میر گل خان نصیر نافکری گُشاد ۔۔۔ غمخوارحیات

6دسمبر میر گل خان نصیردے
میر گل خان نصیر نافکری گُشاد
________________________________
بیشک نی کسفس ،ظلم کرک، خاخر ایت
پاھوتے آ ہم حق آ سلوٹ چُپ مفروٹ
دُنکہ ڈاکٹر شاہ محمد مری لکھک ’’ بلوچ نا ادبی و سیاسی تاریخ اٹی داخہ بھلو بندغ ودی مسنو کہ اوفتا حیثیتے بشخ آتیٹی تخنگ نا سوچے خلنگ ہم بے ادبی نا ہیت اس مرو۔ ای بھاز خیال اٹ، ولے بھاز دلیل تو دا دعویٰ اے کننگ کیوہ کہ میر گل خان نصیر بلوچی زبان نا بھاز بھلو (بلکہ کُل آن بھلا) انقلابی شاعر ئس۔ اونا شاعری پنجا سال نا مُرغنی ٹی تالانے۔۔۔ اسہ وڑ اسے ٹی اُننگے تو معلوم مروکہ ہمو ننا فردوسی، ہمو نظامی، مایاکوفسکی و ہمو ننا ویٹساروف۔۔۔۔۔۔اسہ بندغ نا تہٹی داخہ زیات بندغ ئسُرکہ ہر بندغ کہ اسہ جتا کتاب اسے نا ضرورت مرو‘‘
ڈاکٹر مون مستی لکھک ’’میر گل خان نصیر بلوچی تاریخ نا شاعری ٹی اسہ ادارہ اس ئسک۔ اونا کلہو بھاز اثردار ئس۔ اونا دور انا بندغاک و دُوارہ ننا بروکا بھازا شاعر و ادیباک اوڑان بھاز مُتاثر مسُر،میر صاحب بھاز کمٹڈ و بندغ اس ئس۔ او ایماندارو مخلص وسیاسی ورکر، سیاسی لیڈر و دانشور اس ئس۔ گدروکا صدی نا اولی چوتھائی آن پد بلوچ سیاسی ورکر آتیٹی سیاسی شعور نا ہرا سطح ئس اوٹی بھازاپین شخصیتاتون اوار، میر گل خان نصیر نا شاعری نا ہم بھلو کِڑدس ئس‘‘:(1)
ڈاکٹر مری تون امناکرسہ ای ہم انداپاوہ کہ میر گل خان نصیر اسہ ذات اسینا پن اف بلکہ اسہ فکری تحریک ا سینا پنے ۔
نصیر ہراتم تینا ذاتان پیشن آفاقیت کن سرہلک تو دُن لکھا:
؂
دل اور ہے منہ سے نکل جاتا ہے کچھ اور
افسوس ہے محمود کہ سوچا نہیں کرتے
درپردہ وہ تفریق بلوچی میں ہیں مشغول
اب نام کا پردہ ہے وہ پرواہ نہیں کرتے
مخلص کبھی حرمان کبھی بن جاتے ہیں آزار
اچھانہیں کرتے ہیں وہ اچھانہیں کرتے
تفریق بلوچ اور براہوی میں مگن ہیں
ہم ان کے سوا غیر کو دیکھا نہیں کرتے
کہہ جاتے ہوکچھ ہم سے مگر دل میں ہے کچھ اور
جوبات کے پورے ہیں وہ ایسا نہیں کرتے
کیا خاک سمجھ جائیں وہ غیروں کی حقیقت
جواپنی حقیقت کبھی سمجھا نہیں کرتے !(2)
دا نظم ’’مکران میں بلوچی اور براہوی تفریق پر ‘‘ نا سرھالا گل خان نصیر نا اُردوشاعری نا کتاب ’’ کاروان کے ساتھ‘‘ اٹ ساڑی اے۔ میر گل خان نصیر دادے ہمو بیمار ذہن تے کن لکھانے ہرافک قومیت نا آستونک ٹی دوشہ و ہرافک وختس داڑے وختس مکران ٹی بلوچ راجے لسانی تفریق نا کنڈا دننگ نا مکروہ چم بازی او پند ل سازی تے کیرہ :
