سی” ئے سیاہگ ۔۔۔۔ بورخیس/ حفیظ رؤف”

اسل سیاہگ لیڈن مزن یونیورسٹیا دست کپیت۔اے لاطینی زبانا انت۔بلے اشی ئے تہا یونانی گیدی لبزانک ئے ہتیں شری ئے بوہگ ئے سوبا اے گشگ بوت کنت کہ اے چہ یونانی زبانا رجانک کنگ بوتگ۔’’لیس گانگ‘‘ ئے گشگ ئے ردا اے چارمی کرنا نبشتہ کنگ بوتگ ۔وتی کتاب’’کمی و زوال‘‘ ئے پانزدہمی درا گبنا اشی باروا کمے گپ جتگ۔سیاہگ ئے گاریں نبشتہ کار نبشتہ کنت:
’’………. اے راہا( مَسلک) ہچبر ردوم نہ زرتگ۔اشی ئے منوک سک کم انت۔آسا دور دیگ ئے سوبا یا زحم ئے سرا اشانی بازیں مردمے کشگ بوتگ۔اے کجام اوں جاگہے آ وپسنت اے پہ وتا لوگ و جاگہ بست نہ کننت۔اے جنگانی زمانگ ئے پرشتگیں جاگہاں نشتگ انت۔ برہنگیا سفر کننت۔اے وَہما گپ انت کہ درست ئے زاننت۔منی مول و مراد درائیں راستیاں ادا نبشتگیں رنگے آ پہازگ انت کہ پہ اے راہا ایمان آرگ و دودو ربیدگانی بابتامن دیستگ انت۔من اے راہئے نیکراہی راہدربراں گوں گپ و تران کتگ،بلے آہاناں وتی نیکراہئے نیمگا آرگا من سوبین نہ بوتگاں۔
اے راہ ئے باروا ہما بنداتی چیزا کہ منا وتی نیمگا کش ات آمردگانی باروا آہانی منگ ئے وڑ وڑیں گپ اتنت۔مثال ہبرا اے راہئے لس منوکانی گشگ انت کہ مرتگیں مردماں کپن کنگ ئے بزانت انت کہ آہاں آہانی ارواہانی دستا دیگ۔ہما کہ اشی ئے نہ منوک انت آہانی گشگ انت کہ عیسیٰ مسیح ئے اے سوج’’کہ مردیناں وتی مردگ ئے کبر کنگابل ات‘‘ایشی ئے بزانت انت کہ آکبرو کپن ئے باروا مئے شاہی دوداں چہ وش نہ ات۔
اے راہئے منوگر ہمے سوج ئے سرا سرجما اوشتیت کہ ہرچی کہ کسے ئے کرا است آنہیا بہا کن و نیزگارانی سرا بہر وبانگے کن ۔ہما کہ ازگاراں آچہ وت نیزگاراں بدیاں،و ہما کہ نیز گاراں چہ وتانیزگار ترے آ۔اے ہسابا اگاں چارگ بہ بیت گڑا آہانی شدو برہنگی ئے سوب پدربیت۔اے چیز آہاں جنت ئے آدما گوں نزیک تر کنت۔
پہ گل آاے گپا جننت ’’گواتا بالیں کوہی گراگاں بچارت۔نہ اے زمینا وتی توما چنڈنت و نہ اے پلانی رنگا پاد کاہنت۔نہ آساہگ جوڑ کننت و نہ کدوہے ۔پدا اوں شمے آزمانی پت اشانی ورگ و چرگ ئے ھیالا دارگاانت۔شما چہ اشاں گہتر نہ ات؟‘‘۔اے وتی ایمان ئے سوبا ہر نپاچہ پد کنزنت۔ اگاں ہدا زمینا سبزیں پوشاک گورا دنت۔کہ اگاں مرچی است انت،باندا آسا کنگ بیت،گڑا شمارا پوشاک نہ دنت۔بے ایماناں ہچبر اے مہ جیڑات کہ ماچے وریں؟یا مارا پہ تاما چے رسیت؟‘‘۔
