امیتانی بانک ۔۔۔ ضیاء شفیع

ماما تو کجا نشتگے؟؟
من۔۔۔۔۔ من شاہی بازار مسقطا
نا ۔۔۔ماما من تئی بنکی ھلکے جستایاں
منی بنکی ھلک پیشکان ایں۔
پیشکان؟
او ۔ پیشکان، تو زانا پیشکا ن نہ دیستہ؟
منا یاد نہ ایں، بوت کن دیستہ۔۔۔ بلیں ترا چنکہ سال انت مسقطا؟
منا سی و نو سال ایں
سی و نو سال۔۔۔۔ اررے ماما اے سی و نو سال تو چون گوازینت بے ماث و پس و بے سیاد و وارثاں؟
من بیست و پنچ سال مسقط پوجے تہا گوازینت و پدا چاردہ سال گوں وتی زھگ و نواسگاں۔
اے سی و نو سالے تہا تو چنکہ وار وتی ملکا شتے؟
وتی ملکا۔۔۔۔۔۔ ہچ پہ ہچ
تئی برداشتا سلام ایں۔ منا نوکی سئے ما ہ بیت من نشت نہ کناں ۔ تو سئے زند گوازینتہ د انگہ سرگی نہ ئے۔
بس منی چک برداشت لوٹیت۔
کجام برداشت۔ منی دیما برداشت دو قسمے آں، یکے پیسہے واستہ برداشت و دومی ساہے واستہ برداشت۔
ساہے واستہ برداشتا من نزاناں بلیں پیسہے واستہ من برداشت نہ کرتہ۔ تو بلکیں سرپد نہ ئے مسقط گورنمنٹا دیریں جار جتگ کہ ہما مرد کہ مسقط پوجا بوتگ، آ اگاں مسقطے شہریت لوٹیت گڑا ریٹائیر بوھگا پد پانزدہ سال اگاں آ مسقطا نشت و نہ مرت گڑا آےئرا شہریت دیگ بیت۔
او۔۔۔۔۔ انوں بزاں تئی یک سالے پشت کپتہ۔
او منی چک ۔اے یک سال ہم پہ بلے بلے رؤت۔
پدا گڑا؟
پدا چے؟
پدا اگاں ترا شہریت رست تو وتی ملکا سیاد و وارثانی گندگا رؤے؟
مشکل ایں۔
او ۔ چونہا باز مشکل ایں۔۔۔۔ ماما تو وتی نام منا نہ گشت۔
منی نام۔۔۔۔۔ منی نام قربانوں۔ سالم البلوشی
البلوشی؟
او البلوشی
ماما اے البلوشی چی ائے۔
بچار منی چک انوں بلوچے نام کمو کہن تر بوتہ۔ ہمے واستہ ما خلیج والا البلوشی لکھاں وتی نامانی دیما۔ کمو چرپ تر و وشتر ایں۔
مں سرپد نہ اں۔ بلیں ماما سنگتے منا گشیت کہ ہر کس وتی ملکا نشتگ وتی ھا کنت و وارت آ بلوچے و ہرکس دومی ملکا نشتگ و عربانی ھا کنت و وارت آ البلوشی۔
قربانوں تو ردے۔
ماما تئی بزاں انوں ملکا روھگے تیاری نیست نا۔؟
مسقط یک سالے بعد منی وتی بیت۔ پدا چون کنے آ اشکاوگیں ڈگارا۔
ماما تو منا گشت کنے تئی پس و ماث انگہ زندگاں یا اللہ ھا وتی مال کرتگاں۔
منی پس دیریں مرتہ ۔ ماثا شش سال بیت کورایں۔ بلیں انگہ ملکا ایں۔منی دعا ایں جلدی اللہ وتی مال بکنتے۔
بلیں ماما تئی ماث ایں۔ پہ ماثے مرگہ دعا مکن۔ ماث کور بہ بیت یا منڈ۔ ماثے بدل نیست۔ تو وتی جاہ دگرے اگاں گشیت تو بد بہ بر۔
تو انوں وتی ماثے ھال گپتہ چوں ایں۔؟
او کور یں کپتہ۔
تئی وتی درائیں چک گوں جن و نواسگاں منی خیالا مسقطا آورتگ اں۔ یکیں ماث پشتا جتہ۔
ماث سک نزو کور انت سپر کرت نہ کنت ہمے واستہ من گوں وتی گہارا ہمودہ یل دات۔۔۔۔۔ تو گپے سرپدے؟
نا ماما کجام گپ؟
من گوستگیں سالا وتی جن برت و وت ہم شتاں۔
کجا؟
حجا شوم۔ من وتی پسے واستہ شتاں و وتی جن وتی ماثے واستہ حج کنائینت۔
ماشاء اللہ۔۔۔ مبارک بات شمارا۔۔۔۔۔۔۔
بل وتی چمچہی آ۔۔۔۔۔ تو اے بگش تو پہ من کدی مہر کرتہ کہ منا چوسر و سوج کنگائے۔
ماما تو بلکیں سرپد نہ ئے کہ من تئی واستہ چیا آتگ انت منا پہ تئی واستہ کلوہ ئے گوں۔
کلوہ۔۔۔۔۔؟
او کلوہ۔
بگش چے کلوہے باریں؟
کلو ہ ایش انت کہ من کراچی آ گوں تئی سیادے آ دوچار کپتاں۔ منا ہمائی وتی ٹیکسی ئے سرا ائیرپورٹا آورت و رسیت ۔ من کہ زر دات منی زر نہ زرت انتے۔ گشتے زرانی بدلا منی بلکے پیگاما پہ منی ماما ے ادا رسین۔
چے گشتے شومیں بلکے نواسگا؟
گشتے منی ماما بگش ’’ تئی ماث سراکور ات، بلیں انوں سک نزور انت و شہ پاداں ہم کپتہ۔ بلیں انگہ نہ کہ پنڈیت نہ ہمساہگانی باجیاں وارت۔ بس تئی ودارا انت۔‘‘
منی گہار۔۔؟
تئی گہار۔۔۔۔۔؟ تئی کجام گہار۔ آ تئی گہار نہ انت، آ امیتانی بانک ایں۔ ہما بانک کہ ہزاراں سال انت ہنگول ے کہورا وتی براتانی واستہ راہچار انت۔۔۔۔۔۔۔۔ نہ واب زانت نہ آگہی۔۔۔۔۔ بس چمے گوں راہا جنوک انت کہ کدی ہنگول ے کہور ھار کنت و منی برات کایاں وتی ملکاں آباد کناں۔ ۔۔۔۔۔۔۔۔۔۔ سک تہنا ایں۔ نانی ماتا تئی گہارے ہمساہگ ایں منی نانی ماتے گوارا ہم ساعتے نہ رؤت، بس گنوک ایں یکیں جاہا اوشتوک انت۔ کدی کدی من کہ ہورت ہورت چارینے منا انچو گمان بیت کہ ہمیش انت بس کوکارے جنت و کیت جہلہ و سڑکے سرے گوستگیں مسافراں مستاگی گیپت و گشیت۔ آ منی براتیں۔۔۔۔۔ منی برات سالم ۔۔۔۔۔۔۔۔۔ آ ایں شہ کنڈ ملیرا دیم پہ ہنگولا ودی انت۔ بس منی واستہ۔ بس وتی گہارے واستہ۔ بس وتی امیتانی بانکے واستہ۔۔۔۔۔۔۔۔۔۔۔!