دا دوشہ غاک درو گل خان نصیر ے اُست ترخ کریر اینو اونا فکری پیروکاراتے ہم تخلیقان فکران شعوری سفران آفاقی سوچان تورنگ نا خاطر وختاً فوختاً داڈول نا حرکت کیرہ ۔
1930ء نا دورئٹ میر گل خان نصیر تینا شاعری نا بنائے کیک دا ہمو دور ے ہراوخت انگریز سامراج داخطہ ٹی قوضہ گیر تولوک مریک ۔ میر گل خان نصیر نا شاعری اے انگریز سامراج نا سامراجی رویہ ، تینا سرزمینا قوضہ گیریت نا احساس مزاحمتی فکر ے بشخ ۔ دُن پان کہ میر گل خان نصیر نا شاعری نا بیخ و بنیاتا مزاحمتی فکرآ تخوکے بنیاتان الیس تا سرجم شاعری اسکان مزاحمتی فکر گل خان نصیر نا شاعری نا تینا جتاانگا پجّارے ۔ بنیاتی وڑاٹ بقول ڈاکٹرمری او ایلو زانتکاراتا کہ نصیر نا شاعری تینا ہمسن فکری سنگت میر یوسف عزیز مگسی و حسین عنقا آن رنگ ارفوک نظربریک ‘‘‘(3)
میر گل خان نصیر نا شاعری نا نیوکلیس (مرکزہ)’’بلوچستانے ‘‘، اونا تخلیقی نوشت نا سرھال بلوچ راجے بلوچ بزگامخلوقے ،شوان و بزغر، بجگت و پوریاگرکو، بلوچ سرزمینے اونا سرھال چلتن ، شال و بولانے ۔۔۔داڑن پد تیویٰ دنیا نا مظلوم محکوما راج و خلقتے :
میر گل خان نصیر نا شاعری اونا حقیقت بیانی اودے مدامی جیل و زندان نا موننگا کوٹی تیٹی ٹنگفیکہ ۔۔۔پارہ کہ قلی کیمپ اٹ جیلر تینا کَٹ ئے نن کان گل خان نصیر نا اڑتوما دوتا زی آ تخاکا۔۔۔ تینا راست گوئی ناسبب اومدامی دشمنان تشدد و اذیت سگّا ۔۔۔ جیل و زندان نا سختیک ، لٹ و تشدد اونا فکرے پین سوگؤ کرسہ کریر ۔۔۔پنی آ زندان آک قلی کیمپ، حیدرآباد جیل ، مچھ جیل نصیر نا سگھ و سینہ نا گواؤ۔۔۔ نصیر نا سوگؤآشاعری ننا راج لوزانکے سوگؤ مڈّی ئس بشخا۔۔۔ ہرامڈّ ی اے نن تینکن اسہ راجی میراث ئس سرپند مرینہ ۔۔۔ ہرافکری مڈّ ی نن ننا پدریچ کن فکری و شعور ی ردوم نا کسرٹی اسہ روشنو چیدہ سے ۔۔۔
میر گل خان نصیر نا شاعری ٹی آفاقی سوچ:
وحید الدین خان لکھک کہ ’’مخلوق تینا ذات آ کہ زند گدریفک ۔ ولے گواچنی انسان ہمو دے ہرا اسہ مسخت ا سیکن زندہ مرے ،مخلوق دوست کہ دوست و دشمن کہ دشمن مریک ، گواچنی انسان ہراسٹ نا خیر خواہ مریک چائے دشمن مرے یا دوست، مخلوق چاگڑد ناوڑسوچک و چاگڑدنا اثر ٹی عمل کیک ۔گواچنی انسان فطرت نا سند آ سوچک فطرت نا زیر اثر عمل کیک ‘‘:(4)
