ناول ’’ماہ گل ‘‘ ۔۔۔ رپورٹ: رفیق شوہاز

انوکا یکشمبے 24اپریل نا دے نوشکے ٹی ‘ راسکوہ ادبی دیوان ، مہردر پبلیکشنزوسنگت اکیڈمی آف سائنسز نا پارہ غان‘ پروفیسر غلام دستگیرصابر نا نوشتوک براہوئی ناول ’’ماہ گل ‘‘نا سمیر بلوچ نا قلم آن اُردومٹ وبدل نا مون پاشی دوداڈالک ۔
دامچی نا کماشی ءِ پنی آ زانتکار وحیدزہیر کرے وختس کہ خاص انگا مہمان پنی آ زاتنکار مہر در پبلیکشنز نا کلخواہ پروفیسر عابد میر ئس اعزازی مہمان تیٹ سنگت اکیڈمی آف سائنسز نا کلخواک جیندخان جمالدینی ، پروفیسر جاوید اخترونوشکے ٹی نیشنل پارٹی نا ضلعی صدر فاروق بلوچ اوار اسُرپروفیسر غلام دستگیر صابر مہمان آتون سنگتی کرے ۔
مجلس نا اولیکو بشخ اٹ کتاب نا مون پاشی دود و کتاب ءَ تبصرہ غاک مسُر ارٹمی بشخ اٹ سازوزیمل نا دیوان ئس اڈ ہلک ہراٹی پنی آ شعرپاروک مستی خان بلوچ و اونا چنکا ماربہمن بلوچ شعر پاریر:
مچی نا بناء اللہ تبارک وتعالیٰ نا بابرکت ءَ پن آن مس محمد یوسف تلاوتِ کلام پاک نا ثواباتے دوئی کرے ۔
پنی آ زانتکار وحیدزہیر ‘ پروفیسر عابد میر ‘ جیندخان جمالدینی ، پروفیسر جاوید اختر‘ فاروق بلوچ ‘پروفیسر غلام دستگیر صابر ‘راسکوہ ادبی دیوان نا مرکزی چئیرمین ملک اکرم مینگل و کتاب ءِ براہوئی آن اُردو ٹی مٹ کروکا خواجہ سمیر بلوچ مچی آن تریر کریر ۔
اوفک پاریر کہ ماہ گل براہوئی ادب نا اسٹنگا رومانوی /مہرومابت ناداستان ءِ ‘ داداستان ءِ اولیکو وار ننا متکنا ادبی دور نا شاعربھلو ہرانا تعلق نوشکے احمدوال آنے تینا شاعری سے ٹی مونا اس ہراشاعریءِ پنی آ پول کار ، زانتکار خواجہ ڈاکٹر عبدالرحمن براہوئی پٹ وپول کرسہ تینا ماہ گل پنی آ کتاب ٹی شینک کرے و ہمو کتاب آن پروفیسر غلام دستگیر صابر دا مثنوی نظم آ تالان ءَ داستان ءِ ناول نا دروشم ترسہ راسکوہ ادبی دیوان نا پارہ غان چاپ کرے ناول ٹی بیرہ ماہ گل نا مہرومابت ناقصہ اف بلکہ تینا ڈھیہ و ڈغارا قوضہ کروک فرہنگی تے تون جنگ کروکا جیرت مندا شہید علی دوست و اوفتا سنگتاتا داستان ہم ساڑی ءِ :
دا ناول اُردوترجمہ غان مُست براہوئی ٹی پی ٹی وی آن ڈرامہ نا دروشم ٹی ہم شینک مسونے و داڑا ڈاکومنٹری ہم جوڑ مسونے ۔
