مردم استال انت لہتے سِد انت لہتے تِر پنت ۔۔۔ حنیف دلمراد

زند زانتی ارزانیں کار ے نہ انت ہمے وڑ ا عبداللہ جان جمالدینی ئے زندئے سراہم گپ کنگ ارزان نہ انت واجہ جمالدینی ئے زندئے ھرچ سال یک نوکیں تاک ئے رنگا انت، آنہی علمی وسیاسی جہدا مزنیں اثر ئے دور داتگ ؛ چونائیا ہم گوشگ بیت کہ ہرچ دور وتی مردما وت پیداک کنت ۔ گوست و استpast and present ئے تہا سیاست،ادب،ہسٹری، سائنس و علم ئے اے دگہ پِڑاں ہرچ کسے کہ دیما اتکگ آہمادورئے پیداور بوتگ انت ۔او چونائیا اے گپ ئے گیشنگ ہم سک گران انت کہ است ئے تہابیوکیں عمل چنکدر نفاانت ایشی فیصلہ ھما وھد اکس کرت نہ کنت، ادا چو گشگ گپا گیشینت کہ است چو تچوکیں ہارئے وڑا انت ، کہ آپہ کسا نہ داریت ،کسے کہ دیما کئیت آ ملانا گوں وت بارتی ،ھمے وڑ راجدپترئے تہا مزنیں جیڑہانی تہا یکے ہمیش انت کہ است ئے تہا بدلی کئے کار ایت؟بزاں وھدیافرد۔
اے جُستئے پَسّو ھر چاگردا وتی رنگاداتگ۔اے درگتا یک علمی ٹک ئے گشگ بیت ھمیش انت کہ نفرئے کردمزن انت او دومی نیمگا یک دگہ فکرے ھیال ہمیش انت کہ وھد وزمانگئے تہا واکیات ارزش دارنت۔اے ہمے واکیات انت تیوگیں دنیائے جیڑہ و جنجالاں بدل کن انت۔ یک نوکیں دنیا یے وجودہ کئیت، بلے اولی فکر داروکیں مردمانی ھیال ھمیش انت کہ ھالات ھمنچک ہراب یا تیار بہ بنت اگاں ھما دور ے تہا ٹوئیں مردم نیست گڑا ھما ھالات ھچ درد ئے نہ انت پرچا کہ ٹوئیں مردم ھالاتا زورنت وبدلی پہ جہد کن انت، بلے ما اے درگتادوئیں فکراں رَد کُرت نہ کنیں ۔
گوادرا سرجمیں مروچیگیں اے دیوان ہم یک فرد ئے درگتا برجم انت کہ آ فرد واجہ عبداللہ جان جمالدینی ئے ناماچہ زانگ بیئت انت۔ بزاں اے دیوان فردئے کردا را ساڑاھگا پہ برجم انت۔ مردم ئے جہدوقربانیاں رند اے گپا را منگی المی بئیت کہ فردئے کرد مننگی ہژدری انت اے راست انت کہ ابید فردئے کرداواکیات ارزشت نہ دارنت۔
عبداللہ جان جمالمدینی ئے جہد ستاہ کرزنت آ نہ ایوکا یک سیاسی جہد کار ے بوتگ بلکیں آنہی علمی جہد ے ھم است کہ آئی تہا کتابانی مزنیں لڑ ے است۔ واجہ عبداللہ جان جمالدینی ئے کتابانی تہالٹ خانہ،اُوپار،بلوچستان میں سرداری نظام وتی مٹ وت انت ۔ ایشانی وانگاچہ آنہی علمی کچ و کساس دیما کئیت بلے جمالدینی ئے درگتا دگرانی نوشتہ بوتگیں کتاب و نبشتانکانی وانگاچہ آنہی جوانیں کرد ئے سما کپیت۔ آنہی جند چے نام دئیگ بہ بئیت ایشی ئے پیسلہ وت زمانگا کرتگ۔ اے زانگ ہچ وڑ گران نہ انت کہ واجہ جمالدینی شگربی دَمگ ئے دانشور،ادیب و سیاسی جہد کارے ، بلے اگاں عبدللہ جان جمالدینی دیمرئی کرتگیں چاگرد ا ببوتیں گڑا الّمامروچی آنہی فکرو فلسفہا چہ مزنیں رہشونی یے زورگ بوتگ ات۔عبداللہ جان جمالدینی ئے کتاب لٹ خانہ ئے وانگا چہ انچو سما کپیت کہ بلوچاں وتی وِل ڈیورانٹ دست کپتگ ۔بلے اے وِ ل ڈیورانٹئے راہا کئے روت ایشی توار و جاکاں کئے سرپد بہ بیت ۔
ہما دور و باریگاں کہ عبداللہ جان جمالدینی گوں وتی دوست و ہمبلانی ہمرائیاوتی علمی و سیاسی جہد ا دیما برگا ات آ دور یورپئے نشاۃِ ثانیہ ئے رنگاجنت کہ انچوش سماکپیت بلوچانی نشاۃ ثانیہ بندات بوتگ، کہ یک ہُبّ یے آگوں ورنا دیما روگا انت۔ اے وڑیں امیت سک باز کم دورا گندگ بوتگ کہ مردماں وتی سیاسی و علمی فکرئے پشتا وتی سرکاری کاعہدہ یلہ کرتگ انت بلے عبداللہ جان جمالدینی اوآنہی سنگتاں اے عمل کُرتگ۔ عبداللہ جان جمالدینی آ وتی سرکاری افسری یلہ کنان اوپہ وتا شد ئے راہ گچین وپہ مہلوکئے بانداتئے وشھالی ھاترا وتی جہد دیما برتگ ۔ واجہ نہ ایوکا یک سیاسی ،ادبی و عالمیں مردے بوتگ بلکیں آ یک نفیسیں انسانے ہم بوتگ کہ آنہی جمالیاتی ذوق ئے سماچہ ادا کپیت کہ آوتی کتاب لٹ خانہ ئے تہا وہدے کراچیا چہ کوئٹہ ئے روگئے کسہاں نوشتہ کنت گڑا آ کراچیاچہ بندات بوتگیں سفر ئے تہا باگچہیں ملیر ئے میرزیں ڈگار و سر سبزی ئے ہم کسہاں کاریت و گشیت کہ ملیر ئے ندارگ ستا کرزنت ۔ مئے ریل وھدئے ملیر ئے دمگا سر بوت گڑا ملیرئے ملگزاریں باگانی ندارگ سک وش ات انت ، واجہ عبداللہ جانا بزاں ندارگ Nature ہم سک دوست بوتگ،