میر گل خان نصیر اسہ بامقصد وزند ئس تدفے انداڑن او تینکن اخہ پین تیکن زندہ اس او تینا ذات وقبیلہ کن نہہ بلکہ اسہ راج ا سے کن اسہ سوچ ا سے کن اذیت وتشدد تے برداشت کرے ۔ اونا حقیقت پسند ئس راست گواس ، حق ءِ حق و دروغ ءِ دروغ پاریکہ ۔ دا تو فطری وھیت ا سے کہ ننا دا دروغ نا دنیا و حکمرانی ٹی ہمیش راست ءُُ سچ پاروکاک اذیت و خواری خنانو دروغ تڑ، رشوت خور ، حق خورو راجی غداراک بھلو بھلو بینک بیلنس ماڑی ، پلاٹ و جائیداد مراعات نا خواجہ مسنو ۔ میر گل خان نصیر ہم حق پاروکا بدھا،منصور الحاج ،سقراط ئس تا ٹولی نا سنگت ئس اسک انداڑن اودے ہچو بینک بیلنس بنگلہ و ماڑی بھلو مادّی جائیداد ئس اف نوشکے نا خلق مینگل ٹی کچہ واُراتا اسُر ہرافک منہ وخت مُست ترندو شنزہ سے آن تمّار۔۔۔!
ہان گل خان نصیر اسہ بھلو فکری مڈّ ی سے نا خواجہ ءِ ۔۔۔ہرا فکری مڈّی ٹی ننے گام گام آفکری سوچ ہم نظر بریک ۔ میر گل خان نصیر گیشتری عدم تشدد نا پروکاری اے کرینے ولے ظلم و جابر کن او نا شعراک سم ہم شلانو ۔۔۔ اونا آفاقی سوچ نا اندازءِ نن اونا ہمو نظم آتیان خلینہ دُنکہ دنیا ٹی عدم تشدد نا اسہ پیروکارئس ’’گاندھی جی ‘‘ نا مرک آ24نومبر1949ء نا دے ہم او ارمان کیک
؂ ہم نے دیکھا سپنا ایسا ایک ستارہ ٹوٹ گیا
آنکھ کھلی تو شعلے لپکے بھاگ ہمارا پھوٹ گیا (5)
یعنی میر گل خان نصیر مذہب آن ہم ایشتر سوچاکہ گاندھی تو بقول مذہبی سوچ تخوکا تا بخال ئس اسک ولے میر گل خان نصیر اونا مرک ءِ ہم دنیا کن بھلو نسخان ئس گوندک :
اندا ڈول میر گل خان نصیر نا شاعری ٹی بدر مخلوق کن داوڑ چندی فکری ، آفاقی سوچ نا رنگاک تالان نظر بریرہ ہراشاعری تیٹی، قوم ، قبیلہ ،زبان، حسب نسب ، مذہب ، رنگ نسل نہ بلکہ بیرہ اسہ پن ئس اسہ بھلو نشانی ئس بھلو سوچ ئس بھلو مہر ومحبت ئس نظر بریک او پن ’’ انسان و انسانیت ‘‘ نائے:
میر گل خان نصیر تینا دور ٹی ساڑی اوغان سیاستدان تے کہ ہم تینا شاعری نا فکری گشاد ٹی جاگہ تخانے دُنکہ او عبدالصمدخان اچکزئی نا جیل آن خلاسی نا گل اٹ لکھک
؂ عبدالصمد مجاہد ملتِ اچکزئی
پھر گل ستاں میں زینتِ سُروسمن ہے آج(6)
