سپارٹیکس ۔۔۔ ہارورڈفاسٹ/شاہ محمد مری/ضیا شفیع

باب اول

(1)
مارچے اوّلا رومئے ابدمانیں شہر ئے نزینک ا و کسانیں کوچک بلے وشرنگی ئے حسابا گوں کاپواؔ ہا ہم رنگ ، رؤکیں چارراہ یک برے پدا پچ کنگ بوت ات۔ بلیں چو ہم نہ ات کہ سڑکے سرا رؤگ و آیگ گوں یک دما بحال بہ بیت۔ گوستگیں چارسالاں رپبلکا یک سڑکے آدہ پہ جوانی او امن ایمنی بنی آدمئے رؤگ و آیگے نصیب نہ بوت ات کہ رومئے سڑک گشگ بہ بیت۔ چیا کہ ہرجاہ کم و باز جیڑہ است ات۔ پدا اے گشغ رد ہم نہ ایں کہ روما بگر داں کاپواؔ ہا رؤکیں سڑک، جیڑاہانی یک نمونگے ات۔ اے بتل ادا پہک راست انت کہ انچوش اے سڑک ، ہمے وڑا روم۔ اگاں سڑکانی سرا بے ایمنی و ردیں چست و اےئر بہ باں گڑا شہرئے حال ہم انچوش بیت۔
شہرئے تہا ہمے جار جنگ بوت ات، کہ شہرئے نندوکیں ہما ں مردماں کہ کاپواسوذاگری ئے واستہ کارے کپت، آ سفر کرت کننت۔ بلیں اے وش رنگیں شہرئے تہا سیل سوادئے واستہ رؤکیں کسے را ہم دلبڈی دیگ نہ بیت۔ پدا کہ حالات کمو وشتر بوت انت و اٹلی ئے زیبائیں ڈغارہ سرا سبزک درات گڑا راہ پدا پچ بوت انت ا و کاپواؔ ئے ڈولداریں ندارگ و مزں مزنیں ماڑیاں رومیانا پدا وتی شیدائی کرت انت۔
کر وگوئرئے علاقہانی قدرتی زیبائیا ابید ہما مردمانا کہ جوانیں و گراں بہائیں سینٹانی شوق ات، آ کاپواؔ ہا شت انت ، پہ جوانیں نیادئے گوں شریا زرت ایش۔ادا سینٹانی مزں مزنیں فیکٹری است ات کہ دنیائے تہا بے مٹ اتاں۔ شہ سرجمیں دنیا ہا نایابیں عرق شہ تیاب راہ ہا کاپواؔ ہا سر بوت انت۔ سینٹ، گلسورے تیل، سمسوک و گل درے عرق، سوریں پل، ویل مچھی ئے باسکاں ژہ کشتگیں تیل، لیمبو و نارنگی ئے پچک، نیازبو ئے تاک و جہور۔ ادا رومئے حسابا نیما ژہ کمیں نیادئے آ سینٹ زورگہ بوت انت۔ پدا سینٹے روچ پہ روچا نام و توار پرشت گڑا چشیں مردین و زالبولے نیست انت کہ آ یک وارے کاپواؔ ہا مہ شت ایں۔