اِرا پخیر  ۔۔۔ خلیل جبران/غمخوارحیات

اسہ مَشا سے آ اِرا پخیر رہنگارہ ۔ دافتا کاریم خدانا عبادت و اسٹ ایلوتون مہرومابت اٹ رہنگان بید پین ہچس الو۔۔۔
دافتا اسہ مِشی و پیالہ ئس اسک ۔۔۔ و ہندا پیالہ اوفتا غٹ مَڈّی اس۔۔۔
اسہ دے اس بھلا پخیر نا اُست اٹ بدی نا روح دَڑا۔۔۔
اوچنکا پخیر نا رہی آبس و پارے ۔۔۔’’ننا اواری ئے اسہ زمانہ اس تدے داسا ننا جتائی نا وخت وپاس بسونے ۔۔۔
برکہ تینا جائیدادئے بشخن ۔۔۔!
چنکا پخیر مونجھا مرسہ پارے ۔۔۔
ایلم نا داجتائی والا ہیت کنا اُست آ کبین تماولے نی اگہ ہننگ خواسہ تو مرے ہنداوڑ جوان ۔۔۔‘‘
دُن پارسہ او ہمو مِشی آ پیالہ ئے ایس بھلا پخیر نا مونا تخاو پارے ۔۔۔
’’نن دادے بشخنگ تو کننگ کپنہ لہذا دادے نی تینکہ دَر۔۔۔‘‘
بھلا پخیر پارے ’’اخہ پنڈہ خواپرہ ۔ای تینا بشخن بید پین ہچس دَپرہ۔۔۔ننے دا پیالہ ئے اسٹ ایلو آ ونڈ کروئی مریک‘‘
چنکا پخیر پارے ۔۔۔’’اگہ دا پیالہ پِنّا تو ننا انت کاریم اٹ برو؟ اگہ نی بد دپیس تو نن داڑکن پال کین(قرعہ شاغن )۔۔۔‘‘
ولے بھلا پخیر وا پارے ’’ای بیرہ ہمو گڑائے ہرفیوہ ہرادے انصاف کنا ملکیت اٹ ایتے و کنے داہیت ہچ دوست اف کہ انصافے قسمت نا فیصلہ کن اِلنگے ۔ ننے دا پیالہ ئے ضرور وَنڈ کروئی مریک ۔۔۔‘‘
داجار چنکا پخیر ے پین ہچو ورندی ئس دو بتؤ گڑا اوپارے
’’اگہ نا مرضی ہنداٹی ئے تو برک پیالہ اے پھرغن ‘‘
دا بننگ تون بھلا پخیر نا مون غصہ غان خیسن مس و ترندآن پارے ۔۔۔
’’اے لغورا انسان انت نی دا پیالہ کہ کنتون جنگ ہم کپیسہ ۔۔۔‘