اند اڈول او اسلم اچکزئی کن ہم مہرو محبت نا پھلاتے چٹ ترسہ اونا مرک دے آاوڑکن باز زیباؤ اظہارئس کیک ، کس ءِ اگہ دا ھُروئی ءِ کے فکری سنگتی امرمریک ؟ فکری سنگتی امر قوم ونسل آن بڑز مریک و سنگتی امر مریک گڑا او اسلم اچکزئی نا پن اٹ میرگل خان نصیر نا نوشتوکا نظم ءِ اونا اُردوشاعری نا مجموعہ کاروان کے ساتھ ناپنہ 40آضرورخوانے:
؂گھٹائیں غم کی چھائی ہیں خیالوں میں تلاطم ہے
دلوں میں آج پھر تازہ ہوااسلم ؔ کا ماتم ہے
نہیں سنبھلے تھے ہم یوسف کی مرگِ ناگہانی سے
کہ اسلم بھی چلے سوئے عدم دنیا ئے فانی سے (7)
میر گل خان نصیر نا شعری شاد ئٹ ساڑی اونا آفاقی سوچ ننے اینو نا ساڑی دور نا نوشتہ کارے داکلہو ایتک کہ شاعرنوشتہ کار’’ قوم ، قبیلہ ،زبان، حسب نسب ، مذہب ، رنگ نسل آن ایشتر سوچک اوشاعرئس اف کہ ہرادا گڑاتے بنیات جوڑ کرسہ راجا تیٹ منافرت تالان کے شاعر یا دانشور نا کاریم راج آتے جوڑکننگ نا ئے پروشت ( توڑ) شاغنگ نا اف ۔ اونا دا فکر ئٹ مہرومحبت ، اسٹی و سیوت نا سبخ تون اوار دا کلہو ہم ساڑی اے کہ شاعر نا قول و فعل ٹی تضاد مف نظریاتی اختلاف مرے ولے دُنکہ وحید الدین خان لکھک کہ بندغ نا اختلاف رائے تون اوار اڑتون ہمرّی کر‘‘ نن ہم پانہ کہ اختلاف رائے المّی اختلافِ رائے زندہ مننگ نا علامتءِ بیرہ مڑدہ غاک اختلاف تخپسہ ۔۔۔ہراوخت نن آفاقی سوچ نا ھیت ءِ کینہ گڑا اوٹی نظریاتی بنیاتا اسہ کڑدہ ئس جتا مریک او مظلوم ءِ ظالم آن ، حق ءِ دروغ آن جتاکیک ولدا ہمو پن سلیک ہرادے واپس نن انسان ءُُ انسانیت نا پن اٹ درست کینہ ولے داڑے میرگل خان نصیر نا شاعری ٹی آفاقی سوچ نا گوئنڈو مثال ئس پیش کننگ آن پد سوج دا ودی مریک کہ نصیر نا ھنکین و ڈھیہ اٹ ساڑ ی اینو نا شاعرانت آفاقی سوچے سرپند مریک ؟ انت اینو نا شاعرداسکان لسانی منافرت نا گواچی اف ؟ انت اینو نا شاعری تنگ نظر سوچ ءِ مون مستی درسہ شاعری ءُُ ادب نا پڑا انتہاء پسندی نا گواچی اف کہ داشاعرہراراج نا آدینک پاننگک ہراراجاتے سواراکو او بیرفوک سنج کروکا تپہ اے ولے صدافسو س کہ داڈھیہ نا شاعر میر گل خان نصیر نا پدریچ داسکان دا بحث اٹ اختہ اے کہ براہوئی قوم اسے یا زبان ا سے ؟
میرگل خان نصیر نا شاعری یا تخلیق اٹ اونا فکری گشاد نا کلان بھلا طاقت تینا کاز تینا آدرش ، نصب العین تون کمیٹڈ مننگ سچا مننگ اے۔۔۔انداسچائی نا تعریفے