اوفک پاریر کہ زبان وادب ءَ سینا شابیتو پڑءَ سے آ شینکاری نا خاطر ترجمہ بھاز بھلو اہمیت ئس تخک ۔ ترجمہ غان نا زبان نا شہ پارہ غاک ایلو زبان نا چاہندار خوانوکاتے آ سرمریرہ ہندن ایلو زبان تے آن تینا زبان ٹی ترجمہ کننگ آن نا زبان نا ردوم پین زیات ودھسہ کاھک و ترجمہ وخت آ نی اسہ زبان ءَ سینا کڑنبی ٹی جاچ ءِ کننگ کیسہ ہمو صنف ہرادے مٹ کننگ اُس اوڑان خوڑتی ٹی آگاہ مریسہ ۔
اوفک پاریر ناول ماہ گل ءِ براہوئی آن اُردو ٹی مَٹ کننگا سمیربلوچ سِتاکڑزک کہ دااسہ سختو علمی و کاریم ءَ سے یقیناًکتاب ٹی مٹ وبدل کننگ وختا کمی بیشیک سلور ہرافک اودے مون مستی ترجمہ وختا تجربہ نا کاریم ایتور و سمیر بلوچ پین کتاب ءَ سینا ترجمہ وختا دا نزوری تے مُر کرو۔ سمیر بلوچ ءِ دااعزاز دوئی مس کہ اوفک اولیکو وار براہوئی ناول ءَ سے اُردو ٹی مٹ وبدل کرینو و دا کتاب اسہ شابیتو پڑءَ سے خواننگو کہ دا بھاز دلچسپو داستان ءَ سے نوشتہ ءِ ۔ ہراٹی مہرومابت و تیناسرزمین نا رکھ ءَ کن ارفوکا گام و دافتا زداٹ سلوکارویہ تادرشانی مسونے ۔
اوفک پاریر کہ دا براہوئی زبان وادب کن گچینو مستائی سے آن کم اف کہ داسا براہوئی زبان ایلو زبان تیٹ مٹ مننگ ءِ داکان مہُٹ براہوئی ٹی ایلو زباناک مٹ کننگانو ۔ ادبی شہ پارہ سینا پین زبان ءَ سے ٹی مٹ مننگ اونا شونداری و آب ئنا درشانی ءِ کیک ۔
داوخت آتران کاراک مہردرپبلیکشنز نا زبان وادب کن داوخت اسکان ارفوکا علمی ، ادبی ، فکری ، شعوری کارکڑدءِ لائخ ءِ صفت پاریسہ اوفتا منتواری ارفیر ہندااُمیت تون کن مہردر نا کلخواک مون مستی زبان وادب نا آبیاری و شونداری کن ہنداڈول تینا کارکڑدءِ مخلصی وسچائی ٹی برجاء تخور۔
تبصرہ تے آن مُست تلہ غاتولوکا مہمانک شینک مروک کتاب نا مون پاشی ءِ کریر ۔ مچی نا شونکارراسکوہ ادبی دیوان نا سنٹرل کمیٹی نا باسک پنی آ زانتکار ڈاکٹر عالم عجیب اس:
بشام پروڈکشن ، نوشکی ٹائم وش نیوزوتلار نا دا مچی ءِ اڈ تننگ اٹ خاصو کمک اس دا رپورٹ نا رداٹ نن اُست ئنا ھب اٹ اوفتا منتوار اُن ۔
ارٹمی بشخ سازوزیمل نا دیوان ئس‘ہراٹی پنی آ شعرپاروک مستی خان بلوچ و اونا چنکا ماربہمن بلوچ‘ میر گل خان نصیر ، آزات جمالدینی وکفایت کرار نا شعراتے سازوزیمل ٹی بینفیر۔ داوخت آ کماشِ مجلس مہر در وسنگت اکیڈمی آف سائنسز نا پارہ غان مستی خان بلوچ ءِ کتاب ءَ تا ٹیکی تس واونا چنکار مار بہمن بلوچ ءِ ماماعبداللہ جان جمالدینی ایوارڈ نا دروشم ٹی سَند ئس تس۔
دامچی ٹی براہوئی اکیڈمی نوشکے، پریس کلب نوشکے، شیوان ادبی کاروان ڈاک نوشکے ، سنگت ادبی دیوان نوشکے وایلو تنظیم آتا سنگت آک ساڑی اسُر ۔