اے راہ ئے یک منّگے ایش انت کہ’’ ہما مردماکہ جنینے پہ بدی چارت،تہ آنہی بزانت ایش انت کہ آنہیا دست جنگا پیسر ھیالانی تہا آزوال کتگ‘‘۔اسلا اے پہ انسانی ننگ ئے پہریزگا تچکیں سوجے۔اے راہ ئے اے وڑیں منوگر اوں کم نہ انت کہ آمن انت کہ اے دنیاآ اگاں اے وڑیں مردمے است انت کہ آنہیا جنین پہ بدی چارات تہ بزاں نہ ایوکا آنہی بلکیں درائیں انسانانی دست اے زوال کاریا مان اِنت ۔بدی ئے واہش دارگ بدی کنگ ئے وڑیں مزنیں گناہے۔یک انسانے ستر کہ ہچ مہ کنت، بلے واہش ئے دارگاگوں یک مزنیں بدکاری ئے نیمگا شت کنت۔
اے راہ عبادت جاہانی سرا ستک نہ داریت۔اے راہ ئے تبلیغ کنوک کوہ ئے سرا ،دیوالے سرا یا بازیں برے تیاب دپا اوشتاتگیں یکدارے آ اوشتیت و وازکنت۔
اے راہا نامئے باروا یکوئی گپ جنگ بیت وبازیں ھیالے دیما اتکگ۔انچیں یک گپے ئے ہسابا اشی ئے نام منوکانی ہمے کساسہ نیمگااشارہ کنت کہ انوں پش کپتگ۔اے گپ کندینیت۔بلے اشی ئے تہا یک ہسابے پیش گشی اوں است انت کہ اشی ئے منگانی تہا ہمنچو پشتا برگی گپ مان کہ گڈیا یکروچے اے راہا ہلاس بوہگی ات۔اے وڑ اوں گشنت کہ اے نام نوح ئے یکدار ئے برزیا گوں ہمگرنچ انت کہ سی’’کیوبٹ‘‘بوتگ۔اے گپا اوں جننت کہ اے یک قمری ماہے آ شپانی ہساباایرکنگ بوتگ۔بلے اے کہنیں ہبر نوکیں رنگاگوں ہچ وڑا دپ نہ وارت۔لہتیں چواوں گشیت کہ ودی بوہگ ئے ساہتاعیسیٰ مسیح ئے عمر سی سال بوتگ۔ لہتیں چو گشیت کہ اے آدمئے ہماسال انت کہ چدو پدآزمین ئے سھریں ہاکا چہ چست کنئگ بوتگ ات۔ اے درستیں گپ سرجمیا ردنت و ہمے وڑا اے سی ایں دیوتاہانی سریا تختانی لڑ ئے کسہ اوں ردانت یک دیوتایے ئے نام ابراکس انت۔اے دیوتا ئے سرمُرگیگ انت،باسک و بدن انسان ئے و پشتا یک پتاتگیں مار ئے وڑیں دمبے لونجان انت۔
راستی ئے دیما آرگ ئے بے ہسابیں بودشت منا مان نیست۔بزاں من یک انچیں مردمے آں کہ راستیا وَ سرپدنت،بلے گشت ئے نہ کنت۔پہ منا نیکراہی نوکیں دودے کسہ کنگ بس انت کہ آنہی سرا مردم زہر درشان بکنت۔لبزا را گوشت و پوست ئے بدنے دیگ بوتگ کہ آ ایندگہ انسانانی وڑا یک انسانے ئے شگلا وتارا کت بکنت ووتارا بہ درنجائینیت ہدا ئے است بوہگ ئے گپا بہ جنت و پدا ہمے ہدائے دستا آسودگ بہ بیت۔اشی ئے بوتن گچین کتگیں جنینے ئے لاپا چہ بیت۔نہ ایوکا پہ مہرئے وازکنگا بلکیں پہ شہیدی ئے درجگ ئے رسگا اوں۔
