لِیلا چنیسر

رانا ”کنگھار“ یک مزں مرّیں حاکمے اث۔آنہی جنک ء نام ”کونرو“ اث۔ کونروئِے صورت و سنہڑائی ستا او تعریف چیار چودھارا دَہ شتغ اث۔ ہماں زمانہ آ ہمے دراہیں ڈیھا آنہی ڈولیں زیبائیں جنک نیست اث۔ کونرو سانگ گوں وثی ناغزاتک ”اتمادی“ آ بیثغ اث۔ ہمے زمانہا دیول ئِے راجا چنیسر مال مڈی ، صورت و سنہڑائی او دَور و مزں شانی آ بے تڑاث۔ ہمے راجا سومرہ اے اث۔ آن وتی جوانہہ ئَے سببا مخلوقا باز دوست اث۔
یک روشے کونرو سینگھارا کنغایث۔ آنہی سینگھی جمنی دفا ژہ درکپتہ کہ ” تہ تہ ہمنگا وثار سمارغایئے چوکہ چنیسرئے گودی بیوخ ئِے !“ کونروآ ہمے شغان مانا تکہ او آں نہ دیثغیں چنیسرہ چکا مئین بیثہ ۔ ہمے ٹوک کہ رانا کنگھارا دَہ پجثہ کہ آنہی جنک بادشاہہ گودی بیغا باڑائیں تہ آں باز حیراں بیثہ۔ چنیسرا گوں سانگ بندی آنہیا پہ عزتی ٹوکے اث۔ پراغر آنہیا انکار کثہ تہ ہنچو خامخا بدنامی بی ۔ باز فکرو گنڑتی آ رند خیالے آتکئی کہ کونرو یک سوذا گرے ویسا کنت چنیسرہ وطنا بروث ، او ہموذا اٹکلے آ گوں آنہیا وثی پلوا لاڑین ایں۔ گڑہ کونرو او آنہی ماث ”مرکھی “ آ سوذاگری ویس کثہ او باز مڈی و سامان زڑتئو دیولہ پلوا لڑثغ انت ۔ ہموذا پجثئو آنہاں چنیسر ئَے مَحلا پُل بروخیں زالے وثی ہمراز ٹاہینتہ ۔ ہماں زالا صلاح داثہ کہ ہمے معاملہ آ چنیسر ئے وزیر جکھرہ مذث ء کثہ کنت۔ ہماں سہ ایں جکھرہ آ گوئر شتغنت ۔ کو نرو آ منت زاری آ گوں وثی حال بیان کثہ ۔ کونرو ئِے درد مندیں ٹوکاں گوں جکھرہ ئَے دل نرم بیثہ۔ گوئشتئی ” مں کوشیشہ کناں کہ تئی امید پیلہ بی “۔
دوہمی بانگھا جکھرہ تیار بیثئو چنیسرہِ ماڑی آ شتہ او گیغ دیثئو کونرو ئِے مہر ئَے پچار باز احتیاطا گوں کثئی ۔ جکھرہ آ آنہی صورت و زیبائی تعریف ہمنگیں ڈولے آ کثہ کہ چنیسر ہ چکا باز اثر کپتہ ۔پر، وثی زال لیلا ئِے لحاظا کناناں جکھرہ آ ولدی داثئی کہ ”لِیلا کہ استیں تہ مں دوہمی زالاں نہ خنّاں ۔ تہ کونرو آ سرپد کں کہ گڑدی وثی ڈیھا بروث۔
جکھر و آ کہ ہمے حال کونرو او آنہی ماثاداثہ تہ آں بے حال بیثغنت ۔
کونرو بازنا امید بیثہ ۔ ماثا باز پوہ کثہ پر آں ہچ ڈولے آ سرچغا نہ یث۔ آخر فیصلہ اے بیثہ کہ سجہ ایں مال و مڈی آ بل انت، کہنیں جراّں جانا کننت او لیلا آ گوئر بروانت ۔ شمانہیا دزبندی آ کننت کہ وثی مولد ٹاہینی ثش ۔
دوہمی روشا آنہاں دڑتغیں کہنیں جرجانا کثغنت او نیٹ شتئو لیلاآ گوئر پجثئو عرض کثیش کہ ”دنیا ئِے جہل وبڑزاں مار تباہ کثہ او نیں گوئڑتئو ھِیل کثئو آتکغوں کہ نیکیں مہارانی حیثیتا مئے سغرہ چکا دستا ایر کں ، تاکہ ماوتی لج و عزتا محفوظ کثی آ تئی خدمتا کنوں“ ۔ لیلا آ آنہانی کانہلی دیثئو ترس آتکہ ۔ او دوئیں وثی مولد کثغنتی۔