زانتکارئس دُن کیک ’’ راستکی (سچائی ) تینا تہٹی تینٹ اسہ طاقت ا سے ، سچائی وختس چست مریک فطرت نا غٹ قانوداک اونا مخ تفی کن سرالیرہ ۔ تاریخ ناغٹ عملاک سچائی نا حق ئٹ یک جاہ مریرہ۔ سچائی اسہ اندنو ابدی گواچنی سے کہ مغلوب مننگانان باوجود غالب سلیک۔ سچائی اگہ ہس مرے ہم اونا تہٹی تریشونک ئس الم سلیک ہراوختس کہ رپّ آ کرے تیویٰ دنیا ئے روشن کیک و دروغ و دروغ تڑے بُھس کیک :
میر گل خان نصیر نا فکرئٹ سچائی ہم اسہ اندنو تریشونک ئس اس کہ مظلوم کن کسر نا چراغ و ظالم کن جاندوم نا خاخر ا سے آن کم اف۔ گوکہ اسہ وختس کہ دا بحث ننا ادبی حلقہ تیٹ تالان اس کہ میر گل خان نصیر ختم مس ولے اوفک اینو رد مسُر کہ میر گل خان نصیر نا دور تو داسا بسونے داسا اونا فکری گشادے دا پد ریچ پٹ و پول کننگے داسا اونا فکرآن راہشونی ہلنگو یقیناًہمو زانتکار و نوشتہ کار اک نصیر ی فکرآن راہشونی الیرہ ہرافک گواچنی دروشم ٹی دا دور نا نمائندہ نوشتہ کارمننگ خواراہ ہرافک میرگل خان نصیر نا ڈول سچائی نا کسرے السہ کہنگان پد ہم زندہ سلنگ خوارا۔
میر گل خان نصیر نا شاعری ٹی راجداری:
راجداری آن داڑے مراد تینا راجان تینا ڈھیہ و قومان خڑکی مہرو محبت نا درشانی اے ۔میر گل خان نصیر نا شاعری ٹی راجداری نا بے مٹو اظہار ا س ساڑی اے:
میرگل خان نصیر ،مشہد نا جنگ نامہ ،گل بانگ (1952)شپ گروک (1964) گرند(1971) ھونئے گوانک (1988) پرنگ (1988) گل گال (1993) شنبلاخ ، داستان دوستین و شیرین (1964)، بلوچی عشقیہ شاعری ، بلوچی رزمیہ شاعری ،بلوچستان کی کہانی شاعروں کی زبانی ، سینائی گیچک ، کاروان کے ساتھ(2011)
اونا داکتاباک الفان تا یا راجداری نا کلہو ایترہ ۔ دانصیر ی فکر اٹ تینا ڈھیہ و ڈغار تون محبت نا زگرانگااظہار داڈول ملِک
؂جانتا ھوں کہ یہاں ظلم ہے تعزیریں ہیں
بیڑیاں پاؤں میں ہیں ، ہاتھوں میں زنجیریں ہیں
اونچے سردارہیں زردار ستم ڈھانے کو
اور بیچارے کماکاروں پہ شمشیریں ہیں
پر میرے پیارے وطن تجھ کو میں چھوڑوں کیسے
شیشہِ دل کو میں پردیس میں جوڑوں کیسے (8)ص: 69کاروان کے ساتھ)
نصیر ی فکر اٹ راجداری نا پڑا ننے اونا شاعری ٹی تینا راجی ہیروتے نازیفنگ نا مہروانا نازینکاک دوبریرہ دُنکہ ’’حلف نامہِ آزادی ‘‘ پنی آ نظم ٹی تیویٰ بلوچ راجی ہیروتا پنک نظربریرہ ارافتا پن تا تقدس نا سوغند ارفنگانے:(9)
ص:90کاروان کے ساتھ)
مون مستی راست گوئی تون راجداری نا دا مہر نصیر ی فکر نا دابال
کیسے مانوں کہ میرا دیس بھی آزاد ہوا
جبکہ ہے نشہ حکومت کا وہی ساز وہی
