گوجُکُ ۔۔۔ گوہر ملک

استت، اَستت یک مَردے او جنے۔ایشانا زھگ نیست ات۔ ہرچی کہ پیرِ او ملاّ دم و دُوت ، علاج و درمان او داروھش کُرت بے پائدہ۔یک روچے مَرد شُت او چار راھے ئے سرا و پت۔ ہر کس کہ آھت گشتے لگت دئے او بگوئز ۔ مَردم، اَسپ ،اُشتر گوک او پس او ھر سوار او پیادگ درست لگتے داتنت او گوئستنت ۔چُنت روچ ، مَرد لگتانی چیرا کپتگت ، کہ یک روچے یک ملنگے شمے راھا آھت ۔ مردا را دیست گشتے دُور اچہ منی راھے سرا۔ مردا گشت درست لگت دہینت او گوزنت تو ہم گوں اَما وان۔ ملنگاگشت آوانی ہبرے دگر اومنی ہبرے دِگر ۔منی یکیں ماتی لُنککُ ئے زور ا تو سگت نہ کنے۔ مرد ا گشت تو لگت دے باریں‘‘، ملنگاوتی پاد ئے ماتی لنک مرد ئے سرا اَنچو ھاں ھیر کُرت مرد ا پریات کُرت او پاد آھت او نشت۔ ملنگا جُست کُرت کہ پرچہ چار راھے سرا و پتگے؟۔ مردگشت چہ بے اولادی ئے دردا۔ہرچی کہ دارو او دوا پیر او ملا کُرتن منازھگ نہ بیت۔ ملنگا وتی لٹ مرد ئے دستادات گشتے اے لٹا بزور برو آکوھے پشتا یک سوپ ئے درچکے۔ لٹایک برے جَن یک سوپے کپت کپّے وت بور کپے وتی جنا بدے۔ دوکپت یکے وت بوئریکے جنابدے۔ اگہ ہچ نہ کپت گڑا بزاں کہ خُدا آ تئی قسمتازھگ مان نہ کُرتہ۔
مَرد الٹ زُرت او کوھے پشتاشُت ، تانکہ سوپ ئے درچکے کہ چہ سوپا جُل اِنت، اللہ ئے نام ئے گپت لٹ ئے جت سوپ ئے درچکا را۔یک دانکے سوپے کپت ۔مردچہ گلابال بُوت۔ سوپ ئے چت لٹ ئے ذُرت ہلگر کنانا آھت ۔لٹ ئے ملنگارادات او میدان میدان گسا آھت او چہ ڈک ئے دپا توار ے کُرت کہ اونیک بخت خدا آ منی او تئی توار اُشکرت ۔سوپ ئے کپ کرت یکے وارت او گشتے بزور اے سوپ ئے کپا بور ۔جنا گشت ترا بزہ کار چُنت روچ اِنت کہ لنگڑ او دل آپ چار راھے سرا کپتگے۔ بوشت کہ ترا آپ او تام بکنین ۔ سوپ ئے کپ ئے چہ مرد ئے دستا گپت او پیٹی ئے سرا ھیر کُرت ۔ اَمیشی تہا شنکے بیا او سوپا دپا کن او بُر تگے۔ مرد تانکہ شنک ئے گپت او دستا دپا ئے سی دات او سوپے چنڈھکے کہ پشت کپتگت درے کُرت او جنا را چا نپٹے من سرا جتے او سُوپ ئے چنڈگے دپا دات۔
قدرت خدا ئے ماھے آ رَند جنے لاپ پُر بُوت۔ مرد او جن سک وش او گُل اتنت۔ مردا گوانزگے گپت جنا بوپک او تو لک دو تک۔ کلمیر ئے پُھل کُرت ۔دراج بند او پتن بند ے شر کُرت ۔ پہ ننو ئے نا پگ ئے بُرگ ئے بندیکے انگہ تاب دات او ھیر کرت۔ گُدو جا مگ او پٹی ئے من بکچہ آکُرتنت۔ آخرنہہ ماہ او نہہ روچ او نہہ ساھت پُورہ بوتنت، جنین دردان بُوت سیاد او ہمساھگان او مردا حال دات۔ دینہ بو آہت ۔ مرد نوں گل انت دلا گشتئی جنکے بیت اگہ بچے مناں قبولیں۔ امیشی تہا دیستئی تانکہ دینہ بوگوں دو سئے جنینا تچانا چہ گسا درآھت انت۔ مردا توار کرت چے ئے جنکے کہ بچکے ۔ دینہ بو آ گشت شوم نے جنکے نے بچکے ۔گوجے۔ مرد ئے دلادرکارگے جت۔ گوجااَنچو کہ چہ ماس ئے لاپا لِترت شُپرتگا برونکے چیرا پُترت۔دینہ بُوگوں دِگہ جنینان دُرست ترستنت او جست و شتنت ۔ ماس پدا ماس اِنت اولاد ہر چوں ببیت ماسا دوست اِنت ۔نہہ ماہ لا پائے کِنت پہ دردو تیرونک پیدا ئے کنت۔ ماسا توار کُرت ’’گوجُک بیا ترا گوانزگا واپینین ،ترا میشینیں او بندین ،برونکے چیرا تر ا سردی ئے جَنت ۔ ماس ئے بازیں مِنت او لیلاھاں گوجک آھت۔ ماسا گپت سُرمک او مور کُرت گدانی تہا مشت او بَست او گوانزگا واپینت۔ دیرا مرد ا سیرکشّت او جست ئے کُرت‘‘ ھاں؟ چے ئے ؟؟
’’گوجے دِگہ چے ئے ۔ہرچی کہ مئے قسمت ‘‘۔ماسا گشت۔
گوجک مزن بُوھان بُوت ماس او پس ئے دیما وڑوڑیں حرکت ئے کُرت او آ او وش بوتنت او کھندتنت او گپت او بگلائش کُرت ۔
یک روچے ہلک ئے جنک کُوچگا پہ بہار ئے چنگا شُتنت ۔گوجُک ہم شُت گوں ۔جنکاں بہار چت ۔گوجُک اِے سُولُکئے بنا پُترت او اَچائی بنادرآھت ۔جنکاں وتی دسمال چہ بہار کھا آ پُر کُرتتنت او ہلکا سر گپتنت۔ گو جکا توارش کرت کہ گوجک کایئے بیا، نیایئے ماشتن۔ گوجک چہ جِر او بُونہائی بُنا درآھت گشتے اَلّے منا ھچ گون نیست من وتی ماساچے بدھین ۔منا درست مُشتے مُشتے بہار کھا بدھت ، جنکان گشت پرچہ ماوتی آں ترا بدین۔ آوھد اترا ما سے حیال نہ آھت ، نوں میگاں پچ گرے ۔ گوجکا گشت دیئت بدیۂت اگہ نہ تومن شمے تہا پئترین ہریک جنک ئے دامن ئے چیرا پُترت جنکاں پر یات کُرت کہ اِنہ اِنہ بُزور مشتے ۔درستیں جنکاں مُشتے ،مُشتے کاھک دیاں کرت دسمالے تہائے بَسنت او دسمال ئے لٹِکا بست ، دیم پہ وتی گسا۔ آ چہ جنکاں او ساری تچان بُوت ۔انچو کہ گسا پُنڈتِ گوئشتئی ماتی ، ماتی کُٹ ئے پاچ کن ۔ماتا وتی کُت پچ کُرت ۔درستین بہار کھا ئے ماس ئے کُٹا مان ریتکنت۔
یک روچے بادشاھے جنک گوں وتی گہاراں پہ جان ئے شودگا وش آپ ئے چمگا شُت۔ گوجُکا اَچاوان ساری وتا یک شَرّیں او ڈولداریں پیٹی ئے کُرت او چمّگ ئے سرا ھیر کُرت۔ بادشاھے جنکا کہ ڈولداریں پیتی دیست گشتے بیا اِنت وتی جان ئے گُدان سَہت او زیوران ھمے پیتی ئے تہا ھیر کنن ۔ گُد او سہت ئش کشّت او پیتیا کُرت او وتی جان ئے شودگا لگتنت، تن دیرا آپ ئے تہا لیب او گوازی ئش کُرت ۔وھدیکہ درآھتنت نوں کننت ، کننت پیتی پچ نہ بیت۔ بے وس بُوتنت مولدے گسادیم داتنت او دِگہ گدئش لوٹائینت ۔ پیتیا دزُت او گسا بُرت۔ بادشاھے ٹاٹار او مستری ہاھاں وس کُرت بلے ببیت کہ پیتی پچ ببیت، ٹاٹارا ں گشت نوں شپ بوت باندا سہبا ما وتی مستریں ٹاٹاراکارن آ اَلّما پچ ئے کنت۔ شپا درستیں مَردم کہ وپت او واب کپتنت، پیتی لیٹ گِران لیٹ گِران وتی گسا شُت او ماساگُشتے اَماّاَ ماّ کُٹا پاچ کن ۔ ماسا وتی کُٹ پچ کُرت گوجکا بادشاھے جنک او دسگہارالی گُد او سہت او زیورماس ئے کُٹا مان کُرتنت ۔ماس چہ گلا بال بُوت ۔درستے چت او مُچ کُرت او مں پیتی ھاں چیر داتنت ، او گشتے شنگن پہ وتی چُکا کہ کٹیت او کاریت پمن ۔
یک روچے گوجُک شُت مسیتا چُک مسیتا گوں ملاّ آ وانگا اَتنت، گوجُک وتا جلوہ ناکیں دِلاّئے کُرت او مسیت ئے پہناتا نشت۔
