بنیاد پرستی او ادیب ۔۔۔ سلطان نعیم قیصرانڑیں

گیستمی صدی ئے آخری دھاگ باز پر آشوب ایں۔1990ئے آخری دھاگ ئے اول سرایں۔ پرشت پروش ئے عمل ہر میذان نیا ماباز تیزیں ۔ معلوم بیث کہ گیست و یکمی صدی سیاسی ، مالی او جغرافیائی حوالہاں شہ دنیا ئے نقشہ اندرا گوں بازیں تبدیلیاں بنا بیث ۔ بنیادی سوب ایش انت کہ انسان ئے زانت (کائنات و ذات ) پختہ تربیغیں۔ گیسمتی صدی ئے شروع انسانئے طبقاتی زانت ئے ترند تربیغ ئے دور وباری ایں۔ دوہمی مزائیں جنگا شہ رندا سوشلسٹ بلا کئے محکمی آ اے شعورمہمیز کثہ، آنہی نتیجہ آ دنیا ئے نقشہ لافا بازیں انقلاب آتکغ انت۔ جرمنی نیا ما فاشزما پروش واڑتہ ۔ آنہی پروشا انگریزی استعمار اہمکریں دھکے داثہ کہ وختے کہ آنہی بادشاہی چکاروش ایرشت نیست ات ، نیں آں داں یونا ئیٹڈ کنگڈما محدود بیثہ ۔ آنہی مقابلہ نیاما امریکہ یک نوخیں سامراجے ڈولا دیما آتکہ۔ پرچہ کہ دومی مزنیں جنگا امریکا ئے سر ا براہ راست ہچ منفی اثر نخثہ بلکہ نازی جرمنی ئے سائنسدان و زانتکار درکپتو امریکاآ شتغ انت و او ذاسائنس ٹیکنالوجی و صنعتا رانوخیں ر دو مے داث ایش۔ آنہی نتیجہ آ امریکہ سرمایہ داری ئے آخری منزل بزاں داں سامراجا پجثہ۔ آنہیا وثی ہمے تاگتا شہ کار گپتو جدید نو آبادی نظامے بناکثہ وہرآں ملک کہ اے شیطانی نظام ئے جنترانی پُڑانی شیرا نارغ و چینہگغا اثاں آنہانی محنت کش اولس ئے طبقاتی شعور دہ ودھثہ ۔ اے شعور ئے ودھائنیغ نیاما ادیب و زانتکاراں وثی رول پیلوی آ ادا کثہ۔ رافیل البرٹی‘رومین رولاں‘ بنجامن مولائس ‘آزات جمالدینی ۔۔ و فیض آ ابید صد ہادومی نام است انت ، آنکہ ادبی تاریخ ئے آزمانا جلشکوخیں استارنت ۔ طبقاتی زانتئے ترندتربیغا گوں آزادی ئے زرمبشتاں جدید نو آبادتی نظام ئے زوراخی خلافا زور بستہ ، ھندے آ اے زر مبشت گوں سوبا وثی منزلا شتو سربیثغ انت و ھندے آ وثی دری و اندری حالاتانی سوبا پذاسرا تکغ انت ۔
گیستمی صدی ئے آخری دھاگ نیاما دنیا ئے پرشت و پروش ئے عمل یک نوخیں دورے نیاما داخل بیثہ۔ انسان وثی کائنات و زانت و شعور ئے پختگی آ گوں دیما روغیں۔ مشرقی یورپ و سوشلسٹ دنیا وثی پہناذاں بدل کھنغ ایں ۔ دراھیں دنیا ئے دیما اے نوخیں نہرے بڑز بیغ ایں کہ آں کلیں دنیا آ گوں نوخیں چیلنجا ں دیم پہ دیم کھنغ ایں ۔ پریسترائیکایاگلاس نوسٹ ئے اے عملا اوذکہ فرد و فکر و سیاسی آزاتی ئے نوخیں راہ بوتکغنت اوذا آنہیا قومی و مذہبی بنیاد پرستی ئے لہردہ گوں نوخیں تاگتے آ دیما آڑتہ ۔ اے قومی و دینی بنیاد پرستی ئے جنون ایران ، ہندوستان ، پاکستان، افغانستان، مصر، عراق و ترکی آ ابید مشرقی یورپ ا و وث سوویت یونین ئے جند نیاما دہ گندغ بیث ۔ ترقی پذیر دنیا نیاما اخوان المسلمین، جماعت اسلامی،حزب اسلامی او راشڑیہ سوک سنگ ئے شکل نیاما،یا پہ ناما قومی علاقائی پارٹیانی ڈولا سہرا او پدرا انت۔ آں ملکالی نیاما کہ جمہوری عمل او جمہوری ادارہ محکم انت اوذ ا شاید اے ڈولیں جنوں تاں دیر جزث مونت پراوذ کہ جمہوری عمل مارشل لا و فوجیانی دستاں شہ بے ہند بیثہ آں ملکانی نیاما چوشیں تحریکاں پہ زانت دیم آرغ بیثہ تاکہ آں جمہوری قوتانی مقابلہ آ نہ صرف دیم پہ دیم اوشتات بنت بلکہ آنہانی سربور ینغ ئے واستادہ گوں ہماں غیر جمہوری تاگتاں دزکمک کث کن انت۔
