Sangat Sangat is a popular opinion, columns and blogs website.
روئے تئو پہ چے بوذناں بر کنئے
نمب و ھشکاوغی٘ں ڈیہئے انڑزاں مزیر
دلگرانی ڈغارو وتنئے منی کُل گہیں مردمانی ترا بار بنت
تئو اے بارا مہ زیر
بارے ئا گھوئی یے کن و دھیاں کں پذا
پیلوی٘ں اُستمانے تئی رنداں پذا
بریں بھانڑاں پذا
گریوغی٘ں ڈلکغی٘ں ھڈکغیں ریشغی٘ں موتیاں
بارے چھری٘ن دیما پذا خیال کن
گند کہ کسے دہ مرشی نہ شیزارغی٘ں
گِند شفانکے دِہ مالے نی چھیڑغ نئیں
گند تئی رنداں پذا سبزیں چھابر دراہ ھشک بیثو روغاں منی ماھکاں
لمبی٘ں پھیثار، گنڈھیل و سوزیں نذغ
ھچ دہ سوزغ نئں
اے لڑنگیں شفانکانی مستیں زمیں گیمُرغی٘ں پذا
عاشقانی ڈغارا مہ بر کن برؤ
ھانی و سمی ئے بانڈواں کن دھیاں
ایشاں رنجا مہ کن
اے مئے ڈکھانی زھریں گہیں دپتراں
بِل مریدے بیئے پہ تو شئراں رژی
بے ترا تئوکلی یے گنو چون بی
بے گنوخا زمستاں بکو سودھژی
بے گنوخا لِواران کئے یار کنت
پہ گنوخا تئی سیاھی٘ں پٹے لازمیں
چم درکاراں تئی پہ گنو بیئغا
سر داں پاذاں بُنا بے گذیں تئی بدن لازمیں کہ شفاں را دیا دھیروے
بے گنوخا اے دنیا تہ دنیا نئیں
نہ گلے پھٹژی ، گلزمینئے سرا
پہ وثی عاشکاں گڑدغی
بی برے
اے دہ سوبیں تئی
بیا مئے انڑزانی ھوراں پذا یہ برے ڈیہئے ریجاں تہ چھار
وشی یے چھنٹ بیا بوذناں دبرا
بانڈوانی املیں گلیں بانکیں جیڈڑیانی زیندار را ساہے بہ دئے
بانکرانی رواجے روا کن برے
ڈوبراں تنسویناں را آفے بہ دئے
گڑد بھانڑاں پذا