مبارک قاضی پر فکریں شاعر

مبارک قاضی شخصیت او علم و ادب وثی وطنہ خاطرا آنہی جہدو خذمت کھسا شہ لکھزی آ نہ انت۔بلوچی زوان و ادبا پہ واسطہ آنہی خذمت بے مٹ و بے مثال انت۔آنہی شاعری ءِ بن بنیاد وثی ماثیں ڈغار او وثی بزغیں مہلوق , مہلوق ءِ دڑد ویلیں قصہ است انت۔مبارک قاضی ءِ شاعری ئے بنیادی خاصیت ایش ایں کہ آنہی عام عوام ئے لہجہ ءَ ما شاعری کھزا۔عوامی مسائل وثی شاعری نیاما بیان کھزغاں وثی مہلوق وثی گلزمین ئے دڑدو ویل بیان کھزغاں ہمے وجہ ایں کہ بلوچ عوام آنہی آ گوں باز مہرو محبتا کھنغیں۔
گشنت کہ قومہ پجار یکے گوں سر زمینا دوہمی گوں زوانا او سیمی گوں دود و ربیدغ بیث۔ہما مڑدا کہ ہمے سہ ایں شئے آں وثی نویشتاں ایں تہا زندغ ایرکھزغاں قوم آنہی آ را نہ ویساری۔حقیقت ایش اینت کہ زوان کلاں شہ مزائیں پجارے۔آنہی آ کہ وثی زوان زندغ ایر کھزا ہچو سمجھ کہ آنہی آ وثی قوم را زندغ ایر کھزا۔اے زمانہ تہا دوہمی زواناں را اشتو قاضی ئَ وثی ماثیں زوان بلوچی تہا شاعری کھزو بلوچی زوانا را زندغ ایرکھنغ ئے جہد کوشست کھزا۔
قاضی وثی شاعری نیاما بلوچ سروک آ را میاردار کھزو گشغیں کہ تہ چھہ ڈولیں بلوچ قوم ئے رہبر ئے کہ بلوچ لوغ گدان یعنی بلوچ ءِبوطن را بہا کھنغ ئے ہمے وڑا ملاّ او مسلمانا دے گشغیں کہ شما چھے وڑیں مسلمان اے کہ قرآن رادے بہا کھنغ ئے مسیتا دے بہا کھنغ ئے دین دے بہا کھنغ ئے۔قاضی گوشیت کہ
” توکہ لیکے وتارا قوم ئے سروک
تو بلوچ ئے گدان رہن کتگ۔
کئے بزانت اے کجام مسلمان انت
بد نصیبا قرآن رہن کتگ
زار کہ پہ دو سر تگیں نانا
ماوتی ساہ وجان رہن کتگ
شہر ئے کلیں مسیت پرسیگ انت
پیش اماماں اذا رہن کتگ
قاضی ءَ پہ در آمدیں لبزے
جندءِ شیریں زبان رہن کتگ“
گشنت کہ بلوچ وطن ءَ ما یک تھاس آف ءِ صد سال وفاایں انت۔یعنی بلوچ راج بلوچ قوم ئے حون ءَ ما وفاداری باز شرتراینت۔
بلوچ ئے وفا مثالی اینت بلوچ مرغ دم تائیں وفاداری کنت ہمے وجہ شہ قاضی مبارک گوشیت کہ۔
” دگہ ہچ دود و رہبند انہ مناں
وفا داری منی دنیا ءُ دین انت “
بازیں مڑدمانی اے عادتیں کہ وث ہچ کھزو نہ کھنا گڑا چھرّا دوہمی مہلوق ئے گلہ کھنا۔دوہمی مہلوق را میاردار کھنا دوہمی مہلوق ئے رندا ڈینڈھوخواری کھنا۔ہمے رنگیں مہلوق واسطہ قاضی پنت دیانا گوشیت۔
” پہ گلہ و زاری کنگا کار نہ بنت شر
دِگرانی میاری کنگا کار نہ بنت شر“
انسان دوہمی ایں سرا تنقید کنت دوہمی مڑدمانی عیب و ثواباں گندی او ہماہاں مہلوق ئے دیما ظاہر کنت وڑ وڑیں آنہی کمزوری آں ظاہر کنت مگہ وثی گریبانا نہ گندی مڑد ہما ایں کہ وثی گریبانا گندی وثی عیب وگناہاں گندی او ہما ایں سرا پشیمان بیث وثی اندر نیاما نندوخیں رستریں انسانا کھشیث تو گڑا آں عقلمندیں انسانے او دنیا لافا دے ہما مڑد کامیاب بیث کنت نہ تہ رستریں ڈولا زند گوازینغ تو باز ارزانیں قاضی گوشیث۔
” زند ئے گوازینگ باز ارزان انت
گوں وتی جندا جنگ کنگ گران انت“
مستیں توکلی ءَ گوشتاکہ ”جوان نیں جنگا ں نی بذیں بولی۔کئے وثی دوستیں مڑدما رولی۔“