وخت شتغنت گزاناں پر کونرو آ چنیسرا گوں گندنندئے ہچ امید نہ د یثہ ۔ یک شفے آ کہ آں چنیسر ئِے کٹ و او چنڑاں برابر کنغئے تہ وثی ماضی گیر آتکئو گریغا شروع بیثہ ۔ لیلا آ کہ کونرو چماں انڑزی دیثغنت تہ دلدوری آ گوں پول کثئی ۔ کونروآ ٹوک انگو آنگو کثئو گوئشتہ ”چراغ ئےِ دونہو سببا مئیں انڑزی در کپتغنت ، دوہمی ہچ ٹوک نے “۔ لیلاآ باورنہ یاتکہ او پول کثئی ” راستیں حالادئے چے ٹوک ایں “۔ کونروآ کمڑ و فکر کثہ ، گڑہ ساڑتیں ساہی کشتئو گوئشتئی ”وختے مں دِہ تئی ڈولاوش و وشہالیں زیندھے گوازینغئے ثاں۔ مناں گوئر دِہ بادشاہی استہ ۔ ترا گوئر تہ چراغہ بالنت روژنائی ء کننت ۔ پر مناں گوئر شفا مئیں نولکھاہار ئِے جلشکغا گوں تہار گاربیث۔ گوئستغیں وختانی گیر کہ کئیث تو مئیں چم انڑس بنت “۔ لیلا کونرو ٹوک اش کثئو چپ بیثہ ۔پر آنہی خاموشی ظاہر کنغا یث کہ آں کونر وئِے ہماں نولکھاہارہ گندغا باڑائیں۔ کونرو دل تہ اولا ہمنگا لوٹغایث۔ اشتافی شتہ او کہنیں جرّانی گرنچے آ ژہ وثی نولکھاہار کشتئو آڑتئی ۔ لیلا گہاں پہ باز شونقی اث او قیمتی لعل تہ آنہیا باز وش اث انت۔ کونرو ئے نو لکھا ہار آنہی دل و چماں سیب آتکہ ۔ گوئشتئی ”لوٹ ہر چی اے لوٹئے ، مں ترا دیاں ۔ بس وثی ہمے ہارا مناں دئے “۔ کونرو آ باز عاجزی آ گوئشتہ ” مناں مال ومڈی ئِے ہچ لالچ نے ۔ بس چنیسر آ پجی آ یک شفے وفسغا باڑایاں “۔ لیلا ہار ئِے لالچا ہمکر کور کثغث کہ کونرو ئِے بستنی قبول کثئی او تسلی داثئو گوئشتئی تہ وہش وخوشی آ شفاپہ ھِیل بی، مں بیگھئی ایں شفا ترا ہموذا پُجیناں“۔
چنیسر نماشاما ژہ وثی سنگتاں پجی آ شراب واری آ اکھر سوگھو بیثہ کہ شفا دیر لو غا آتکہ۔ لیلا آ کہ آں نشہ آ دیثہ تہ دلاگوئشتئی کہ مرشی چنیسرا ہر ٹوکے کناں، آں منّی ۔ لیلا آ چنیسر بھانکر کثئو گوئشتہ ”کونرو شُدا پڑتئو مرغئیں۔ مرشی شفا ہمانہیا گوئر برو“ ۔ حالانکہ چنیسر نشہ اندرایث گڑہ دِہ ہمے ٹوک آنہی غیرتا سیب نیاتکہ او انکار کثئی۔ لیلا آ تہ ڈولے نہ ڈولے آ شمانہیا ہمے کار گرغی اث ، تو منّتاں کناناں چنیسر ئَے دست گپتئو کونرو ئِے کوٹوا پے ہیں تئی ۔ کونرو تہ نماشاما ژہ آنہیا پہ بے قراری آ ہیل اث ۔ آنہیا دلہ شیرا ژہ چنیسر وشات کثہ او وثی نازاں گوں آنہی دل وہش کنغئے کوشیش کثئی ۔ چنیسر یکے تہ نشہ اندرایث او دوہمی دیر بیثغث ہمے خاطرا کونروآ مہر نہ داثئی او وپتہ ۔ وختیکہ آں پذی شفا ہاغہ بیثہ او وثی پہناذا کونرو وپتی آ دپثئی تہ کُو کار کثئی : ” یاھذا اے شفا گوئنڈ کں۔ لیلا ئِے صورت و زیبائی دیما اے ہچی نئیں ۔ مں تہ لیلاآ سواتی ہچی کسا باڑا نہ یاں ۔ پُکو پُل او پکو کُنٹغ ۔ ھُذا اشی آ مئیں نزیخا ژہ دیر کں۔ مئیں شفا جو آں کں“۔