چُکاں وانگ ھلاس کُرت او دراھتنت ، تانکہ مسیت ئے پہناتا جلوہ ناکیں دِلاّ (کُبے) ایرنت چکے کار شیطانی اِنت ۔ہر چکے بیا او دِلاّ ئے تہا مِس کن تانکہ دِلاّ ھتک تن دپا بُوت چہ مس۔ زھگ تار پتار بُوت او شتنت ۔ دلا لیٹ گران لیٹ گران گسا اھت گشتے :اَماّ ۔ اَما، کٹا پچ کن۔ ماسا کٹ پچ کُرت گوجکا ژبرگا درستین مِسّ ماس ئے کُٹا مان کُرتنت ۔ماس ئے چہ مِساں مِیچڑ بُوت ۔چِتے لٹ ئے کوجگ ئے رندا کپت ۔ گوجُکا کدی جت کُرت آشپرتُگ آ گوالک ئے پشتا پتِرت ۔ او کھندگالگت۔
یک روچے گوجکُ شُت بقالے دُکانا۔ بقال نشتہ وتی زراں حساب کنگا اَت۔ گوجک پہناتا ئے نشت ۔بقالا گشت گوجُک تو اِداچے کنے بر وڈّنا گوازی کن ۔گشتے من تراچے کنین اَنچو نشتگن چارین۔ نہ شُت۔ بقال زران حساب کنان او ھیر کنان گوجُک چنان او وتی چیرا کنان۔ بقالا چک جت او چارت تانکہ درستیں زرگارنت۔ گُشتے ، گوجُک اے زران چے بُوت گوجکاگشت من چے زانیں۔بقالا گشت توکمے بُسرُ۔ گوجُگ وتی لِٹک سُرینت کہ اِیش ۔ انگہ بُسر۔ آئی وتی سر سرُینت کہ ایش ۔بقالا زھرا ھتگک گوں ہر دودستان ذرت او بُرزاکُرت گشتے کہ بہ جنانے زمینا کہ گوجگُ شپرتگ بقا ل ئے دپا پُترِت۔ بقالا پریات کرت، لیٹ لیٹ وارت کہ اَبو مُرتن اَبو مُرتن گوجک منا کُشت۔ اے درستیں زرتئی اَنت بلے چہ منی لاپا درا ۔بلے گوجُک درنیا ھت تانکہ بقالے گُشت گڑا درآھت او تچان بُوت او گسا شت او وتی پس ئے آورت او بقالے دکانا نادینت ،دکان ئے واجہ ئے کرت او ما چہ اُمود ا ایمان ئے ٹکرے زُرت او آھتن ۔
*****
روبا ئے جُوپہ
زمستان ئے روچ اتنت دُرستین جر او کا او بُوچ مسک کتنت، ھوراں گورتگت۔ برپ آپ بُوتگت بلے سایگانی دیما اَستت ۔ملا روبا پہ وتی ھونڈا پہ مُرتگیں مُرت او مشکے ئے شوھازا دراتک روئگا اَت، نا گمانا دیستے تانکہ حشکیں تاگزے ئے پشتی نیمگا آسکے کپتہ۔ پہناتائے ورنائیں مَردے کپتہ، مَرد ئے کمان کپتہ۔ مَرد ئے پادانی نزیکامزنیں مارے کپتہ ۔ ہر سَے مُرتگنت۔ مرد پہ شکار ا آھتگت۔ جتگتے آسکے۔ آشتگت پہ آسک ئے حلال کنگا کہ مَرد ما ر ا وارت ۔مَردا جت ماربلے مار ئے زھر ا شکار ی ھم کُشت ، چوہر سے کپتگ او مُرتگتنت ۔
مرچی ملا روبا آ گلے بھر بوت، سِٹّت ھے دیما او سٹت آدیما او گشتے روبکو ملا مزار اِنت لشکر ے سی او دوہزار اِنت ۔کے گشیت روبانز ور اِنت دژمن ئے چماں کور اَنت۔ سِٹک او جت ئے شعر ئے جت۔ پدا گوں وتا گشتے :نوں اول وامن کمان ئے بستگیں پوستاوریں ۔پدامار ا وریں تاکہ منی جانا طاقت او سیک ئے بَیت چیا کہ گژنا منی جان ئے سیک بُرتہ ۔پدا شکاریااو آسکا گِران کنین وتی ھونڈ ا برین ۔درستیں زمستان ھونڈے تہا وسپین او ورین۔
دنتا نے کمان ئے بستگیں ترندین پوستا سک داتنت ۔پوست ترھکارگا سِسِت۔کمان سِٹت او روبا ئے پیشانیالگت ، پیشانی ئے ٹُنگ بُوت ۔او مغزے درآھتنت ۔ روبا ھمودا کپت او مُرت
چکاں! روبا آ لالچ جو پہ کُرت او آھر ا جوپہ ئے سزا رَست۔