الیکشن

الیکشن نزَّیخ بیثغّثّنت۔ شہرئے گلی گِھٹی و بولک و ترنڈ ، امیدوارانی پوٹو و پوسٹراں شہ رنگ رنگ اثنت۔ امیدوار وھذی مذتگاراں پھجی آ لوغ لوغاووٹاں لوٹغہ پھیذاغیثنت۔ہر یکاگوں وش و خوشی آ مِلغیثنت۔ سال شش مہینہ آ شہ پیشہ مڑتغیں مڑدمانی پاتحہ خوانی آ گِیر آتکغہ ثِش۔ شَہرا ہوٹلاں و اوطاقاں الیکشنانی سرا بحث و تکرار و مجالس بیئغئے ثَنت۔ ہموذ کہ دو سئے مڑدما مچی بیثیں مجالس و توار چھڑوئیں الیکشن بارواں بیئغئے۔
مہردل کالونی آ یک کِسائیں دکان، کہ شریف نامیں مڑدے ایغہ ، تَرنڈہ اندرا سیاستہ مرکز بیثغہ۔ شریف نیم وَہی ایں چپ و کم تواریں مَڑدے اَث۔ بڑز و بارغیں قد و بالاذ اَث۔ ریش جھرّاثنتی و خط کھذیئے ثنتی۔ پَھزیر بیث کھاتک دکانہ اَگہ آف رِتک و صفائی کھذ و چَھپرا شیرا کرشی اِیر کھذ نِشت۔ ترنڈا پیریں و ورنا و چک دراہیں روش دکانہ آتک و شذنت۔
چَھپرہ شیرا مچی مان کھاتک۔ یدر جَھلہ جَھلہ و کھند کھند اَث۔ گیشتِر ا دراہیں روش آﺅخیں الیکشنانی بارواں مجالس و گِھمسانڑ مان آتکی ئے پَر شرفو اے رنگیں گپتگواں و مجالساں اوار نہ بیث۔ دکانئے گِراکاں گوں سَودا سوذا داث و گِپتہ کہ واند بیث گڈ کتاب اگّا کھذ کرشی سرہ نِشت پڑھیثی۔
مہردل کالونی ئے ووٹ دیوخانی لیکوّ شش ہَپت صذ بیث۔ مزائیں امیت وار یکے سڑدار بشیر خان اَث و دوہمی ملا حبیب الرحمان اَث۔ ہَڑدوئینانی مذت گار جوش و جَزبگانی لافیثنت۔ بیگہاں دیغر نمازا رَندا دکانا مچی مان کھاتک۔ یک دوہمی امیتوارئے ئگِلہ و وھذی ئے کھذغیں کارانی ستاہا کھذ۔ مہردل کالونیا سڑدارا مستِریں کاردار شادوآ و ملا حبیب الرحمانئے خانو اَث۔ شادو و خانو نَزیخیں سیاد اثنت۔اِشانی سیث و تاوان ، غم و شادِھ اوار اَث۔ یک دوہمی لوغاں شذ کھاتکنت۔
یک بیگِھنے دکانا مچی گیشتِر اَث۔ بحث و تکرارہ لافا خانوآ زہرا گوں شادو آ را گوئشتہ کہ ; شوا دینہ خلافی آ کھنغائے، شوا کافرے۔ شوئے پَھجی آ نغن آف ورغ حرامیں،،۔ ہمے ٹھئوکاں گوں سڑدارہ پلوا لشکر دے زَہر گِپتہ کہ دین شوئیغیں ؟ ،، شوئے میراتیں کہ ہَرکَسے بیارے و ہرکَسے دینا شہ کَشّے ؟،،
دوئیں امیتوارانی مذتگار یک آپتا زا بارانا کھنانا دَستاں کپتغنت۔ مڑائی لافاکَسّے بج پَٹّے جیثغنت و کَسّے جَرّ دِڑتغنت۔ اِنگو آنگو برادری آ حال بیثہ ، رمبانا آتکغنت۔ ہَڑدوں دھر حَیر داثغنتِش۔ پِٹ و ملامت کھذغنتِش۔ ہر کَس وھذی لوغاں شذا۔ آپتانہ وش بیثغنت و غم و شادِھاں روغ آئغ اِشتئیش۔
الیکشن بیثغنت۔ ووٹ سڑدار بشیر خانا کَٹّیثغّنت۔ سڑدارہ مذتگاراں نعرے بازی ، ھَلّاگلا شروع کھذا۔ سئے چیار روشا تک ملائے مذتگاراں گوں چھیج و چَتَّر کھزیش۔ ملائے مزتگار ہمے رنگادِلپروش و رنجا ثنت کہ گشئے ہر لوغا موتے بیثہ۔
ہپتائے آ رَندا شادو گوں وھذی سنگتاں گرمہ ساعتا شرفو دکانا آتکغنت۔ ھیذا شہ میِسِذّیئیثنت۔ دکانا ساڑتیں آف و بوتل گِپتئیش۔ شرفو آ پھول کھذا ; حَیر تہ استیں لشکر شوا مَنتی آ آتکغے، تھانگو شذغے؟،، برکتا ولدی داثہ ; ما مرشی سڑدارا گوں مِلَغ و موارکی دیغہ شذغوں پر سڑدارہ پَہریداراں مار اندرہ روغہ نئیشتہ۔ گوئشتیش کہ سڑدار مرشی در نہ کفی“۔

ماہتاک سنگت کوئٹہ

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*