کیسے مانوں کہ یہ اُجڑا چمن آباد ہوا
جبکہ ہے زاغ وزَغن کا پرِ پرواز وہی ( 10)ص:71کاروان کے ساتھ )
میرگل خان نصیر نا شاعری ٹی مزاحمتی سوچ:
میرگل خان نصیر نا شاعری ٹی تینا راج ڈھیہ و ڈغار تون محبت تون اوار داراج و راجداری اے تینا ذاتی انا ، مفادکن لتاڑوکا تپہ تیکن اسہ زرابی و داشت ئس ہم ساڑی اے ہرادے نن نصیر ی فکر نا مزاحمتی اظہار پاننگ کینہ دا شاعری ہم اونا راجداری نااحسا سے شعوری وڑاٹ درشان کیک کہ نصیر تینا راجے داڈول نا زوراک ، پند ل سازو حق خوراتیان آجو کننگ خواھک اوتینا راج نا بزگ ، لوچ و لنگڑ آ شوان و بزغر ، پوریاگرتے آسرات خواھک ۔
داراجداری نا مہرو مابت ٹی میرگل خان نصیر زوراک و پند ساز تپہ اے گڑا تینامزاحمتی شاعری نا تریشونکی آ لوزاتے دوٹی السہ مدامی ھکل ایتک اوفتا اصل دروشمے راجاشینک کیک اوفتا خازگی آ سوچے بدرد کیک اوفتا رویہ نا مذمتے مزاحمتی وڑاٹ دُن کیک
بچے رورونین گنوائیں
بوڑھے دردرٹھوکر کھائیں
چھپ چھپ مائیں نیر بہائیں
بھیک ملے نہ ادھارے بھیا
راج کرے سردار رے بھیا(11)
*
میر گل خان نصیر تینا شاعری ٹی بلوچ راجی قبائلی سسٹم ٹی ساڑی فرسودہ روایات بلخصوص سرداری نظام ، جرگہ سسٹم نا باز مذمتے کرینے اونا کتاباتیٹ سرداری نظام نا مذمت اٹ باز سختوکلا م ساڑی اوفک دانظامے بلوچ راجی دیمروی (ترقی ) شونداری او شرحالی کن باز بھلو رکاوٹ ئس پارینو۔ اوفتا ھیتاتیان دادرک ہم لگک کہ دانظام ہراوخت اسکان ارے بلوچ سماج ایلو سماجاتون ہمگرنچ مرسہ سماجی شونداری نا کسر آ ہننگ کپک :
داڑن بید میرگل خان نصیر نا شاعری ٹی ’’انسانی او راجی آجوئی ، بلوچ،ایلمی اسٹی سیوت، مہرومحبت امن ءُُ آشتی، بہادری، بہادراہیروتا صفت ،‘‘ تاسرھالاک فکری گشادٹی ساڑی و مضمون نا مرغنی ناسبب داڑے سرجم بحث مننک کپسہ:
میر گل خان نصیر نا شاعری نا باروئٹ کلیاتِ نصیر ’’ تیرگال کاریت‘‘ پنی آ کتاب نا پد ٹائٹل آپنی آدانشور میر بادینی لکھک ’’ گل خان نصیر چاہنداری ، گل خان نصیر شناسی دادورنا اسہ گرج جوڑمسونے ۔گل خان نصیر بلوچستان نا پجّار (شناخت ) ءِ کس اگہ گل خان نصیر تپک گڑا اوبلوچستانے تپک ، مون مستی لکھک کہ رابندرناتھ ٹیگور نامثل گل خان نصیر تینا نوشت اٹ آئیڈیل بلوچے ننا موناایسونے اوبلوچے باز ذہن ، گشادی ،بودا سینا خواجہ ؍گودی نا دروشم اعلیٰ شان خنک‘‘(12):
