گلیلیوئے زیندھ ۔۔۔ بریخت شان گل

ڈرامہ ئے مردم
گلیلیو گیلی
آندریا سارتی: گلیلیو ئے شاگرد
سارتی:گلیلیو ئے لوغہ سنبھالوخ( ہا¶س کیپر) اوآندریا ئے ماث
مارسیلی:بھاگیائیں ورنائے
پرولی:پاڈو آ یونیورسٹی رجسٹرار
فیدرزونی:لینز ٹاھینوخ
ورجینیا:گلیلیو ئے جنک ( وینسہ مجسٹریٹ)
کاسیمو دی میڈیسی :فلورنسہ گرانڈ ڈیوک
یک دینیات والا، یک فلاسفر، یک ریاضی زانت
یک ڈالائیں پادری اے، یک باز لاغریں پادری اے ، یک باز پیریں کارڈ نیل اے
فادر کرسٹو فر کلیوئیس ، کالجئے مزائیں اِستار زانت
یک کستریں پادری اے
تفتیشی پادری
کارڈینل بار بیرینی، کہ رندا پوپ ٹہیثہ
کارڈینل بیلا ر مین فلپو ، یک عالمے گفون، پیسایونیورسٹی ئے ریکٹر ونی، یک آسن کارے
یک پادری اے ، یک کشار کارے ، یک سرحدی گارڈے
پروفیسر ، سینیٹر، عدالتی زال، سکالر ، پادری، استار زانت، کلرک ، اہلکار،شاگرد ، مرد، زال اوچک ۔

1

گلیلیو گیلی ( پاڈو آیو نیورسٹی ئے میتھہ استاد) کو پرنیکسئے نوخیں شمسی نظامہ ثابت کنغہ ارادھہ کنت
شانزدہ صدونہئَ سالیں
سائنسہ رُژنا لانٹ کثہ
پاڈو آشہرا ، معمولی ایں لوغے اندرا
گلیلیو گیلی سمبر تہ پہ ثابت کنغا
کہ روش جکثی ایں ، زمیں چرغیں
بانگھہ وختیں۔ ہا¶س کیپر ہ بچ آندریا، شیری گلاسے اونغنے زڑتیا اندرا آتکہ۔
گلیلیو:(وثی جانہ بڑزی بہرا شوذاناں او زورزوراسا ہیا آسائناناںوش مجالسی آگوں گشی) شیراں میزہ چکا ایرکں۔ پر ، مئیں کتابا بندمہ خں۔
آندریا:ماث گشغیں کہ شیر والا ئے زردیغی انت ۔ اغر نہ ذاثیں توآں تکائی مئے لوغہ بیڑ ترینی۔
گلیلیو:ہمے ٹوکا چوگوئش آندریا : آں دائرہ اے کشی۔
آندریا: ہا گڑہ ہمرگیں ۔ اغر ما ز ر نہ ذاثغنت تو آں مئے لوغہ گڑدہ دائرہ اے کشی۔
گلیلیو:او گڑہ مجسٹریٹہ زوار‘ کمبیونی سدھائیں لیکہ ڈولہ ایذاکیث ۔ دو نقطہانی نیاما شوں کیث؟
آندریا: (برشکنداناں) کلاں ژہ کستریں لیکے چکا جزاناں۔
گلیلیو: شاباش ۔ مں پر تَو چیز ے ایر کثہ۔اوذا‘ اِستارانی چارٹہ مُسکا گندی۔
(آندریا چارٹہ مسکا ژہ دار ئے بطلیموسی ماڈلہ کشی)۔
آندریا: اے چیناں؟
گلیلیو: اے ڈ سی کہ قدیمیں عالماں گوئشتغث کہ اِستارزمینہ گڑد ہ چرّنت۔
آندریا:شوں؟
گلیلیو: بیا گندوں۔سرا ژہ گند ۔چے چے اَنت؟
آندریا: کلاّں ژہ نیاما یک کستریں سنگے۔
گلیلیو: آں مئے زمین ایں ۔
آندریا:گڑہ اشی گڑد ا سرودمبی آ گولہ انت۔
گلیلیو: چکھر اَنت؟۔
آندریا: ہشتاں۔
گلیلیو: ہمے اوشیشیں اجرام فلکی انت۔
آندریا:او ہمشانی چکا کستریں کستریں بال ( کیہنوں) ماناتکیا ینت۔
گلیلیو:آںاستاراں۔
آندریا:آنہانی چکا کاغذ جثیا ینت۔ ہمانہانی چکا لفظ انت۔
گلیلیو: شوئیں لفظ؟
آندریا: استارانی نام انت۔
گلیلیو: چو کہ؟
آندریا:کلاں ژہ جھلی بال ماہ ایں ، آنہی چکا لکھثی ایں۔ او آنہی بڑ زاروشیں۔
گلیلیو: نیںروشا چرّیں(آندریا روشہ چرّینی)
