو روچ ئے برانزاں تواناہ بنت
واب چو ماہکاناشپاں روک بنت
***********
واب کہ دیستگ انت گوں پچیں دیدگاں مردماں
واب کہ ماسگاں بستگ انت مکہیں مادراں
واب کہ سینگاں مُشتگ اَنت مئے یلیں پُسگاں
واب چو جمر ا مئے سرا ہور گواران بنت
واب چو گواڑگا سمبہنت راہسراں
واب کہ حون بنت
واب راہشون بنت
واب زندئے لد اگوں منا گون بنت
واب زندگ بینت
واب چیدگ بینت
واب کہ جہہ جننت
واب رخشان بنت
واب کیچ ونہنگ ، دورسریں لشکرنت
واب نیلیں زراِنت
واب زرین و باتیل و کوہیں تلار
واب بولان ئے دستار ، شان ومڑاہ
***********
واب ماتیں زمین
واب سُہب ئے سمین
واب دردانی درمان زند ئے مراد
واب زردانی ارمان عہدانی یاد
واب رژن ئے چراگ اَنت تہار ماہی آ
واب کشک مادنیں بنت رُنگراہی آ
***********
واب بندیک نہ بنت سانکلاں محکمیں
واب دارگ نہ بنت سیمسراں وت گڑیں
واب پاہو نہ بنت
واب گُڈگ نہ بنت
واب ماننت مدام
واب دزگیر نہ بنت
واب گُٹگیر نہ بنت
