شرا ۔۔۔ عبدالعزیز بگٹی

آں یک لوغ ءَ گوں ثی بنوانی سرا نِشتئی اے۔ نزیغا دوہمی لوغ نیستَہ ثی۔ ماثی پِھذی یکے اث۔ دِیریں ناخوذات اَستہ ثنتی پر آں شہرانِشتیئے ثنت۔ پر آں دہ  ھَندے مالے سرا،او ھندے ڈغارے سرا یدر اِشیا گوں اَڑائینتیئے ثنت۔ اِشی اے دو کِسائیں بچ ا ثنت۔ مَسترین ءَ نام لِیمو او کَسترین ءَ نام خان بشک اث۔ لیمو دہ (10) سالیغہ و خان بشکہ عمر شَش سال اث۔ اِشی ءَ کمیں بْز و میش، سئے گوخ و یک دو ھْشتِر گوئر اث۔ وختے وھث مال ءَ شْذ و وختے دوئیں چھورواں نَزیخیں تَلاں بُڑت چارینت انت۔

یک پَھذیرے آ  سَرگواث کَشغئیث۔ گوئیل ءَ  روش ساڑتہ، پَھذا گواث بند بیئغئے سوب ءَ روش تَپتہ۔ پیشِینء َ وخت ءَ جْڑانی پْرزا درکپتَغنت و نَزگِرانا یاں ھَند بیثَغنت۔ جَہلیں پیشِینا گَرنداں گْھرکاٹ کْھذا۔ گِروخاں دے چِِیلْکانی جنغ بْنگیژ کْھذا۔ دِیغرا  ہؤر ایرکپتہ۔ ڈالائیں پْنڑی شَلانا ایر کپتغنت۔ ہے نہ بیثہ ڈغار آف آف بیثہ۔ پانچ و چْرّاں آف رائی کْھذا۔

اِشی ءَ وثی کوڈھال زْڑتؤ بَنو ءَ آفداری ءَ درکپتہ۔ دوئیں بچاں دے رَند گپتہ۔ سئے چیار گام جَث ئیش کہ اِشی ءَ بیروّ کْھذا، گوئشتئی بچ! شوا لوغ ءَ بی اے شوئے ماث یکیں کارا سوگھویں، شوا دوئیں وھذی ماث ءَ بَھڑائی ءَ دَئیتے و مالءَ را ریماں منہا شہ ایر کھنے دَئیتے“۔ پِھذءَ ٹھؤک اَشکوثؤ چھورّ گڑتغاں۔

اے آتکؤ بنواں پْجیثہ، کھؤرا  دے آف آڑتہ۔ نرمیں آفے اث۔ اِشیءَ را بازیں آفداری و کوڈھال جنغی چی نہ بیثہ۔

روش شْذؤ دیغرا ایر کپتہ۔ اِشی بنوّءَ جو ایر جَہلغہ۔ پہ ہمانکا کھؤرءَ آف گیشتِر اِشی بنوّءَ کپتغنت و گْشئے اِشی بنوّ پْر بیثہ۔

روش ٹْبی ءَ اِشی اے سئے دِیریں ناخوذات، گْلام حیدر، شَہذاذ و علی خان دے کوڈھالاں زْڑتی ءَ وثی ڈیھءَ آفداری ءَ آتکغنت۔ گلام حیدر ءَ گوئشتہ ; شوا گِندے مئے ڈیھ تیغہ ھْشکیں و کھؤرءَ آف کْل شاہ مراد ءَ بنوا کپتہ۔ اے مَڑد سانڑیءَ، ضرور ہؤرءَ لافا کھؤر بستؤ وھذی بنوا سراایر کْھذئی۔ شہذاذ زہر گِپتہ، کوڈھال زْڑتئی و علی خان ءَ پلوا زہرا گوں دیثؤ گوئشتئی کہ ;شاہ مراد بنوّ یدر پْر بیئغیں۔ اے دھکءَ خالی کھنونی۔ پھذا چماں سرءَ کنت“۔ علی خان چی اے پریشان دے بیثہ و گوئشتئی کہ”پرائی بنوانی بھورینغ جوان نئیں۔ غریب سالاں داں ھْذائی مِہراں ھِیلنت۔ شاہ مراد دَری اے نئیں، مئے ناخوزاتیں۔ اگر اے دَھکءَ مئے بنوّ پْر نہ بیثَغنت تہ پھذی دھکے ءَ آف ءَ مْوہرواں ٹاہینوں۔ دیمی سالا ھْذا ہؤران ءَ کھاری مئے بنواں دے آف ءَ کھوی“۔

غلام حیدر ءَ و شَہذاذ ءَ علی خان ءَ ٹھؤکءَ را گوش دے نداثہ۔ کوڈھال زْڑتؤ بنوّ نیامغہ شہ گْڈیثئیش۔