اے المی انت کہ کسہ وتی ہسابا توسیپ ئے لائک بہ بنت۔یک مردمے آرا زحمئے لگگ،یاپیالہے پُریں زہرئے ورگ و بیران بوہگ،اے انسانئے دماگا پہ وہدئے ہلاسی ئے نیمگا دلگوش گورکنائینگا بس نہ انت۔بزرگیں ہداآ چیزاناں انچیں وڑے آ گیگ و گور کتگ و ایر کتگ۔اے چیز یک ہسابا ہدا ئے جندا پدرکننت۔یسوع مسیحئے ہبرانی کہ آہانی تہا رازانی پدر بوہگئے پیش گشی بوتگ ات۔وتی دوستانی تہا یسوعئے یکے ا مدامی ڈاہ دیگئے ،نان و شراب ئے لزت ئے ،درچک ئے قولانی،دوازدئیں دوستانی واب بوہگ ئے ،ہدائے بچ ئے انسانی دعائے، ہید گونگیں حونئے، زحم ولٹانی بازی ئے ،بے وپائیئے بوسگ ئے ،یسوعئے دست شودگئے کاریچ ئے ،چابک جنئگ ئے، شگان و بد ئے ،کنٹگانی تاج ئے ،سہریں رنگ ئے قباوشفیلی( بانسری گونگیں عصا ئے ،زہریں انگور ئے ،کوہئے سراجتگیں صلیب ئے ،پشلیں دزاگوں کتگیں قول ئے ،لرزوکیں زمین و زمین ئے سر اتالانیں تہاروکی ئے۔
گیبی کمک ئے سوبا منی تہا اے بودشت اتکگ کہ اے راہ ئے اسل و چیریں سوبا دربگیجاں کیری اوتھا ،ہمودا کہ اے راہ ئے انوگیں رنگازائری بوتگ۔نہ منوکانی یک مجلسے است انت کہ آ’’سی سکہ‘‘ ئے ناما نامدارنت اے اشی ئے بنداتی نام انت کہ چہ اشیا مارا اسلیں جیڑہئے نیمگ رؤگئے کمک رست کنت۔یسوعا صلیبا درنجگ ئے اے ڈرامہ آ(من اے گپاپہ عزت درائیں پاک و پلگاریا دیماکناناگشگاآں)لہتیں ازمکار پہ زانت ولہتیں پہ نزانتکاری ہوارت،بلے درستانی ہوار بوہگ المی ات۔پہ نزانتکاری ہوار بوتگیں ازمکار پادری اتنت کہ آہاں نگرہئے سکہ دات۔نزانتکاری ازم کار ہما مچی ات کہ آہاں بارا باس ئے باروا جست کت۔نزانتکاری ازمکار یہودا ئے حاکم ات۔نزانتکاری ازمکارانی تہا رومئے سپاہیگ اوں ہوارتنت کہ آہاں پہ یسوع مسیح ئے درنجگاصلیب مک کتگ ات ۔آہاں میہہ ٹکتنت یسوع مسیح ئے پوشاکانی زورگئے ہاتر لاٹری کت۔زانتکاری ازم کار ایوکا دواتنت۔آسودگ کنوک و یسوع مسیح۔یسوع مسیح آنگرہئے سی سکہ دات کہ آسودگی ئے کیمت ات و وتارا درنجائینت ئے۔آوہدی آنہی عمر یک انسانے ئے ہسابا سی و سہ سال ات۔راہ ئے درائیں ازمکار عبادت کرزنت۔پدا اوں ایندگہ درائیناں پہل کنگ بیت۔پرچا کہ گناہ کار ایوکا یکے نہ انت۔مردم پہ زانت یا نزانتی اے گیبی اگل ئے جوڑ کتگیں کار ئے یک بہرے پمشکہ اے مزنی ئے تہا درستانی بہر مان انت۔
دگہ گیشیں بد بریں ہبرے ئے نبشتہ کنگا منی دست لرزنت۔وتی پیرینانی رندا روان اے راہ ئے منوگر گیشتگیں عمر ئے رسگاپد وتا رزوائیا سرکننت۔ و کوہئے ٹلا گوں میہاں ٹکگ بنت۔ہدائے پنچمی حکمئے ہلاپارؤگ کہ لائک سزاانت۔درائیں ترندیا گوں کہ انسان و گیبی قانود ئے راہبندانی گڈی حد و مول و مرادنت۔وتی آسرا بہ رسیت۔درائیں انسانی عزاب،پرشتگ ئے کینگ………….‘‘
ادا اے سیاہگ آسر بیت چد و گیش سیاہگ دست نہ کپتگ۔