ہراڑکن اوتینا دعائیہ نظم (13)ا سے ٹی دا آئیڈیل بلوچ ءِ دُن پیش کیک
؂
اے خداوند نی بلوچاتے دونو انسان ایت
پُردماغو ، جانثارو، زندہ اُست روشن خیال
یقیناًتیویٰ بلوچ راج ، بلوچ نا سماجی ، ثقافتی ، سیاسی معاشی ، نفسیاتی رویہ، بلوچ راج نا راجی وہیل ، بلوچستان سیمی (جغرافیائی ) اہمیت دا سرزمین ٹی ساڑی گنج خزانہ ، بوچ ، ریک ، ڈھل ، مش ، ڈاک و خل تاسرجم زکر گل خان نصیر نانوشت ئی تخلیق ٹی ساڑی ءِ۔ گل خان نصیر بلوچستان نا توارے ، گل خان نصیر بلوچ راجی جنز نا ہمو سروکے ہرا تینا نوشت ئٹ مدامی دا جنز ے صراط مستقیم اے شان ترسہ کرینے ۔ جنزنا مونے تروک خرماءُُ خلغا تا ہم نشاندہی کرینے اونا نظماک داراجی جنزءِ رژن و روشنائی بشخانو۔
البتہ نن اگہ نصیر ی فکر ءِ اونا شاعری نا پڑا ھُرسہ تینے تینا اینو نا شاعری ءِ اوڑتون یکجا تخن تو بھلو فکری سوج ئس مُرّ ی ئس نظربریک ، کہ ننا شاعرنا شاعری ٹی داسکان مسخت نہ درک اف، ننا شاعر داسکان دا فیصلہ کننگ اف کہ ای شاعر ئس مریو یا مُلّا ئس ، ننا شاعرءِ دا خبر ہم اف کہ ای شاعری انت ا سیکن کیوہ او زبان و لوزانک نا شینکاری ، شونداری ءُُ شرحالی ٹی شاعری نا انت اہمیت ءِ ؟ اندن ننا باز کم شاعرک شاعری ٹی اسہ خاصو نظریہ سینا رنداٹ ہنوک نظر بریرہ ۔گیشتر شاعرتا شعرتے خواننگ آن پد درک لگک کہ ننا خڑکا شاعری بیرہ وخت تہیری کن مریک ۔ ننا شاعرشاعری نا بیرہ راہبند تون اختہ خننگک فکری بحث ءِ داسکان بنا ء ہم کتنے ننا شاعر نا شاعری داسکان احساس آن خورکے داڑے شاعر نا شاعری ءُُ فعل ٹی تضاد ارے شاعر ناجند شاعری ٹی ہراڈول لکھک جند تا اوڑا عمل کپک میر گل خان نصیر نا قول و فعل ٹی تضاد الوگوکہ اوڑا بازچغلی خسنگا باز پروپگنڈہ ہم مس ولے اصل گپاک او ڈول افس ہراوڑ اونا مخالفاک پیش کیرہ تا۔ اندن میر گل خان نصیر وختس کہ شاعری نا بنا ء کرے تو اووخت بلوچستان فرہنگی تا قوضہ گیریت ظلم ءُُ زیادتی نا پلویڑ ٹی اس ، بلوچ راج ، شوان ، بزغر و بجگت لوچ ، نت شپاد بے اُراو بے اِرغ اس،بلوچ ذالبول زوراکی تا گواچی اس، پوریاگرو شیف تپہ جاگیردار، میر و سڑدار نا پنجہ ٹی باپست خلککا! انت اینو مگہ بلوچءُُ بلوچستان بلوچ راج آسرات مسونے ؟ انت اینو مگہ ظلم و استحصال نا خاخر یخ مسونے ؟ انت اینومگہ شیف تپہ جاگیردار نا پنجہ ٹی خرینا زندءِ بدعاتننگ اف؟ گڑا اینونا شاعر انتئے گواچنی ءِ لکھنگ اف ؟؟