2006 آما وہدے عبداللہ جان جمالدینی ئے گساپہ گندوکی شتیں گڑا ہمے دیست کہ آویل چیئرئے سرانندوک انت او مارکسی فلسفہ ئے سر انوشتگیں کتابے آنہی دستاانت او وانگاانت ئےِ۔اے منی گوں واجہا اولی گند ونند ات ، واجہ جمالدینی آ گوں ہُبّ و واہگا گپ جت، آنہی اُمیت پوریاگر و نودربر اتنت آنہیاچہ ھمیشاں مزنیں اُمیتے است ات ۔ آنہی گشگ ات کہ مہلوک ئے جنجال شُد انت بے وانگی انت او پدمنتگی انت ۔آ قبائلی نظام و ٹک و ذات و زُریاتئے سک ہلا ف ات او قبائلی فکر ایر جت ئےِ، ما گوں سنگتاں واجہ ئے دیوانا چ آئی گپاں سیر نہ کُرت، عبداللہ جان جمالدینی عمل ئے یک نامے ات۔ وہدے آنہیا بلوچستان یونیورسٹیاموہ رست گڑا پروفیسر کرار حسین و آنہیا ہواریابلوچستانئے ورنا اوزالبولانی دیما برگئے جہد کُرت ، وت گلا ئی و موقع پرستی ئے دنیاآچہ دور یک نوکیں دنیا ئے شوہازادرکپتگیں عبداللہ جان جمالدینی کمیونسٹ پارٹی ئے باسک وآہانی زانتکارانی ٹولی Intellectual Group ئے تہا بوتگ ، ثانیہ سعید ئے آرپیں پت منصور سعید پی ٹی وی ئے گوستگیں چیئرمین اسلم اظہر ئے ہمرائیاجبار خٹک ،زدران،احمد سلیم و دگہ ھم واجہ ئے ہمراہ بوتگ انت ۔
عبداللہ جان جمالدینی یک تحریک یے بوتگ و آ تحریکئے چست و ایر مروچی راجدپتر ئے بہرے جوڑ نت بلے آہانی زھمت و جہد ا چہ بلوچستانا ر علمی بُنیاتانی سرا سیاسی راہ وراندانی گیشنگ ئے سکین ے رستگ ما ہچ وڑاے گپا شمشت کرت نہ کنیں کہ عبداللہ جان جمالدینی و آئی سنگتانی بندات کرتگیں لٹ خانہ تحریکئے برورد رَندا بلوچا وارتگ انت، بزاں سیاسی نف چست کنوک بلوچ وت بوت، اے وڑ عبداللہ جانئے علمی جہد بے ھچ نہ انت،
اگاں عبداللہ جان جمالدینی بنداتی دورا فرانس ئے بنداتی دورا گوں ہم دپ بکنیں گڑا ہچ وڑ دروگ بند نہ بئینت پر چا کہ فرانس ئے بدلی ئے پُشتا ہم ژان ژاک روسوؔ ئے فکروُ فلسفہ و راہ بندات انت۔انچوش کہ بُرزاہمے گپ جت کہ ہما دورئے تہا ہما عمل ئے یاھما عمل ئے رانام دات کرت نہ کنیں او ایش یے گیش و گیوار مشکل انت کہ کنوک چے کنگا انت اوھمے دور کجام انت او نامیے چی انت ۔ہمے وڑ عبداللہ جان جمالدینی گوں وتی ہمبلاں بندات کُرتگیں عمل ئے ہم آہاں وت نام دات کُرت نہ کت بلے رَنداآنہی وتی سنگتاں ہمے عمل نامے دات ۔بزاں لٹ خانہ نامدار بوت۔ پدا گپ است ئے تہا کئیت کہ است چو تچوکیں ہار ا انت کہ کسے فیصلہ دات کرت نہ کنت کہ جہد ئے آسر چے درکپیت، بلے نزیکیں گوست بزاں ماضی قریبا مردم نہ ایوکا سرپد بیت بلکیں گیش و گیوار ہم کُرت کنت کہ کجا روگی انت ؟۔پرچا کہ اہلِ علم و دانش راہئے شونا دنت و اے نوں چاروک و ہمراہانی سرا انت آ ئی ئے میم چون انت۔ اگاں میم کُنٹ انت گڑا اے اہلِ دانش ئے میار نت، میار ھما میمانیگ
انت کہ کنٹ انت۔
مردم سک باز انت بلے ھما مردمانی کساس چہ اے دگراں کم انت کہ آ پہ اے دگہ مہلوکئے وشیں زند ئے ھاتر ا جہد کن انت انچوش کہ استال ھم سک باز انت بلے لہتے استال سِد انت، لہتے تا کیامت تِرپ انت۔ عبداللہ جان جمالدینی ہم چہ ھما تِرپوکیں استالاں یکے کہ آنہی روشنائیا چہ مدام مہلوکا را راہشونی رسیت۔