شوکت توکلی

دل مئیں رغامی سمبری
اْچھال کھن چھو سانوڑی
کپتہ گروخاں چیچرے
آزماں شیئغیں ھنگری
بُتکامئیں جانا لڑزغے
سوچاں کھناں بے لیکوی
روح پھِرْکی بال گِفتغیں
گوئنڈیں تِلے سرپد نوی
ھیران ھْشکا جکثغیں
بْت اے چھڑوئیں پدھری
کڑکار نفتاں کھفتغیں
دنہوں کھڑو بں سر بْری
جیہر شہ بْڑزا سمبراں
آو ریش کھناں بے لیکوی
ہینژاڑ لہڑاں رْستغیں
دڑی آں جنغاں واچھڑی
مئیں چودھار آفاں بیڑثا
بَل خلقت دْرانہیں تھنسوی!!۔
ورنا وثی شوقے تھلا
ڈیراں کھنغاں ڈیہڑی
چھْک بوجھلی ایں درکفاں
ارماں بھْرنت ماث و پِثی
بھا گیا دِلا را سوچغنت
میہڑ برانیں کہچری
بل سنگت منی بْت لاغریں
دڑداں برغاں کاشری
کیفاں جثغاں چابْکے
لانچاں من زڑدیں دیغری
دِل دا دلیلاں گیشتری
گْشی گبھرو توپاگل موی
سفکیں تھو گاماں ایر کھن
اے بْڑزغ تھرا سودغ نہ بی
ڈغارا تھو بیجا ریشغئے
تئی گیشترا کانڑی رذی
ھچو وثار تانواں مکن
سرو کْھٹغے آ جوھاں نوی
ٹانڈا کْل گچیں سْختغنت
تئی آھاڑ کھِڑدیں کلری
کھیلغ لِواراں جھمبثا
ڈِغارے شتا سیکل بْنی
دِل چھِکثو سرپد کثوں
مے آپتی جھیڑو نوی
اے ھورا پذا من ایلی کثہ
مْرگہ رواں دانہی کھناں
بْتے چھڑوئیں مئیں گْریں
پڑتہ من ماندہ بیثغاں
پر من تہاریں ھر گْرے
دیذغ مئیں دنزاں گِفتغاں
سنگت گْشغتوں بودلہ
روش و شفیغا پِٹغاں,
روخیں یک آسے مِرمِریں
تئی مھرئے چری آ تِڑکغاں
دِل بے دْھریں گاریں گْرے
تئی وزتاں نارینتھغاں
ساہی نیئے ثوں یہ تِلے
من دوروخہ بھیرا کھفتغاں