ڈاکٹر صبور بلوچ لکھک’’میر گل خان نصیرنا شخصیت نا معتبر انگاحوالہ اونا شاعری اے ، میر گل خان نصیرتینا شاعری آن بلوچی لبزانکے شاعری نا پوسکنا صنفاتیان واقف کرے اونا شاعری ٹی ننا راجی زبان نا کلاسیکل رنگ چٹ الوک خننگک، ہرارنگ ریکی ، زنگی شاھی ، بالاچ گورگیج و جام درک نا شاعری ٹی ساڑی اے ، نصیر ادب برائے ادب اخہ ادب برائے زندگی نا نظریہ نا حامی اے ، او گواچنی زند نا حقیقت نا نوشتوکے ، اندن میر گل خان نصیرہمو اسٹنگا بلوچ شاعرءِ ہرا بیرہ اسہ مخصوص علاقائی لہجہ سے ٹی تینا شاعری نا لغت ءِ محدود کتوبلکہ بلوچستان نا مختلف علاقائی بولی تالہجہ تے تینا شاعری ہم آہنگ کرسہ اسلوب ئس درشان کرے ۔ اونا شاعری ٹی ارفوکا ترکیباک ، استعارءُُ تشبیعات ءُُ علاماتاک اونا تینا مِش ءُُ ھنکین آن سیالی تخرہ۔ حقیقت بیانی تون اوار اونا شاعری ٹی زورِ بیان ،منظر کشی و کڑدارنگاری نا صفتاک ساڑی و:( 14)
بلکل میر گل خان نصیر نا شاعری ٹی تیویٰ مارشت آک ساڑی ، گل خان نصیر نا شاعری ٹی فنی گشاد ہم فکر تون ہم گرنچ سوبرءِ ۔ میر گل خان نصیر ہمو شاعرے ہرابلخصوص بلوچی شاعری ٹی پوسکنا سرھال تے درستی راستی کرفے نظم نا پڑا گل خان نصیر نا باز بھلو پن ا سے اندن میر گل خان نصیر نا پن ہمو زانتکاراتون اوار ے ہرافک بلوچستان نا ادبی ٹی ترقی پسند ادبی تحریکے تالان کرسہ روشن خیالی ءِ مون مستی ایسر و رجحت پسندی و تنگ نظری نا حوصلہ شکنی ءِ کریر۔
میر گل خان نصیر نا شاعری مرے یا نثر یا ترجمہ غاک تیویٰ تخلیق ٹی اونا تینا اسہ نظریہ ئس وژن ئس فکر ئس خننگک ۔ ننا اینو نا نوشتہ کار اگہ تینے میر گل خان نصیر نا ڈول تاریخ ئٹ زندہ کننگ خواھک تو ہم برے میر گل خان نصیر نا فکری چِراٹ سلی نصیری فکر نا پیروکاری اے کے ،نصیر نا فکری گشادءِ تینا ئی کے کہ دافکری گشاد اٹ بلوچ ، بلوچستان ، انسان و انسانیت نا کلہہو ساڑی اے ۔ ہرافکرتینا تہٹی تینٹ اسہ عظیمو مقصد ءَ سینا پنے ۔ دافکر گواچنی لوزانک و ادبیات نا سیاگے :
حوالہ غاک:
1: عشاق کے قافلے میر گل خان نصیر نمبر:ڈاکٹر شاہ محمد مری
2:3کاروان کے ساتھ ص: 97
4:الرسالہ:وحید الدین خان
5،6،7،8،9،10،11:کاروان کے ساتھ
12:تیرگال کاریت ،کلیاتِ میر گل خان نصیر:بلوچی اکیڈمی
13: گلبانگ: میر گل خان نصیر
14:ورثہ ،نصیریات: ڈاکٹر عبدالصبور بلوچ