من کہ سر کش اِتگ

من کہ سر کش اِتگ
من کہ سر کش اِتک چاریں دیماں منی ہشکیں ویرانگاں
دہرئِے روکیں چراگ
دُرس بیگواہ اِتاں
گیدی ئِے رُستگیں پُل گلاب
نُوک با ہندیں چمانی یا قوتیں واب
ہجگیں زردانی زگریں تماہ
پیریں دست ئِے قلم ، دور گندیں نگاہ
سمیانی رواج ، ٹہل بچکند و داب
مکتبیانی باندات و شنگیں کتاب
دُرس پاد مال اتاں

من کہ سر کش اِتگ !
اوستمانا وتی پُوست مٹا تگ ات
نیپچون ،مشتری ،ماہ ،ذال و مریخ
مردمانی ارزانیں لیب جاہ اتاں
وہد بے حاجتیں راجاں پُوستا دِتگ
نُوں زمان ومکان ئِے ہبر ہَلتگ
من کہ سر کش اِتگ !

من کہ سر کش اِتگ چاکر ئے سیویا
گہرام ئِے مُولہ و بولان ئِے مِسکیں پڑا
بزگی ،لنگڑی ،درتہ پُچی ابید
ہلک لڑیت وبونژان سروں بچ اِتگ
من کہ سر کش اِتگ !

من کہ سر کش اِتگ !
بے تواریں دگاں ۔۔۔۔بے وسیں مردماں
پہر بنداں مدام چو ٹوئِے رندگاں
ملکمیت پہ وتی جندئِے براہندگاں
ہچ نہ گنداں گورئِے ہون واریں سگاں
من کہ سر کش اِتگ !
چاریں دیماں منی ہشکیں ویرانگاں