چنیسر بانگھا کہ کڑو بیثہ تہ وثار ناولدیں حالتے آ دیثئی ۔ آں کوٹوا ژہ در کفغا باڑ ایث کہ کونرو ماث آتکہ او دیثئی کہ چنیسر رووخیں تو گوئشتئی کہ تہ وثی نیاز مندہ کلئے پکوروئے ؟ ۔لیلا آ تہ زی نولکھاہار ترا ژہ زیات دوست کثہ “۔ چنیسر ہمے شغانہ ٹوک اش کثئو پریشان بیثہ ۔ کونرو ماثا سرا گر دَہ آخرا دراہیں قصو بیان کثہ ۔ چنیسرا کہ لیلا ئے لالچہ بار ہا معلوم بیثہ تہ آنہی دلا نفرت پیدا بیثہ ۔

آنہیا کونروآ مہر دیغ شروع کثہ ۔
لِیلا ئِے وہم و گمانا دِہ نہ یث کہ چنیسر آنہی ء ژہ دیمہ تی پلوے ء چرّینی۔ نِیں کہ دیثئی کہ کونرو آنہی دل ئِے گودی ٹھیثی ایں او لیلا پلوا مہر ئِے ہچ نغا ہے نیستیں تو وس کثئی کہ چنیسر گڑدی وہش بی ۔ پر چنیسر ہمنگا زہر گپتہ کہ آں وہش کثہ نہ یا تک ۔ آخر کار بے امید بیثئو لیلا وثی پثہ لوغا شتہ ۔ آنہی خیال اث کہ دیر یا زیث چنیسر آنہی وہش کنغہ پہ وث کیث ۔ پر بازیں سال گوئستغ انت او چنیسر آنہی وثی کنغا پہ ہچ صورتا تیار نہ ویثہ ۔

چنیسر ئِے وزیر جکھرہ ئِے سانگ لیلا ئِے خانوادہہ اندرا یک جنکےآ گوں بیثغ اث ۔ ہمے جنکہ چکا جکھرہ دلا ژہ عاشق اث۔ پر لیلا او چنیسر ئِے ناچاکی اثر ہمے سانگ بندی چکا دِہ کپتغ اثنت ۔ جنکہ وارثاں سیراَ ژہ جواو داثہ۔ جکھرہ آ خیال آتکہ کہ مرکائی لیلاآ گوئر بروث۔ آنہیا وثی کمکہ کنغا پہ لیلا راضی کثہ ۔ لیلاآ چھڑویک بدھی اے بستہ کہ ”تئی پجی آ چنیسرہ آغ ضروری ایں “۔ جکھرہ آ ہمے بدھی من اِثہ اور گڑتئو دیولا شتہ او چنیسرا دز بندی کثئی کہ ” تہ مئیں سیرا ضرور اواربی ۔ اشتئو سوا مئیں مراذ پیلہ نہ وی“۔ چنیسرا ہئو کثہ ۔
چنیسر شانا گوں جکھرہ ئِے جھنجا اوار بیثئو جنکہ والا یانی شہرہ پلواشتہ ۔ شہرا درا جھنج دارغ بیثہ ۔ ہموذا لیلا او آنہی سینگھی سینگھارا کثئی آ استقبالا پہ سانڑیں اثنت ۔ آنہاں باز وہشیں سوتے آ گوں ناچا کناناں جھنج وش آہت کثہ ۔ لیلا ئِے زبردستیں نازاں چنیسرہ چکا اکھر اثر پرینتہ کہ لیلا کہ ناچا کنا ناں نزیخا آتکہ تہ بے سمائی آنہی دفا ژہ درکپتہ ”اونازانی بانک ۔ گُھنڈا دیر کں وثی سنہڑائیں دیما تہ ڈس !“۔ لِیلاتہ او لا ژہ بے قرار اث، گھنڈ دِیر کثئو ارمانا گوں چنیسرہ چکا چم ٹِک کثغنتی ۔ حالانکہ چنیسرا لیلاآ ژہ تعلق بھورینتغ اثنت ۔ پر آنہی دلا لیلاآ پہ سانڑیں ایں مہر یک دم ہاغہ بیثہ ۔ باز و ختا رند ناغماں لیلا اے ڈولا کہ دیثئی تہ آنہی دلا ڈائے بیثہ ۔ ساہ درکپتئی ۔ ظاہریں کہ لیلاآ پہ دِہ ہمے ڈُک ساہ کشین اے اث۔ آں دِہ کپتہ او ساہ داثئی۔

ماہتاک سنگت کوئٹہ جولائی