پرچیکہ آ وختا ڈیہہ آ ما امن استا ہر کنڈا مہلوق امن گوں زندا گوازنغا۔تو مستیں توکلی مہلوقا را ہمے پنت داثہ۔وخت وختے وثی تقاضا انت وثی مسلا انت وثی جنجال انت اے وختہ مئے ڈیہہ امن ہچ نیستیں ہر ہندا جنگ و جدل ایں ظلم وزوراخی ایں قبضہ گیری ایں مہلوقا را گم وگار کھنغنت گلزمین را مئے غا شہ پھلزو برغاں تو گڑا ہمے حالتیں نیاما وثی ماثیں وطن ئے حفاظت کھنغ باز المی ایں۔پرچیکہ ایشی آ شہ بغیر قوم ئے راج ئے زند و پجار خطرہ مانیت ہمے وجہ آ شہ قاضی گوشیت کہ
” سر مچارانی ما بن و بہہ ایں
بیر مئے دین انت جنگ مئے ایمان انت“
قاضی موجودہ حالات ئے نازکی دیثو پریشان بی غیں کہ مئے ڈیہہ ئے حذا پردا کنت کہ مئے سروک چماں شہ کور انت۔
عقل آنہی ئے گارینت۔آں صرف وثی ذاتی فائدہ رندا کل مہلوق را برباد کھنغنت۔ڈیہہ را برباد کھنغنت آنہاں را اے وختہ وثی لالچاشہ سوا ہچ دے نظر نہ آغینت۔
” اے سر ڈگارئے شالا ہدا پردگا بکنت
کور ئے سروک انت لنگ تماشہ کنگ نہ بیت “
قوم دوست وطن دوست مڑدما را وثی ماثیں وطن ئے ہر شئے دوست بیث۔وطن ئے جنگل بنت،درشک بنت کھشت و کھشار بنت میدان بنت کوہ و ٹھیڑ بنت وادی و کوہسار بنت آب و جو کاریز بنت موسم بنت موسم ئے وش بو بنت ہورو ہارے رندا ڈغار ئے وش بو بیث کل آنہی رادوست کھاینت قاضی آدے وثی ماثیں وطن ئے ہر شئے ہمے وڑا دوست انت۔آں گوشیت کہ۔
” کوچگانی جنگلانی درچک و دارانی گم انت
ہر بلوچ زہگا وتی ڈن و ڈگارانی گم انت
مان نیاز انت سارت وگرم طوفان و کہریں شرتگاں
آ کہ کوہاں رپتگ آ سر مچارانی گن انت
ماکہ ماتیں گلزمین ءِ ِ درد واریں پشگیں
پہ وتی جند ا نہ انت مارا ہزارانی گم انت
مارا قاضی سر ڈگار ئے کلیں موسم دوست بنت
ساہگ و ساچان ئے گم تبد و لوارانی گم انت “
ماثیں وطن ئے سارا سپت کھنغ عقل مندیں مڑدمانی پجارینت پرچیکہ سر زمین گو انسان ئے پجاربیث دگہ دنیا لافا انسان سر زمین گو پجار کھنت آ قومانی کہ وثی سر زمین نہ ایں تو گڑا آنہاں نی دنیا لافا ہچ پجار نیستیں۔ ہمے ڈولا قاضی گوشیت۔
” ما بلوچ فرزندیں مئے دیار بولان انت
لنگریں شہیدانی سر ڈگار بولان انت
اشی ئے بلندیں ٹل داں کیامتا چست انت
راجدپتر ئ ِ تاکاں یاتگار بولان انت
پہ وتی وطن ماتاآ سراتی ئے جنگ
ہر کسی تہا است انت سر مچاربولان انت
زندگیں بلوچستان گوں بہادریں بچاں
جوریں وش نیتکاں پہ آسگوار بولان انت
دور نہ انت وطن قاضی دڑمناں چہ آجو بیت
اے ہبر کئے ءَ گشتگ بے توار بولان انت “
مروشی راجا ما دڑدو ویل تنگ داستی لنگھڑی ظلم و زیادتی نا انصافی ایکھر باز اینت کہ ہرانسان پریشان حال اینت۔براث شہ براث ئے حقا جنغیں دوست شہ دوست آ کشغیں قریب شہ قریب آ دیر اینت۔ہڈ ہڈارا بھورنغیں۔انصاف ہچ ہندا مڑدما ں نہ رسغیں۔ہمے حالاں دیثو قاضی گوشیت کہ
” آدم ئے اولاد انچو گڑنگ انت
پہ دپارے جندئے اولاد اکشیت
حاکم ئے قاضی تو انصافا بچار
سانگ کنت شیرین ءَ فرہاد ءَ کشیت “
قاضی مبارک ءِ شاعری ءِ بازیں رنگ و دروشم انت آنہی شاعری ءِ ہر رنگے کہ چارئے آں رنگ دوست کٹیث پر چیکہ آنہی آ شاعری وثی دل ءِ حب و عشق آ گوں تخلیق کھزا وثی دل ءِ حسرت امید و ارمان غم و گنڑتی وثی شاعری نیاما بیان کھزغنت۔ آنہی آ شہ بید وثی ماثیں وطن ڈغار او راج ءِ دڑدو ویل دے شاعری لافا بیان کھزغنت در اصل قاضی ءِشاعری بلوچ ڈغار او بلوچ راج ءِ دڑدو ویلانی غم گنڑتی آ نی تاریخ اینت۔