سسی پنہوں

راجہ دلورائے ئے زمانغا بھانبر واہ ئے کندھی آ ”نانیا“ (ناﺅں ) نامیں برہمن اے لوغ اث۔ آنہی زالہ نام ”مندر“ اث۔ دوئیں اولادا باز باڑا اثنت۔ ہمے خواہش ہماں وختا پیلہ بیثہ وختیکہ یک زیبائیں جنکے پیدابیثہ ۔ نجومی آں گوئشتہ کہ ہمے جنک ئِے مڑد یک مسلمانے بیث۔ ہمے ہژمب او دیمی بذنامی ئَے پھجغا پہ زال و مڑد ا مجبور بیثئو ہمے لعل ایں جنک باز افسوسا گوں یک صندوخے آ بند کثہ ، او واہا ایر کثہ ۔ہماں صندوخ آفہ چکا بہاناں بہاناں بھنبھورہ نزیخا یک دھوبی گھاٹے ئآ آتکہ ۔ بھنبھورا محمد نامیں یک دھوبی اث کہ لالا (ادا ) ناما مشہور اث ۔آں اکھر مشہور او بھاگیائیں دھوبی اے اث کہ آنہیا گوئر جرّانی شوذغا پہ پنج صذ دھوبی ملازم اثنت۔ بدنصیبی کہ آنہی آ اولاد نیستہ۔ ہمے غم برے برے دیرداں آنہی دل و دماغہ چکا اوتر بیث۔ وختیکہ صندوخ ہمے گھاٹہ چکا آتکہ اوذکہ لالائے دھوبی جرّاں شوذغئے ثنت تہ آنہاں صندوخ دیثہ ۔ صندوخ کہ ژہ آفا کشت ایش تہ دیثئیش کہ گل گلاب ئَے ڈولیں نرم و نازیکیں جنکے آنہی اندرا وہاویں ۔ صندوخ و جنک لالایا گوئر آڑتغ انتش ۔
آنہی آ جنک دیثئو باز مہر داثہ او ماہ در وشمی دیثئو آنہی نام ”سسی“ (سسئی) ایر کثئی۔ لالا ئِے زالا ہمے جنک باز دوستی او مہرا گوں روذینتئو مزں کثہ ۔وختیکہ ہمے جنک لائخ بیثہ تو بازیں ورنایانی دلانی دریپغ ٹھیثہ ۔ آں لالایا سک دوست اث ۔اے خاطرا باز زر خرچ کثئو یک زیبداریں ماڑی اے ٹاہینائنتی او آنہی چیاریں کنڈاں باغ جنائینتغتی ۔ سسی ہمے دل و شیں باغانی لافاوثی سینگھی او دزگہاراں پجی آ کندغ ولئیواں گوں روشاں گوازینغا یث۔
ہماں زمانہ آ کیچ و مکران ئِے گلّا او کاروان بھنبھورہ ژہ گوئستنت او دوہمی مشہوریں شہراں سوذاگری آ پہ شت کاتکنت ۔سما نہ ئیں کئے آ سسی ئے زیبائی پچار کیچ ئِے حاکم آری جام ئِے بچ پنہوں آ گوں کثہ۔ پنہوں آنہی گندغا پہ بے قرار بیثہ او درباری آں ژہ صلاحا رند فیصلہ بیثہ کہ آں یک مزائیں گلّا ئے زیری او بازیں عطراں باڑت ، یک سوذا گرے ویس آ کنت او بھنبھورا بروث ۔
وختیکہ گلّا بھنبھورا پجثہ تو وہشیں بوآں دراہیں شہر بیڑ ترینتہ۔ مشک وعنبر ئِے خرید و فروخت شروع بیثہ ۔ ہمے روشا سسی دِہ سینگھارتی آ وثی سینگھی آں پجی آ ہموذا آتکہ ۔ دوئیناں یک دوہمی دیثہ ۔ دلانی اندرا لکثغ ایں ازلی مہر حدا زیات گیش بیثہ۔
لوغا پجثی آ سسی آ وثی دلہ حال وثی کلّاں ژہ نزدیخیں سینگھی آ ڈسثہ ۔آنہی منت و لیلڑی کثغنتی کہ ہر اٹکلے کہ بی پنہوں آ گوں آنہی سیر ا کنائینی ۔ سینگھی آ تڑساناں تڑساناں ہمے ٹوک لالا دھوبی او آنہی زالا پجینتہ ۔لالہ آ ولدی داثہ کہ یکے تہ پنہوں پردیسی اے ، دوہمی آنہی ذات و قوم ئِے ہچ سمانے ۔سینگھی آ گوئشتہ کہ آنہی آ معلوم کثہ آں دِہ دھوبی اے ۔ او اغر باور مہ ئیے تو آزمائینغ بہ بی۔
