مورو دست روغناں

پیریں مڑدم گوئشنت کہ استیں دور ئَ ھڑچی مثل استنت آنہانی پشت ئَ کسوے استیں یا آں کسے ئے چمّ دیثیں خیال انت۔ چوکہ اگر ما مست تﺅکلی ئے اے شئیرا
"جواں نیاں جنگانی بذیں بولی
کئے وثی دوستیں مڑدماں رولی”
گندوں تہ ایشی پشت ئَ دِہ مارا کسوے گندغا کئیث۔ اے شئیر مروشی یک مثلے لیکغ بیث و یک کلاسیکے۔ ہمے رنگا
"ریحان رامین شِراں
سیوی ڈاڈھر براں”
دِہ یکے ئے چمّ دِیث (مشاہدہ) ایں۔

مئے ھلک ئَ اے شئیر دِہ مثلے زانغ بیث:
"مورو دست روغناں
کسی دلی درمان نیاں
نہ آختغیں ستّاناں
نہ گریثغیں چکّاناں
دف ماں لدّویں بینگاناں ”
ایشی پژدری کسو چوش کن انت:
گوئشنت کہ جکھرانی قبیلہ لافا یک "مورو” نامیں زالے اث۔ آں باز گریب و نیزگارے اث۔ آں ورغا پہ آزوز اث، آنہی گریبی روشاں آنہی براث و گہاراں گِرداں عازیز و سیاداں ہچ مذت و بھڑائی نذاثہ۔
نیٹ آنہی گریبی روش کٹّثغ انت و آں وثی سیاد و عازیزاں شہ باز ازگارے بیثہ۔ آنہی مال، میرات و سہدار کلاں شہ باز بیثغ انت۔
ازگار بیئغ رَندا دِہ آنہی دل ئَ شہ عازیزانی ڈکّ نہ شثہ۔ ہر کسے توڑے آنہی براثے آنہی گوئرا بیاختیں تہ مورو آنہی ئَ را ھچ نذاث کہ آنہی ئَ را وئیلانی روشاں نہ پکر اثش۔
گڈ ایشی سیاداں مورو ءَ را شغان جثغ انت و پذا چھیئے گال باقاعدہ مثل بیثغ انت۔
مروشی اگر کسے کس ئے کار ئَ مہ یئے تہ مڑدم گوئشنت:
"مورو دست روغناں
کسی دلی درمان نیاں
نہ آختغیں ستّاناں
نہ گریثغیں چکّاناں
دف ماں لدّویں بینگاناں”