آندریا: ہل ل ل ۔ چکھر زیبداریں۔۔۔۔۔ پر۔۔۔۔۔ اشی چرغا پہ ہند فراخ تہ نَیں۔
گلیلیو:( جانا ہشک کناناں) ہا۔ مں سری دھکا کہ ماڈل دیثہ تہ مناں دِہ ماناتکہ کہ ہند کم ایں او مئے ساہی سُک بیغیں۔ (آندریا پلوا تو لیہ آ سٹی کہ بلاں آنہی سرینا مہٹی ہشک بہ کنت) ، بِھت ، گولہ او بے رفتار ی!۔ دو ہزار سالاژہ انسان باورا کناناں آغیں کہ روش و آزمانئے کل استار انسانہ طوافا کنغایاں۔ پوپ ، پادری ، شہزاذغ، عالم،سوذاگر، کشار کار، میذیں جَن، او سکولہ چک کل ہمے گنٹراناں آتکغنت کہ آں بے جُزر پزریں اوشیشیں گولہ ئے مرکز ہ چکا نشتیا ینت۔ پر ، آندریا! نیں ماتیر ہ ڈولا آزماناںچیر غا¶ں ۔ کہنیںزمانغ شتہ، نیں اے نوخیں عہد و باری ایں ۔ چوش ما نا غیں کہ گوئستغیں صد سالاژہ انسان یک خاصیںچیز ے آپہ ھِیل اَث۔او آں بس نِیں بیوخیں۔ شہر تنکاں او انسانہ عقل دِہ تنکیں، وہمی ایں، نادراہیں۔ پر مرشی ما گوئشتہ کنوں کہ ہمے کار اے ڈولہ چلیّ نہ ۔ پچیکہ ہر شئے روانیں، ہر شئے جزرغیں۔
مئیںدل گشی کہ اے دراہیں معاملہ آفی جہازاں گوں شروع بیثہ۔ دانکو دہ کہ انسانہ یاد داشت کار ہکنت آں تیابہ( ساحل) پجی پجیا شتہ جھونجاناں؛گڑہ ناغماں آنہیاسمندرہ کندھی اِشتہ او آفا دِرِک داثئی، سمندر ا پار بیثہ۔
مئے کہنیں زمینہ چکا یک افواہے بیثہ : کہ زمین دوہمی دِہ استنت۔ او گڑہ مئے جہاز ہماں زمیناں پجثغنت۔ او اے حال رُستہ کہ آں ہژ مبنا خیں مزں پاندیں سمندر تہ بس یک کستریںاوٹغے۔ گڑہ اغدہ اے خیال رُستہ کہ ہر ٹوکے سبب معلوم کنغ بہ بی۔سنگا جھلا سٹئے تہ یک دم پچے کفی؟ بڑزاسٹئی تو اشتافی نہ رو ۔ روش پہ روش نوخیں ٹوکے دریافت بیاناں روغیں۔ صد صد سالی ایں پیر مرد دِہ ورنا یاںگوش دارنت کہ کذی آں نوخیں ٹوکے بیاراں ۔
باز چیز معلوم بیثہ بلے دانڑتی باز کپتیا ینت پہ معلوم کنغا ۔ ہر نوخیں نسلہ اگھا تلاش کنغا پہ چکھر ٹوک استنت۔
مں کہ کسترا ثاں تہ یک روشے دیثوں کہ مسترِی بحثا کنغئے ثاں۔ او دروکا رندا آنہاں سِلانی جنغئے کہنیں بھیر بدل کثہ ۔۔۔ ہماں بھیر کہ ژہ ہزاریں سالاں چلغایہ ۔ او ہماں وختا مناں سما کپتہ کہ کہنیں عہد و باری گوئستہ او نِیں اے نوخیں دور یں۔ ہر چی کہ کہنیں کتاباں لکھثی اَیں آں نیں انسانا تسلا داثہ نہ خنت۔ ہزاراں سالاں ژہ کہ عقید ھئے بادشاہی اث نِیں شک ئے حاکمی ایں۔ دراہیں دنیا گشغیں ” ہا، ہماںدراہیا کتاباں تہ لکھثی اَیں پر نیں ماوث گندوں نِیں“۔انسان بازکہن و مزنیںحقیقتانی کوفغاں دستا ایرکنغیں۔ہماں ٹوکہ چکا کہ ہچ وختےا شک کنغ نویثہ ، آں مرشی شکّہ جھوکیں۔
او چوش بیغا گوں مزائیں لُوھڑے سمبرتہ کہ شہزادغانی شال او پادریانی زرتاریں چوغہ و چوتوآں بال داثو برغیں‘ کہ اندرا ژہ آنہانی ڈالا او لاغریں ٹانگ سہرا ینت او مارسما کفغیں کہ آنہانی ٹانگ تہ مئے ٹانگانی ڈولین انت ، سما کپتہ کہ بہشت و باغانی پدو تہ ہور گنت ۔ ہمے دیثو چیاریں کنڈاں ژہ ٹہکو پیدا غاینت۔
