کرنلا کس کاگد نبشتہ نہ کنت ۔۔۔ گبرئیل گارشیا مارکیز؍فدا احمد

کافی ئے ڈبی ئے دپئے پچ کنگا پد کرنلا زانت کہ ڈبی اندرا یک چمچی یے کافی پشت کپتگ۔ آنہیاچہدانی چہ آسہ سرا بُنا ایر گیتک آپانی نیم بُنا ریتک۔ پدا چاقوئے زرت او ڈبی ئے توکی نیمگا لِچّ اتگیں کافی آنی ککرّگا لگ ات۔ کافی آنی پجیگا زنگ اوں لُڈ اِت او چہدانی توکا رِچان بوتنت۔
وھدے کرنل ، کافیانی لہڑ ورگہ ودار ا آسہ دیماآراما گوں کودکی امیتے آ نشتگ ات ، آنہیا گمان بوت کہ منی روتانی توکا کُٹینگ او سوسنئے پُل رُستگ۔ اکتوبر ہ ماہ ات۔ اے یک گران و ھونکّیں سھبے ات، پدا انچیں مردے ئے واستا کہ آنہیا چوشیں بازیں سھبے گوازینتگ۔ کساس شست سال بیت، بزاں خانہ جنگی ئے ھلاس بوگا پد ، کرنلا ودارا ابید دگہ ھچ نہ کتگ ات۔ آنہی کرا اتکگیں گچینی ایں چیزاں چہ یکے اکتوبر ہ ماہ ات۔
لوگبانکا دیست کہ کرنلا کافی ئے کوپ دستا انت او لوگا پترگا انت تہ آنہیا بشانگ لیٹینت۔ آ دوشی ھیِسکا گپتگ ات او انگت گیگ و گور نہ ات بلے کافی ئے کوپئے دست گرگا پاد اتک او نشت۔
’’ تئی جند ہ کافی کج انت؟‘‘۔ آنہیاجست کت۔
’’ من وارتگ ‘‘۔ کرنلا دروگے بست۔ ’’ انگت دگہ کوپے کافی سر اتکگ‘‘۔ہمے دمانا چرچہ گھنٹی اوشباّ ٹیلیّنگگ بِنا کت۔ کرنل چہ جنازہا بے ترانگ ات۔ ہما دمانا کہ آنہی لوگبانک کافی ورگا ات ، آنہیاوتی گوانزگی تھت ایر گیتک او دو تل کت او یک کرا ایر کت ۔ زالبول مُرتگینہ ترانگا کپت۔
’’ آں سال 1922 آ ودی بوتگ‘‘۔ آنہیانام گپت ۔ ’’ مئے چکئے ودی بوگا ماھے آپد، 7اپریلا ‘‘۔
آنہی دم پُر بوگا نہ ات، ھَنش ھنش کنگا ات او کافی آگُٹّ گُٹّا ورگا ات۔ آنہی دو تَلیں سرینا گوشتئے جند پِر نیست ات۔ دمئے پُر نہ بوگئے سبب ات وھدے آنہیا جستے کنگی ات تہ انچو گمان بوت کہ آ گپے جَنَگا انت۔ کافی ئے ھلاسیا پدہم آ مُرتگینہ بابتا جیڑگا ات۔