لالا آ آنہی ہمے ٹوک قبول کثہ ۔ پنہوں لوٹائینے جیثہ او گذانی یک بڈے آنہی آ دیغ بیثہ کہ آنہاں شوذی بیاری ۔ پنہوں ئِے نازلکیں دست ہمے گذاں شوذاناں ٹپی بیثغ انت او نادستاذی سببابازیں جَر دڑ تغنت ۔ سسی آ کہ ہمے ٹوک ئَے سما کپتہ تہ آنہی آ لکوڑی پنہوں آ صلاح داثہ کہ گذانی تیار بیغا رندا آں ہر جرے اندرا تنگویں زرے ماں بہ کنت ، بلّاں کسا شکایت مہ وی ۔ پنہوں آ ہمے ڈولا کثہ او ششتغیں جر واژہاں پجینتغ انت ۔
لالا پک بیثہ کہ پنہوں ہمانہی ذات ئَے مڑدے ۔ آنہی آ ہمے دوستی قبول کثہ ۔ پر اشی آ پیش کہ دو ئینانی سیر بی، پنہوں چکا عاشقیں یک زرگریں زالے آ سیاھغ جثہ کہ سسی ئِے کیریکٹر جواں نہ ایں ۔
ہماں زمانہا رواج اث کہ ہر کسے چکا کہ کسے آ سیاھغے جثیں تو آں وثی بے گناہی ثابت کنغا پہ آسہ ژہ گوئست ۔ سسی آ دہ ہمنگہ کنغ ئَئ پر مائیں تیش ۔ سسی یکدم تیار بیثہ او جَھمکوخیں آسہ اندرا ژہ ہئیر میئری آ گوئستئو آتکہ ۔ ہمے آزمائشا ژہ رندا باز مزائیں مراذے آ گوں آنہی سیر بیثہ ۔پنہوں آ گڑدغ و وثی ڈیہہ روغ دروغ کثہ او پکوئی بھنبھورا جاہ منند بیثہ۔
پنہوں ئِے ”چنرو“ نامیں براث ہمانہی پجی آ یث۔ آنہی ق کہ ہمے حالت دیثہ تہ مجبور بیثئو ڈیھا گڑتہ او آری جاما دراہیں حال داثئی ۔ آری جام بازحیراں بیثہ ۔ آنہی آ پنہوں باز دوست اث۔ آنہی آ ہمے ڈکھ سگثہ نہ خث۔ یکدم کاشذے دیم داثئی کہ پنہوں آ گوئش کہ اغر آں گڑدی نہ یئے تہ مئیں زیندغ بیغ گرانیں ۔ کاشذ کہ بھنبھورا پجثہ تہ دیثئی کہ پنہوں دھوبی آں پجی آ گھاٹہ چکا جرّاں شوذغئیں۔
کاشذ باز عاجزی آ گوں پاذاں کپتئی او باز دڑدودلدوری آ گوں لِیلڑی کثئی کہ ”سائیں ! اے کارتئی شانہ خلاف ایں ، پڑتئو تہ کیچ ئِے سڑداری سنہڑائیں “۔ پنہوں آ گڑدغ وڈیھہ روغا ژہ نہ کثہ ۔ لاچار بیثئو کاشذ گڑتئو شتہ او آری جاما دراہیں حال داثئی ۔ جام بے حال بیثہ ، گریغ و پٹغا گوں اکھر لاغر بیثغہ کہ پھجغ ئِے حِیل کم سراتکغ اثی ۔ پث ئِے حالت دیثئو آنہی دوہمی سئیں بچ چنرو، ہوتی او نوتی آ اوار بیثئو پثا تسلا داثہ کہ آں ڈولے نہ ڈولے پنہوں آ سذت واپس کارانت۔
سئیں براث بال گروخیں مہری آں زوار بیثئو جھٹہ اندرا بھنبھورا پجثغنت ۔ سسی او پنہوں آ دل ئِے جہلانکی آ گوں آنہانی دراہی کثہ ۔ باز روشاداں آنہانی آغ ئِے وہشی ئَے دعوت و مراذ بیثغنت ۔ یک شفے دیرداں چیاریں براثاں شراب واڑتہ۔ سسی پنہوں آ پہ ہیل بیثو بیثو وہاشتہ۔ دوہمی پلوا پنہوں آ اکھر شراب کھاوارے جیثہ کہ آنہی آ وثی ہوش نہ ویثہ ۔ پذی شفا آنہی براثاں مہری پلہانڑتغنت او پیلویں بے خبری آ آں کیچ ئَے پلوا بڑتئیش۔
