عمر ماروی

عمر سو مرو ئِے زمانہا ( 1355 آ گرداں 1390ئ ) تھر ئَے علاقہا ملیر ،یک سوز و سوزخاتی ایں ڈیھے اث۔ ہمیذا ”پالنے “ نام ئِے کشار کارے اث کہ مارو قوم ایغ اث۔ ہمے قوم گجرات و کاٹھیا واڑ اژہ آتکغ اث۔ نیز گاریں پالنے او آنہی زال ”ماڈوئی“ آ دراہیں روش پورہات کث، او جنگلاں وثی مال چارینت روزی کٹ اث۔ ہمے جنگلی درشک و میوہ آنی چکا گزارہا ابید یک دو بنو ڈغاردِہ است اش کہ او ذ ا پھوگ نامیں راھکے پجیا آنہاں کشار کث۔
پالنے ئِے یک سنہڑائیں جنکے اث ۔ آنہی نام ماروی اث۔ ماروی اکھر سنہڑا اث کہ ملیر ا تہ بل درائیں علاقہامشہوراث۔ ورنا آنہی مہر ا باڑا اثنت ۔ کسنی آ ژہ پھوگ آنہی حسن و زیبائی ئِے مئین اث او دلہ شیر ا ژہ باڑ ایث کہ ڈولے نہ ڈولے آنہیا وثی کنت۔ ماروی کہ مزں بیثہ تہ پھوگا آنہی ماث و پثا گوں سانگ بندی ٹوک کثہ۔ پر آنہی سانگ پیشا کھیت نامیں وثی عزیزے ئَ گوں بیثغ اث۔ پھوگ نا امید بیثہ ۔ آنہیاوثی ناکامی ئِے باز مونجھ اث۔ ہمے مونجھ دژمنی آ بدل بیثہ ۔ بذنیتی او کینغا آں شاکارتہ کہ ڈولے نہ ڈولے ماروی آ عمر ئے جالا بجینی۔ گوں ہمے خیالاآں عمر کوٹا شتہ او یک اٹکلے آ گوں عمر ئے دربار ا پجثہ۔
پھوگہ دفاژہ ماروی ئے زیبائی و صورتہ ورداس اش کثئو عمر اکھر متاثر بیثہ کہ ماروی وثی کنغ ئے اٹکلانی گنڑتی آںکپتہ۔ آخر ویس مٹائینتئو پھوگہ پجیا ملیر ئَ پلوا لڑثہ۔ نِیں کہ نزی پجثہ تہ یک ٹیڑے چکا تاہشتہ ۔ ایذا پھوگا ژہ پول کثئی کہ آخر شوں ماروی اغوا کنغی ۔ ٹیڑئَ نزدیخا کڑدے چاث اثنت کہ ملیر ئَے زال بانگھاں تھار شونغی آفہ پُر کنغہ کاتکنت ۔ ماروی دِہ آفہ پُر کنغہ ہمیذا کاتک۔ قدرت کہ ہماں روشی آں باز پگھئی آہاغہ بیثہ۔ آں دِلو زڑتئو لوغا درکپتہ ۔ پر دوہمی آفی ہچ کس نیستہ ۔ آںایکا چاثانی پلواشتہ ۔ اوذا کہ آتکہ تہ دیثئی کہ آنہی سینگھی اے پیشا ژہ ہموذا اث۔ آں گوں وثی سینگھی آ ٹوک و توار ایث کہ نغاہ وثی پلوا آﺅخیں ساربانانی چکا کپتئی۔ ماروی تڑسثہ ، دلا لوٹثہ کہ اشتافی دلو آ پُر کنت و لوغا بروث ۔پر سینگھی آ دلا سوداثہ کہ“ اے مسافراں ژہ چے تُڑسے ۔ اے رائی انت زیاتاں زیات اژ ما آفے لوٹ انت“۔ سینگھی دِھیرواں گوں ماروی آ درو کاتسلا آتکہ ۔
پھوگا عمرہ پلوا دِیر ا ژہ اشارہ کثئو ماروی ڈسثہ۔ نزیخا آتکو ، عمر اکہ ماروی دیثہ تو دل برائینتئی ۔ آفہ ورغہ نیمناچاثہ نزیخا شتہ ۔ ماروی کہ آفہ ورائینغا نزی بیثہ تو آنہیا آں زڑتئو وثی مہری آ زوار کثئو اشتافی عمر کوٹہ پلوا لڑثہ۔
