ہژدمی برومیئر ۔۔۔ کارل مارکس

اسمبلی اندرا او پریس ءَ لافا پرولتاریہ ئے لیڈر یک پہ یکی آ عدالتہ قربان جاہاں آرغ بنت و اِشانی ہندا زیات بے باوریں مڑدم اسمبلی و مطبوعاتہ اندرا کا ینت۔ پرولتاریہ ئے یک بہرے وثار نظریاتی تجربہ آنی اندرءَ سٹی،”ایکسچینج بنکانی اور مزدور ایسوسی ایشنانی“ اندرءَ سٹی،بزاں ہمنگیں تحریکے لافا کہ آنہی اندرا کہنیں دنیا ئے جند ءَ زبردستیں اواریں وسیلہ آں گوں آں کہنیں دنیا ئے بدل کنغہ رد کنت، او بلکہ سماجہ مُسکا،بالکل ذاتی بھیر ا وثی ہستی ئے محدودیں حالتالی اندرا ڈولے نہ ڈولے وثی آزادی گرغہ پولی اوگڑہ لازمی ہر دھکے پروشہ واڑت۔ معلوم بی کہ ہمے پرولتاریہ اندرا نَیں اکھریں ناغے استیں کہ وثی اولی ڈولیں انقلابی مزں شانی آ دوار بہ گیڑت، نہ ہمکریں ہمتے استنیں کہ وثی تازہ ایں سنگتانی شریخی آ گوں نوخیں طاغتے دستابیاری،داں وختیکہ ہماں کُل کلاس کہ ہما ہاں گوں اشیا جونہ لافا مقابلہ کثغ اث،وث بے دم بنت ء ُ دریپا ٹا کناناں کفنت۔ خیر کم از کم اکھر تہ بیثہ کہ پرولتاریہ مزائیں جہانی تاریخی جہد ئے اعزازاں ژہ دستاں شوذی۔چھڑو فرانس نہ بلکنادراہیں یورپ جون ئے زمیں چنڈا لڑزینتہ۔ حالانکہ بڑزی کلاسانی ریسینغ او جنغ و شکست اکھر ارزاں بہائی آ گرغ بنت کہ وث سوب مندیں دُھر ا بے شرمی آ گوں ودھینغ و بیاں کنغ ئے ضرورت کفی کہ بلاّں آں ہم مزنیں واقعہ شمار کنغ بہ بنت،او پرولتاری پارٹی آ ژہ پروش وا ڑتغیں پارٹی ہر چی کہ دیر کنزی، رند ئے ہمے پروش اغدہ زیات شرمناک بیاناں رونت۔

راست اشیں کہ جون ئے یاغیانی پروشا ہماں زمین تیار کثہ کہ آنہی چکا بورژوائی رپبلکہ ماڑی جکینتہ بیئے،پر بہ یک وقت اے دِہ ڈسثئی کہ یورپہ اندرامرشی ”رپبلک یا بادشاہی“ ئے بحث نہ ایں بلکہ ٹوک دوہمی اے۔ اے پروشا اے ڈسثہ کہ بورژوارپبلکہ مطلب ایذااشیں کہ یک کلاسے دوہمی کلاسانی سرا بے حدیں ڈکٹیٹری آ چلائینی۔ اشیا اے ثابت کثغ اث کہ کہنیں سولائزیشنئے واژھیں ملکانی اندرا،اوذکہ کلاسانی ساخت باز دیم شتی ایں،پیداوار ئے حالت ماڈرن انت او دانش اے سندھو آ داں پجثی اَیں کہ قرنانی اثر ا سجہ ایں روایتی خیال حل کثو گارکثغنت،اوذا رپبلکہ مطلب چھڑو بورژوا سماجئے انقلابہ سیاسی دروشمیں،نہ کہ زیندھئے قدامت پسندیں دروشم۔ پہ مثال قطبی امریکہ ئے اواریں ریاستانی اندرا تو نڑیں کہ کلاس استنت بلے تننگافکس نہ ینت بلکنا دھروذ مسلسل ایں بہند ہ تہا وثی عنصراں بدل کن انت و یک دوہمی اندرا مٹّائیناناں رونت۔ ہموذا پیداوار ئے ماڈرنیں وسیلہ بجائے یک جامدیں بے ناغیں سرسیں آبادی اے ءَ گوں ہم آہنگ بیغا،مڑدمانی یا پورہا تیانی کمی ئے پیلہ کنغا پہ کارا کنغاینت، او ہموذ کہ بالآخر میٹیریل پیداوار ئے  پرجوشیں تحریک،کہ تننگا پروث نوخیں دنیائے ٹاھینغی اینیں،اکھر دزگٹیں کہ کہنیں جناّنی دنیا ئے ختم کنغا پہ نَیں وخت استنی اونیں موقع وگیغ۔

