میر، ادیرہ ئے میر

میر، ادیرہ ئے میر
مرچی اے ” بیران جاہا“ کہ کسے نہ گواہیت
پُر بوتگنت وشیں بو آئی حسثکیں نشانی
شک نقشانی،
چوکو ہنیں نام و توار ا تئی
کورو تامور،
ادیرہ
چو مرمریں سنگ ئے مُہریں قلاتا
کہ انگت نہ پُر شتگ بلے درفش ئے واک ئے شتگ

من غلامک ، تئی پیریں غلامک
تئی حاکیں سرونا چو بیو انک اوشتاتگاں ، چوکہ تو عمر ئے گُڈّی سرااچ نہرداں شت و گاراتئے
میر، ادیرہ ئے میر
مرچی حبرتاک ئے سیاہیں عکسے آ منا تئی گُور ا آرتگ
من دیستگ کہ ماہ ئے سرا دزرسا دُور۔ بیہار پسندیں ماہ ئے سر آ
آدمی ذاتے گام ایر کنان انت
منا گیر آہتگ ہما عہد کہ من پیادگ تو اسپا سوار
روچ و شپ
جہہ پہ جہہ
من تچان، ہیسک و ہنپان
تئی اسپ ئے دیما کپان و پُرشان
ہید بوتگ تئی ”شاہی ساہدار“
انگت بلے تئی غلامک (اے بنی آدمیں گنگدام )
چوش مرتگ کہ ہچ دم نہ برتگ
(برز اتحت ئے روان
جہلا منی تحت ئے پادگ سئیں)

میر، ادیرہ ئے میر
مرچی کہ تو مرتگ ئے ، من حیاتاں
ہما سر نہنگ ئے ڈگار
منی پیرک ئے دزکشانی کہ تو برت اچ من کہ پرچی منی چک، دُشک
پیرک و پس ئے کسبا بزاں ، اسپ ئے دیمپائی آ
وانگ ئے کنت و ڈالی
ہما سرنہنگ ئے ڈگار
مرچی رہن انت
منی نوکیں واجہ ،
تئی تنگویں پُسنگ آ زردوست اِنت چوشریں جِنک آ
چوبے وازداریں زمین آ

میر، ادیرہ میر
مرچی منی چک ، ہماوار و گاریں دشک ، کہ مرچی دوشمبے گُشنت ئے
حبرتاک ئے عکسا منا دات
تئی عہدی نمک واری ئے جت شگانا منا
گُشت۔۔۔
” آجوئی ماہ آ لگتمال کنت
ایردستی زمین زیر بیت۔۔۔۔
بے زبان گنگدام انت کہ عہدی غلام انت
قرن غیرت ئے چکاس ئے نام انت“
نیں مرچی اے ”بیران جاہا“ کہ کسے نہ گُواہیت
پُر بوتگنت وشیں بو آئی حُسثکیں نشانی
شک نقشانی،

چوکُو ہنیں نام و توار ا تئی
کورو تا مور
ادیرہ
چومرمریں سنگ ئے مُہریں قلاتا کہ انگت نہ پُرشتگ بلے درفش ئے واک ئے شتگ

من غلامک ، تئی پیریں غلامک

تئی حاکیں سرونا چو بیوانک اوشتاتگاں
چوکہ تو عمر ئے گُڈی سر ا اچ نہرداں شت و گاراتئے
جیڑگا آں۔۔۔
کہ مودگ کناں، کنداں، گریہاں کہ کہہ کہہ جناں
پُروشاں شکا کہ سوچاں ، تئی نام و توار ا
یا بگُڈاں وتی گنگدامی زبانا
یاوتی تژن سگّیں سر ا
یا کُشاں یکّیں بچ آوتی
اووتی زرد کشتیں غلامی آ
تئی میتیں واجہی آ گوں یکّ کناں