بانگھِنءَ کہ شاہ مراد ءَ لوغی گوخانی دوشغا کھڑو بیثہ تہ دیثئی بنو خالی ایں۔ اے تھْڑسیثہ و جلدی وھذی لوغ واژہ ہاغہ کھنغہ گَڑتہ۔ پریشانی ءَ سَہکانا گوئشتئی ; لیمو ءَ پِھذ،! کھڑو تہ بی و گِند، بنوّ خالی ایں۔ ضرور دوشی پْرشتہ“۔

شاہ مراد دے جلدی بانثرلتؤ کھڑو بیثہ۔ جلدی چماں مَلوہانا گوئشتی، ہیں“؟۔ چھے ءَ بھورینتہ؟ دوشی تہ پھذا ہؤر دے چی نیاتکہ کہ کھؤر ءَ آفے آڑتہ،او لَٹھ دے دانی مزنءَ ثی۔ آخر مْشک ٹْنگے ءَ بھورینتہ“۔

اِشی ءَ جلدی چبوپھاذاں کْھذَغنت و بنوّ ءَ کْنڈا رائی بیثہ۔ بنوءَ کَھنڈا گوئر کہ آتکہ تہ دیثئی کَھنڈا گوئر سَئے مڑدءَ رَنداں، بنوّ لَٹھا کوڈھالانی ڈَکّنت، دستا گْڈیثئیش۔ اے مَڑد ءَ جَھٹے رند گِپتغنت، نیٹہ گَڑتہ۔ اے باز دِلگران بیثہ و چم آف بیثغنتی۔ مونجھائی ءَ لوغا آتکہ۔ لوغی ءَ پھول کْھذا کہ بنوّ چھوں پْرشتہ؟ َ ساڑتیں ساہے کَشتہ و  گوئشتئی ; بنوّ پْرشتہ نہ، دستءَ لشکرے ءَ گْڈیثہ۔ اِشی لوغی ءَ گوناں ہمے اَشکوثہ، آف ءَ قدح دستئیثی، دستا شہ لَڑزان ءَ کپتئی۔ اِشی ءَ حَیران و پریشانی ءَ دست دفءَ داثہ و گوئشتی ; ہمے چھوئیں ظالم ءَ ثنت کہ گومہ قہر کْھذئیش۔ اللہ اِشّاں گار کنا کہ ما نغن جھذئیش۔ مئے سالانی ڈْکھ پھوک کْھذئیش۔ اِشانی دل ءَ تَرس دہ نیاتکہ کہ ما غریبے ءَ گوں قہرا کھنغاؤں“۔؟

شاہ مرادا مونجھائیءَ گوئشتہ ; بانْک! ایذا مڑدم ناحق کْشغ جی اغاینت، تؤ تہ گِپتہ نغن جنغہ۔ ناترساں پہ اے تہ آسانیں کارے۔ لوغی ءَ پھول کْھذا ; تھ کہ رَند دیثغاں تہ پَجھارتغنتے؟۔ اِشی ءَ ولدی داثہ ; رند تہ من پجھارتغنت پر من چھون کھنانِش، مناں شہ تہ سکّاں“ لوغی ءَ گوئشتہ ; تہ بَرو وڈیرا میرخانا دانھا دئیے۔ پھوڑیءَ اژمہ یدر گیڑت، مئے دانھہ نہ گیڑت؟“۔

”وڈیرایا تہ من دانھہ دیاں پر آں دے چی اے کھنت تہ“۔

اِشی ءَ آفی پْڑی واڑتؤ رائی بیثہ۔ گوئشتی ; من شہر ءَ رَؤغایاں، چھوروّاں ہاغہ کن مالا دیم دئیش، من بیگھِن ءَ گَڑداں“۔

روش گوئیل بیثہ، اے آتکؤ وڈیرا میرخان ءََ اوطاقا پْجیثہ۔ اوطاقا سئے چیار مڑد دوہمی دے شرائی نِشتئی اے۔ اِشیءَ سلام داثہ، و لشکرا سلام گڑدینتہ۔ وڈیرایا حال لوٹیثہ۔ اِشی ءَ حال حوال لافا وھذی دانھ ءَ پیرا داثہ۔ وڈیرا گوئشتہ; تہ بانگھا اے مْد ءَ بیا۔ من آہاں لوٹائیناں،،۔