عمر کوٹا پجثئو عمر اماروی وثی بادشاہی محلا نظر بند کثہ۔ شفا کہ آنہیا گوئر شتہ تہ دیثئی کہ گریثئو گریثئو ماروی حالت خراب بیثغ اث۔ عمر امہر ا گوں گوئشتہ: ”نیں گریغ وپٹغ ئے چے فائدہ ، ترا مئیں گودی بیغی ہمے محلا نندغی ایں او دوہمی گودیانی چکا مزنی کنغی ایں ۔قولیں کہ یکو ترا سئوکا کناں اوتئی ہر خواہشہ پیلہ کناں“۔ ماروی آہچ ولدی نہ ذاثہ ۔ پر عمر دھک مں دھکی ہمے ٹئوکاں کنغا یث تہ مجبور بیثئو آنہیا گوئشتہ ”مناں گوں تئو او گوں تئی محلا ہچ کارنے ۔ ازلا ژہ کشاری ڈغارا گوں بستیا یاں۔ شمانہیا سوا مئیں زیندھ بے کاریں۔ نیخی آ کں مناں گڑدیں ملیر ا پُجیں “۔
عمر ئے خیال اث کہ ماروی دوسے روشہ اندرا گڑدی ٹہی۔ پر ہمنگا نہ ویثہ ۔ ماروی آ روش شف وثی سیادیں مارو گیر کاتکنت او عمر ا ژہ آنہی نفرت ودھاناں شُث۔ عمر ہر شفا ہما نہیا گوئر شُت او ڈول ڈولیں ٹوکاں گوں پر امغہ کوشیش کثی کہ بلاں آنہی پلوا آنہی دل نرم بی۔ پر ماروی دلا زہر گھٹ نیاتکہ۔ عمرہ ٹوکاں آں بتر سوتک۔
عمرا آنہی چکا قیمتی پوشاک، ساث و گہہ او بادشاہی سُکھت وعیش ہئورہ واجھا گوارینتغ انت کہ کزئیں منیں
۔ پر آنہیا ہر وختے گوئشت کہ ” مئیں اے دڑتغ ایں لوئی ستر کہ کانہل بی پرمناں اے ژہ پَٹ ایں جلشکو خیں پوشاکاں زیات وہش ایں۔ مناں اے لال و ساثاں ژہ وثی وطن ئِے حاخ دوستنت ۔ تئی ایذئے چرپیں جوائیں خوراکاں ژہ مناں تھر ئِے ہماں جنگلی میوہ جوان انت کہ منی ہم وطن شوقہ گوں ورنت اش۔ پر من اے بڑزیں محل و ماڑیا ژہ ریم و بوچاں گوں ٹھیثغ ایں جھگی زیات سئوکائیں کہ اوذامں مزن کسن بیثغاں ۔ مئیں مرگ و زیندھ ماروآنی پجی ایں “۔
عمر کہ پک بیثہ کہ ماروی دلاسو آ گوں نہ سرچی تہ سختی کنغاشروع بیثہ۔ ماروی ماڑی ئِے بالاخانہا زنزیراں بستئی او ڈول ڈولیں سختی کثغنتی۔ پر ہمے سجہ ایں سختی آنہی ارادہ بھورینغا ناکام بیثغنت۔ آنہیا وثی لج پاریزتہ ۔ ہمے قیدو بند ہ اندرا ہئورانی موسم آتکہ او آنہیا وثی دوستیں وطن ئے سوزخاتی گیر آتکغنت ۔ ماروآنی گیرانی ٹپ نوخ بیثغنت ۔ بے وسی اوبے امیدی حدّ ا گوئستغنت ۔ آخر یک روشے آنہیا عمر لوٹا ئینتئو گوئشتہ ” مں نواں باریں ماروآنی او ”ملیر“ ئے سیغا ہمنگا چڑی آں جناناں مراں ۔ اے خاطرا اشتئو دزبندی ایں کہ مرغا رندمئیں لاشا ملیر اپجیں کہ مئیں مارومناں تھر ئے ڈغارا ہند کننت “۔ ماروہمے ٹوکاں کناناں تُستہ او عمراہنمگیں ڈائے بیثہ کہ ہڑس و بذیں گنڑتی ہندا ترس وہمدردی پیدا بیثئی ۔ سذتی مارو ژہ زیلا آزاد کثئی او وثی گہارہ ڈولا داشتئی او آنہی ہم وطناں کاشذ دیم داثئی کہ بیاینت و ہیئر مئیرا گوں پاکیں ماروی آ وثی پجیا برنت ۔ ماروآں کہ ہمے پیغام پجثہ تہ ہیمنی بیثغنت ۔ پراے شک دِہ کپتئیش کہ نواں عمر آنہاں گوں دروہا کنغئیں ۔ ہمے خاطرا سری یک مڑ دے پہ پول پیچہا دیم داثئیش ۔ عمر کوٹا پجثئو آں مڑدماروی گندوانا شتہ او آنہیا تسلا داثئی کہ مں پُجاں تئی سیاداں وثی پجی آَ کاراں ۔
ماروآں کہ سما کپتہ کہ مارویا ہیرمیئر یں او عمر جائی آنہی گڑ دینغ و دیغا پہ تیاریں تو آں وہش وخوشیا عمر کوٹا رائی بیثغ انت ۔ عمر ہمانہاں گالی بیثہ ، عزتا گوں نیا ستغنتی او عزتا گوں ماروی ہمانہاں داثئی ۔
”تاریخِ ظاہری“آ لکھثی ایں کہ ماروی کہ عمر ہا قیدا بتکئو ملیر ا گڑتئو آتکہ تہ آنہی سانگ بند کھیت شک منداث ۔ ہمے ٹوکہ سما کہ عمرا کپتہ تہ خیال آتکئی کہ نواں مئیں بے پرواہیا ژہ مارویا تاوانے رسی ۔آنہیا مزائیں اڑدے زڑتہ او ملیر بیڑتر ینتئی ۔ مارو دِہ مچ بیثئو پہ مقابلہا تیار بیثغنتی ۔ عمرا ہمانہاں گوئشتہ ”کھیت ئے ماروی چکا شک چڑو شوئے بدنامی نہ ایں ، اے تہ مئیں جوآں مڑدی چکا دِہ ٹکے “۔ مارویا ضبط کثہ نہ خثہ ۔ اگھا آتکئو عمر ا گوئشتئی “ عمر ۔ ماغریب تئی رعیت اوں۔ تہ مناں سالے کچا وثی محلا داشتہ ۔ ظاہریں کہ منی سیاد و دوست بدگمان بنت۔ آں حقہ چکاینت۔ اے اغرمناں کُشنت دِہ آنہاں ڈوہ نہ وی“۔
ما روی ئے ہمے ٹوک اش کثئو عمر وثی کارہ چکا پشیمان بیثہ او فوجا واپس بیغہ حکم داثئی ۔ گڑہ کھیت وثی وٹا لوٹائینتی اور باز نرمیا گوں گوئشتئی ”مں قسمہ وراں گشاں کہ مں ماروی ئے عزتا ہچ نقصاں نہ پجینتہ۔ آں بالکل پاکیں ۔ ہمے بارو ا ہر آزمائشے ترا گزریں مں تیاراں ۔ عمر ہ ٹوک اش کثئو ماروی نیام کپتہ ” آزمائش تہ مئیں بی، تئی آزمائشا گوں نیں مئے چے کاریں ؟“ ۔ آخر فیصلہ بیثہ کہ آسہ اندرا آسنیں ڈالائیں سیہہ اے ہنگرہ ڈولا سُہرکنغی ۔ ماروی بلاں ہمے سُہریں سیہا وثی دستاں گوں زیری۔ مارویا کہ وثی دستاں زڑتہ ہچی نویثئی ۔ عالما دیثہ تہ باور کثئیش کہ ماروی پاکیں۔ عمرہ چکا دِہ ہماں وختا ہمنگیں اثرے بیثہ کہ آسہ لمبو آنی پلو اجھٹ داثئی تاکہ وثی راست بازی ثبوتا داث۔ آں دِہ ہواڑیں آسہ اندرا ژہ سلامتیا درکپتہ۔