مں پیشن گوئیاکناں کہ مئے جندہ زیندھہ اندرا فلکیاتہ علم بازارانی اندرا روزینہی مجالس ٹہی۔میذوما ہی والا یانی چک دِہ سکولاں رونت۔ گڑہ اے شہرانی مخلوق کہ ہر نوخیںٹوکا پہ گنوخنت، وہش بنت کہ علم فلکیاتہ برکتا زمین آزادیا گوں جزثہ بی ۔ یکو ہمے گشے جابیغایہ کہ استار یک اوشیشیں گولہ اے آ لگڑتیا ینت تاکہ مہ کفنت۔ بلے نیں ما ہمت کثو ہمے استاراں پہ خلا اندرا دگ بو تکغنت۔ مئے جہاز انی ڈولا آں دِہ تارا جنغاینت۔ آزادیا، بے زنزیرا۔۔۔۔
او زمیں دِہ روشہ گڑدا چکھر آراماگوں چری او میذوماہی والا یانی زال و واپاری، شہزاذغ و پادری دِہ اشی پجیا چراناں روغاینت۔۔۔ ہا، پوپ دِہ۔
شفو ای شف کائناتا وثی مرکز گار کثہ‘ او اگھی صحبا اشیہ گوئر بے اُشماریں مرکز بنت۔اکھر کہ ہر یکے اشی مرکز بی او ہچ مرکزے نہ وی پچیکہ یک دُغا ما پاند مزن بیثہ۔
نیں مئے جہاز دیر سمندراں جزنت، مئے استار بے پاندیں آزماناں پیریاں ورنت۔
شاعرے آ گوئشتہ:
” واہ ، کہ شروع کنغئے وشیںصحب آتکہ“۔
آندریا:
واہ ، کہ شروع کنغئے وشیںصحب آتکہ
واہ ، کہ نوخ و دیریں تیاباں ژہ گواثئے وشیں بو آغیں
نِیں تہ شیراں ور۔ پذ ا مخلوق آناں روث۔
گلیلیو: مں زی کہ تراہرچی گوئشتغث تہ پوہ بیثغئے؟۔
آندریا:ہواں سائنسدان کو پرنیکس او آنہی گردشہ ٹوک ؟
گلیلیو: ہا۔
آندریا: تراشوں امیدیں کہ آں مئیں مغزہ کیث ۔ آں تہ باز گرانیں، او مں اکتوبر ا چھڑو یازدہ سالئے بیاں۔
گلیلیو: مئیں دل لوٹی کہ تہ جوانیاہمشیا سر پد بی۔ ہمے حاطراتہ مں شیر والا یا زرانی دیغہ ہندا اے گراں بہائیں کتاباں گراں کہ بلاں تئی ڈولیں مڑدم سر پد بنتی۔
آندریا:پر ہمکر تہ مں دِہ دیثہ کناں کہ بانگھاں روش دوہمی ہندے ایں اور بیگھاں دوہمی ہندے آ ۔ تو گڑہ اے یہ ہندااوشتا ثغینے تہ بیثہ نہ وی۔ ہچبر نہ ، بالکل نہ ۔
گلیلیو: تہ دیثہ کنئے ۔ تہ چے گند ئے؟ ۔تہ ہچی نہ غند ے۔ تہ چھڑو چماں مزں کنئے۔ چمانی مزں کنغ گندغ نہ ایں۔( دست شوذغئے تسلہ آ کوٹو ہ نیا ما ایر ہ کنت۔) اے روشیں ۔ نند۔(آندریا کرشی چکا نندی)۔ روش پکوئیں؟ راستیں دستا یا چپینا ؟( گلیلیو آنہی مُسکا جکی)۔
آندریا: چپیں پلوا ۔
گلیلیو: او اے تئی راستیں پلو ہ شوں آتکہ بی ؟
آندریا: اغرتہ اشیا زیر ئے راستیں پلوا بر ئے تہ۔
گلیلیو:چھڑو ہمے طریقہ ایں؟ (آں آندریا آ کرشی پجیا زیری نیم چکرے جنت دوہمی پلو ہ باڑت)۔ نیں روش پکوایں؟
آندریا: راستیں پلوا۔
گلیلیو: اے وثی ہندا ژہ جزرتہ چہ؟
آندریا:اے نہ جزرتہ ۔
گلیلیو: تو گڑہ چے جزرتہ؟
آندریا:مںجزرتغاں۔
گلیلیو:(واہو داشتو) غلط ۔ ناداں‘غلط۔ کرشی جزرتہ۔
آندریا:پر مں دِہ تہ کرشی پجیا اثاں۔
گلیلیو: بالکل تہ اشی پجیا اثئے۔ کرشی زمینیں ۔ او تہ آنہی چکا نشتی اَے۔