شاونزمِ قومی بیث یادینی بہرحال شاونزم ایں ۔او اے بنیاد پرستی ئے یہ مظہرے ۔آں امن و جمہوریت ئے ضد یں۔ ہمے واستا مروشیگیں ادیباں اے گنڑغ و وزت کھنغ پہ کاریں کہ اشی خلافا جنگ و جتل ہیلسنکی ئے ہماں قرار داد ئے وڑ ا جاری کھنغی بیث۔ آں قرار داد تہا اے فیصلہ بیثغہ کہ فاشزم ئے ضد جنگ دراہیں دنیا ئے ادیبانی جنگیں ۔
’’ماامن لوٹوں ، کپوت مئے امن ئے سمبل انت اوقلم مئے چیذغ ۔ماآنہی عزت سرا ہچ ٹوک آغا نیلوں۔ اے قول ہماں قرارداد کنغ بیثہ۔ اشی سرا کل ادیباں نہ صرف دزخت کھثغ انت بلکہ آنہاں ہسپانیہ نیاما فاشزم ئے خلافا عملی جنگ نیامادہ بہر زڑتغ اث، پرچے کہ اے جنگ تہذیب وحسن ئے بچائینغ ئے جنگ اث۔ ہمے موقع سرا ’’ رومین رولاں‘‘ آوثی یک پیغامے نیاما گوشتغ اث:
’’وختے کہ جہانی کلچر فاشسٹانی دستاں برباد بیغ بیث ہماں وختا ادیب ئے کار کلچر و زیبائی ئے حفاظتا پہ جدوجہد کنغ بیث‘‘ ۔1979نیاما ادیبانی بین الاقوامی کانگریس منعقدہ صوفیہ نیاما ہسپانوی شاعر ’’رافیل البرٹی‘‘ آ (آنہیاکہ فاشزم ئے خلافا ہسپانیہ جنگ آزادی لافا پنچمی رجمنٹ نیاما بہرزڑتغ اث) گوشتغ اث:
ماجتا جتائیں ڈیہانی ادیب ایذا ساڑی اوں ۔ مابایدیں کہ ہیلسنکی ئے ترتیب داثغیں دستاویز ا مہ شمو شوں۔ ہمے دستاویز ئے روح امن ئے روح ایں ۔اے دستاویز امیت اے ،روژنائی اے ۔ ماباید یں کہ اے روژنائیا تسغا میلوں۔ ماامن ئے مرگ ئے پرانی پٹغا نیلوں ۔ ما اِشی پر اں سلامت داروں تاکہ ہمے امن ئے مرگ اے گلزمین ئے آزادی و امن ئے پیغاما پجائینت کنت اوہر دلا امن ئے وہاو و خیالاں گوں پرکث بہ کنت‘‘۔
1979ئے سال چُکانی بین الاقوامی سال اث۔1990ئے سال زالانی سال انت۔ زال و چُک کائنات نیاما تخلیقی عنصر ئے لازمی بہرانت ، اے زبیائی ذوق سلیم ئے چیذغ انت۔ زال شہ چُکا سوا او چک شہ زالا ابیدبے نشان انت و بے ہیذغ انت۔ مار وثی چاگرد ا گندغی کفیث کہ ما اے چیذغانی بورینو خانی دیماداں چکھر حد ا اوشتا ثغااوں۔ مئے نزیخیں ملک افغانستان وایران نیاما بنیاد پرستی ئے اے لہرا دراہیں لوغ، کسان کسانیں چُک ، ورنا ئیں زال، پیریں مڑد و جن ہونانی لہڑ لافا بوڈ التغ انت ۔ لیکن بنیاد پرستانی ہون واری دنیخادہ نہ صرف کم نویثہ بلکہ بے سوبیاں گوں دیم پہ دیم بیغ ئے آ سرا اغدہ گیش بیثہ ۔مئے ملک سرایازدہ سال ئے دراژیں سہمی مارشل لا پھذانیم جمہوری حکومت ہنچوش وثارا بے دست و پاذ زانغا ایں کہ آں گوئستغیں دور ئے پالیسیاں پہ بر جاد ارغا مجبور معلوم بیث پر چے کہ اے دراہیں استحصالی حکمران طبقہانی نمائندگ انت۔ ہمے سوب انت کہ جنیوا ئے معاہدہ سرا ہچ عمل نویغیں و افغانستان نیاما بنیاد پرست وثی ہوں واری آ جاری داشتغاانت۔او وہاواں گندغا انت کہ کابل وسمرقندو بخارا نیاما برواں وثی بیرکاں چست کن انت و آمر مطلق ضیا الحق ئے قضا بیثغ ایں نواشاں بوان انت ۔ مئے حکمران طبقہاں ہچبرا شہ تاریخا سبق نہ گپتہ۔ ہمے سوبیں کہ آنہاں ہچبر بنیاد پرستی خلافا چوشیں گام زڑت نہ خثغنت او نئے چوشیں اقدار ٹھا ہینتغ انت اش کہ معاشرہ نیاما جوانیں و آزاتیں فکر و خیال ئے رژنائیں قدرانی شاغ کھنغ نیاما پھیلوی آ ناکام بیثغ نت ۔ریڈیو یا ٹیلیویژن نیاما اغر موسیقی ئے ، آرٹے یادومی چوشیں ثقافتی پروگرامے بیئث کہ آنہی نیاما چھی اے روشن خیالی ئے بہرے ماں بیث تہ بنیاد پرست آ نہی آ فحاشی گش انت ۔حتیٰ کہ کلاسیکل موسیقی پروگرام’’ راگ رنگ‘‘ دہ آنہانی واستا فحاشی انت ۔ چوش معلوم بی کہ ہمے ترسا شہ حکمران ایشانی دیما ہتھیارپھر ینتغ اَنت و ناکام انت۔
وثی اے کلیں ناکامیانی اوڈھردیغ واستامرشی کشمیر ئے مسئلہ آ بار ہا آنہانی اپروچ اسل ہماں بنیاد پرستی ئیگ انت ۔شہ ایشی آ فائدہ زڑ تھوضیائی باقیات ئے جمہوریت دژمن آہانی اے عملا راجنگ پھلو ادھکو دیغ ئے کوششا کھنغ انت ۔میجر سعید ٹوانہ ڈولیں بنیاد پرستیں نام نہادیں ادیب جنگی تھیوریاں داثو جنگی جنوناودھا ئینغ ئے کوششانت لیکن زاناں ہچے ادیبے چوش دہ وزتاکھنغ انت کہ کشمیر و افغانستان نیاما چھے لیو کھنغ آ انت۔ کشمیری شاعروادیب عبدالستار ربخور کہ کھشتغاشتہ۔ آنہیاچے لوٹ اث؟۔ میر مصطفےٰ ئے گناہ ہمیش اث کہ آں سیکولر و رژنا فکر دارو خیں سیاست کارے اث۔ ایشانی خبرتہ آتکا لیکن دومی چھکر چُک مرشی مذہبی جنون و بنیات پرستی ئے ’’ سیاہیں دیوی‘‘ ئے قربان جاہا یتیم بیغ انت ۔ حیف انت آں ادیبانی سراکہ بنیاد پرستانی ترساشہ دولوز دہ ’’ ہیلسنکی ‘‘ ئے چیذغ نیاما گاڈیرت نہ خن انت۔
۔1979ئے ادیبانی بین الاقوامی کانگریس نیاماگشغ بیثہ :۔
مامنوں کہ ہمے رنگیں جنگ ہم بنت آں کہ انصاف و آزادی ئے خاطر ا کنغ بنت پرجنگانی اصلیں سوب ہمیش غیر انسانی و مژارو بنت ۔ جنگ مڑدمانی جند ئے انفرادیتا برباد کن انت۔ اے پہ انسانیتا یک کُشوخیں زہرے ، اے جنگ زیبائی ، ازم و کلچر ھر شہہ آ شوشی پُھرانی ڈھیری یے نیاما بدل کنت‘‘
ایذامنا مست توکلی ‘ ئے اے ابدمانیں شیر ئے گالے یاد آیغ اِنت:
جوان نہ اینت جنگانی بذیں بولی
کئے وثی جوائیں سنگتاں رولی
ہمے کانگریس نیاما اپیل کنغ بیثہ کہ :
’’ وثی قلماوثی ازما وثی پوہی آاو علم آ پہ یک نوخیں مردمے پیلویں مردمے و ڈسپلن والائیں مڑدمے پیداکنغ و آنہی رووم ئے خاطر ا وقف بہ کن ایث ۔ شماخالقیں یک نوخیں دورے ئے ،یک انصاف داریں نظامے ئے، یک نوخیں سماجے ئے۔ ہمنگیں دنیائے یئے اوذاکہ زیبائی ئے ‘و زیبائی قانونئے دور و باری بیث ‘‘۔
مروشگیں ادیب ئے سرا اے ذمہ داری اغہ دہ گیش انت کہ آں امن ئے ا و وشحالی ئے وا ستاوتی قلم ئے استعمالا گوں دلیری و تاگتابکنت ، پرچے کہ مرشی شعور ذات ئے عمل دیما روغا انت۔ انسانا گوں فطرتا جنگ کھثو آنہیارا داں بازحد ا وثی باندی کھنغ آ انت۔ طبقاتی جنگانی نتیجہ نیاما آنہیا انقلاب آڑتغ انت، اے آنہی شعور (کائنات و طبقات ) ئے بہر ثنت بلے شعور ذاتئے حوالہا شہ آنہیا راگوں وثی اندرا دِہ جنگ کنغی ایں تاکہ آں وثی جند ا راشہ چوشیں موقع پرستیاں و وثی جند ئے مفاداں بڑ زترکنت تاکہ آں بنیاد پرستی و مذہبی و قومی جنوناں شہ بنی نوع انسان ئے فکر ا راآزات کنت و امن و آشتی ئے پیغاما انسانیت ئے لوغ لوغا داں پجائین ایث۔