گْڈی بانگھنا اے مڑد سَمبرتہ۔ لوغی ءَ را گوئشتئی  لوغئے و مالئے خیالا کن۔ من رواں وڈیرا مرشی مئے شراءَ کنت“ ساگی اے مڑد اَولی مْدءَ اوطاقا آتکہ۔ وڈیرہ میرخان و یکے آں سئیں مڑد پیشہ نِشتئی ائیثاں۔ حالی حوالی بیغہ رندا وڈیرہ گوئشتہ، شاہ مراد تہ وثی بیاناں دئیے۔ شاہ مرادا وتی بیان داثغنت کہ سائیں ; اے سئیں مڑداں مئیں بنوّ ناحق ءَ گْڈیثہ، مئیں سالئے ڈْکھ پھوک کْھذئیش، مئیں نغن جھذئیش۔ گومن ویل کْھذئیش“۔

وڈیرایا آں مڑداں شہ پھول کْھذا کہ شوا چھے گوشے؟۔ شہذاذا گوئشتہ ; سائیں، ہَؤر کہ پھیذاغیں، اے مڑد ہموذا سانڑی ایں، یدر کھؤرءَ بندی وھذی بنوا پلوا گڑدینی۔ ما کھاؤں گِندوں مئے ڈیھ حْشکیں۔ آف مئے آپتہ بَہریں پر مئے بَہرا  دے یدر اے مڑد بَرغیں۔ ما اے دھکءَ اِشی بنوّ سرِ زہرا گْڈیثہ۔ نی تہ ہمانرنگیں شرائے  کنئے مار ءَ قبولیں۔

شاہ مرادا دانہانی کھنغا اڑائینتہ۔; ناخوذات! ھْذا ترسی ءَ کن، بہوخیں کھؤر مئیں دست ءَ کوڈھالاں گوں تھاں رنگا  بند ے جی؟،،

وڈیرایا شاہمراد ءَ شہ پھول کْھذا ; تھہ نواں ٹریکٹر ءَ گوں بندغائی؟،، اِشی ءَ گوئشتہ ; سائیں! اگر من ٹریکٹر ءَ گوں اے لشکرءَ جو ءَ دف بستہ تہ ہماں کار پدھریں۔ شوا بیائے گِندے ا تی۔،،

گلام حیدر ا گوئشتہ ; مار سما نئیں کہ تہ چھے یا گوں آف ءَ گڑدینغہ، پر مئے ڈیھا یدر ہوشینغہ۔ ،،

وڈیرایا گلام حیدر ءَ شہ پھول کْھذا کہ شوا وھذی جو آ کارا کھنغائے؟“۔ شہذاذ پیشی بیثؤ ولدی داثئی۔ جی ہا سائیں ما ہر سال کارا کھنغاؤں پر مئے ڈیھ یدر ھْشکیں۔“

وڈیرایا لہذ ے چْپ کھْذا۔ سوچ کھذئی و گوئشتی۔ مئی فیصلہ اِشیں کہ شاہمراد!تہ کوڑائے،  تہ وھذی جوءَ را کارا نواکن۔آف کہ شوے شریکیں تہ وھذی بنوّ ءَ یدر کرا کھْذؤ چھے ءَ پر کھنغہ۔ تھہ گِندغہ دے آں مڑدانی جو خرابیں، تھہ جوءَ را کارا نواں کن چھون آنکہ اے مڑدانی بنوّ دے آف گیر بنت۔  آئندہ اگر تھئی بنو پْر بیثہ و اِشانی ھْشک بیثغاں گْڈ من تھرا بنداں دے و اِشانی سال ءَ حاصل ءَ دے اَشتہ گِراں۔،،

شاہمرادا پٹکا کشتؤ وڈیرا پاذاں اِیر کھذا گِرے گْٹ بیثؤ گوئشتئی ; سائیں! ہمے قہرا گومن مہ کن۔ یکے تہ اِشاں گومن ویل کھذا، مئیں سال ءَ نغن جھذئیش، دوہمی تہ دے گومن ویلا کھنغہ۔،،

وڈیرایا پٹکا زْڑتؤ دست ءَ داثہ گوئشتئی ; بس شرا بیثہ نی ہرکسے ِ نہ منی من ہمانہی ءَ َ قید کھنائیناں۔

شہذاذ بِشکندیثہ و گوئشتئی ; سائیں! مار تھئی شرا منظوریں“۔ وڈیرہ کھڑو بیثہ۔ اے لشکر دے کھڑو بیثغنت۔ شاہمرادا مونجھائی ءَ وثی پٹکا بستہ و چْپی ءَ موسْکھ داثئی۔ اے مڑد کْل اوطاق ءَ شہ درکپتغنت۔ وڈیرایا شہذاذ گوانک جھذؤ گڑدینتہ۔ دوئیناں یک دوہمی پلوا دیثہ۔ دوئیناں بِشکندیثہ۔ وڈیرہ گوئشتہ نی ہماں سامان ءَ بیگھنا بیار، مناں درکاراں۔ شہذاذا کندیثؤ دست ڈوبرءَ سرا ایر کھذا۔ سائیں! تہ بے فکر بی۔“