جون ئے روشاں سجہ ایں کلاس و پارٹیاں اوار بیثو پرولتاری کلاسہ خلا فا ”ضابطہ پارٹی“ ٹاہینتہ کہ اشی حیثیت”انارکی پارٹی“ ایغ اث،سوشلزمہ پارٹی ایغ اث او کمیونزمہ پارٹی ایغ اث۔آنہاں سماج ژہ ”سماجئے دژمناں“ ”بچائینتہ“۔ آنہاں وثی فوجا را کہنیں سماجئے ٹوک بزاں ”ملکیت،خاندان، مذہب،قاعدہ قانون“ ئے لفظ پجھاڑتغیں لفظانی بھیرا داثع انت۔ او انقلاب مخالفیں مجاہد گوں اے نعرہا شاکار تغنت ”اے صلیب ئے سایا سو ب شمئے غیں“۔(1)۔شماں ساعتا ہروختیکہ ہمے بیرکہ شیرامچ بیثغیں بازیں پارٹیاں ژہ یکے جون ئے یاغی آنی مقابلہا کڑوبیثہ کہ بلاّں انقلابی جنگہ پڑ ا وثی جند ہ طبقاتی فائدہ آں پہ قبضہ آ بہ کنت تو آں گوں اے نعرہا پروش دیغہ بی:”ملکیت، خاندان،مذہب،قاعدہ قانون“۔ ہر دھکے کہ حاکمانی اثر کم بیاناں روث،ہر دھکے کہ زیات عامیں مفادانی  ہندا خاصیں مفاد بڑز دست بنت تو گشغہ بی کہ سماج بچائینے جیثہ۔ تو نڑیں سادہ ایں بورژوا مالی اصلاح ئے تقاضا بہ بی، یا معمولڑی ایں لبرلزمئے لوٹ بہ بی، یا سادڑائیں رسمی ایں رپبلکن ازم ئے طلب بہ بی،یا خالی او ہورگیں جمہوریت ئے لوٹ بہ بی ہمے کل ”سماجہ چکا حملہ“ گشغ او بدنام کنغہ بنت او ”سوشلزم“ ءَ سیاہغ دیغ بی ثش۔ او آخر ا،”مذہب او قانون قاعدہ“ ئے ملاّ او چوکیدارانی جند روحانی تخت و ممبراں ژہ دڑوّاں جناناں ایرگیژغ بنت، نیم شفاں او چنڑاں ژہ درءَ گیہلینے جنت،جیل خانہ ئے گاڈی آں ماں کنغ بنت اوجیلا ماں کنے جنت یا جلا وطن کنغ بنت،آنہانی مندر دراہینغ و زمین ءَ اوار کنغ بنت،آنہانی دف سِیل مُہر کنغ بنت،آنہانی قلم بھورینے جنت،آنہانی قانون پنا پنا کنغ و دِنےّ جنت،مذہب،ملکیت،خاندان او قاعدہ قانونہ نام چکا۔ قاعدہ قانون ئے عاشقیں بورژوا انتہا پسند وثی بالکونی آنی چکاژہ شراب واڑتغیں سپاھیانی ٹولیانی دیسی ایں توپکاں گوں جہلہ پرینغ بنت،آنہانی پناہ گاہ دراہینغ بنت،آنہانی لوغ ہنچو مسخرا او کند کندا پہ بمبگوار بنت…………ملکیت،خاندان،مذہب او قاعدہ قانونہ نام ءَ چکا۔ آخر ا،بورژوا سماج ئے گندھ و گرائی آں ژہ قاعدہ قانون ئے پاکیں فوج ٹاہینے جی اوہیرو کراپولنسکی(لوئی بونا پارٹ) وثار”سماج ئے بچا ئینوخ“ ءَ حیثیتا توئی لری ئے  بادشاہی تختہ نیا ذینی۔

ریفرنسز

۔1۔مارکسا دوہمی، سیمی قرنئے کہنیں یونانی مصنف اتھینالوسہ قصہا ژہ فائدہ زڑتہ۔ ہمے مصنفا وثی کتاب ”دسترخوانا“ بیان کثہ کہ مصرہ فرعون طاحونسا سپارٹاک بادشاہ اگی سلائی ئے پُٹک بیغہ سرا(کہ وثی فوج زڑتوفرعونہ کمکا پہ آتکغث) ملنڈ کثہ:“ ٹیٹرہ لاف پُر اث۔ زیوس خدا دیثو تڑ سثہ۔ بلے ٹیٹرا ژہ مُشکے دراتکہ“۔ ہمے ملنڈ ہ سرا اگی سلائیا ولدی داثہ ”نیں تہ مں ترامُشکے مانا غاں۔ وخت کیث کہ تہ مناں مزارے گندئے“۔