اساطیری نظم

(( گدروشیا))

نظم یے کہ تئی چماں چہ چولکیت
واب یے کہ ردیت کبلیں بروناں پتائیت
مرگ یے کہ بنیادم یے
لطیفیں کوشی کول یے
زندگی ہر رو چار چوکیں موسم یے
مٹ بیت نیکہ بار گیپیت

نظم یے کہ تئی چماں چہ چولکیت
اے پیشگاہا تو چنچو واب کشتگ ات
بلے نوں چنچو کبراں رستگیں
نوں مولد کسہ کاریت نیکہ زہیریگاں نال ایت
نوں جتوئی جم ئِ ٹک زور ایت
نہ مکران ھامین بیت !!
بس بشامی ھوراں گوار یت
بس آسگواریں لواراں شنزیت

نظم یے کہ تئی چماں چہ چولکیت
تو مپتا فلش بیک بئے
کہ کیچ ئِے چنال ئِے ساھگ انت
بیڑآرتگ مہتراں !!
او چوڑ پاگانی کہبی بستگ انت
ھا او۔۔۔۔
روچ رھمی واب اوں گندگ بیت
بگندے شئے کہیری چماں پچ بہ کنت
او گواتا اوژناگ بیت
کہیراں چو اسپا زین کنت

نظم یے کہ تئی چماں چہ چولکیت
بس کسہ آں کتاباں پشت کپتگ انت
نہ کمبریں سلیمان زادگے
نہ ھانیں بلوچ کانیں
بئیت بہ رکینیت بندیاں
پروش بدنت فرنگیاں
نظم یے کہ تئی چماں چہ چولکیت
واب یے کہ شاہئ لمب کشگیں!!