سسی ناغماں ہاغہ بیثہ۔ پنہوں پجی آ وپتی آ نہ یثی۔ دریہغ جثئو کڑو بیثہ اوایذا او ذا پولغ شروع کثئی ۔ کوٹو او حاویلی بر و بڑینگڑ ۔دلا کپتئی کہ ضرور پنہوں براثاں زوری بڑتہ ۔ واہو چیکا گوں دوہمی مخلوق نز آتکہ ۔ کلاں سسی سر پذ کثہ، پر آں اکھر مزائیں غم ئَے سگغا پہ تیار نہ یث۔ آخر کار ہر شئے اِشتئو ناں سوہویں کیچہ پلوا لڑثہ۔ بروبیواناں ، خطرہ آ پُریں دگاں او بڑزو بلندیں ٹیڑاں جھمباناں آں ”پب“ ئَئ ڈیھا پجثہ ۔تن و شذ آ بے دم بیثغ اث۔ رواناں رواناںتُستئو کپتہ۔ ھذائی قدرتا وہشیں آف ئِے یک واہے جاری بیثہ ۔ آف واڑتئو ، دروکا ساہ ساڑتئو سسی اغدہ لڑثہ۔ کوہ ِ پب ئِے راہنغاں گزاناں آں بھوڑ کئورہ کندھی آ پجثہ۔ کئورہ لانگھغ گراں ترثہ۔ باز فکرو گنڑتی آ رند بے سنگت وکمکا بر و بیواناں رُلغایث ۔ آں کوہ ِ ماباڑئے بڑزغاں پجثہ تہ یک ہلکے دیثئی کہ اوذا یک مڑدے جاہ مننداثِ ۔نزیخا شتئو شمانہی آ کیچی گلّا باروا پول کثئی ۔ آنہی آ اکھر سنہڑائیں زال کہ ناغماں دیثہ تہ نیت خراب بیثئی ۔ سسی پرامغا مانا تکہ کہ گوں ہمانہی آ بذ کاری آ کنت۔ سسی آنہی عجبیں ٹوکاں اش کناناں پنہوں ئِے گیراں زورا گریغایث او ہماں ظالمیں مڑدا ژہ رحمہ دز بندی کثئی ۔ پرہماں سنگدلا ہچ اثر نہ کپتہ۔ آخر سسی آ مجبور بیثئو دز بندی کثہ کہ یک روشے من اے بدنصیبا پنہوں ئِے سیغا کنغابل او گوں مں نیخی آ کں تاکہ مں آنہی مونجھاں شموشاں ۔ سسی ٹوک اش کثئو آں وہش بیثہ او وہڑد وخوراکہ سامانہ گرغا شتہ ۔ آں کہ شتہ تہ سسی آ ھذا آ گوں زاری کثہ کہ” یا ھذا۔ منے بے وسیلہ او ڈکھ جثغین ئِے مذتا کں“ سسی دعا قبول بیثہ ۔ یکدم ڈغار چِغ اثہ او سسی اندرا شثئی ۔ آنہی سری ئِے یک چُنڈے دراسر اتکہ ۔ ہماں مڑد کہ گڑتئو آتکہ تو ہمے عبرت دیثئو باز پریشاں بیثہ۔ وثی گناہاں ژہ باز پشیماں بیثئو توبہ کثئی اور دیرداں انڑزی چُرینتغ انتی ۔ او گڑہ باز عزتا گوں سسی ئے زیارت وثی دستاں گوں پیلہ کنغا ماناتکہ۔
کیچہ پجغا ژہ پیشا دگا پنہوں آ کہ ہوش آتکہ تہ وثار ہشترہ چکا بستی آ دیثئی ۔وثار چوڑائینغہ کوشیش کثئی پرناکام بیثہ ۔ براثاں ژہ پولہ کنغاباڑایث پر ہشتر اکھر اشتافی رمبغئے ثنت کہ براثاں نیش کثہ ۔ آخر پنہوں آری جاما سرکنغ بیثہ ۔ پثا بچ دیثئو وہش بیثہ۔ پر پنہوں وثی دوست ئے جذائی آ ہمکر گاروگمبھار اث کہ کہولا آنہی زیندھ خطرہ تہا دیثہ۔ مجبور بیثئو آنہی آ اجازت داثئیش کہ بروئی او سسی آ وثی پجی آ بیاری ۔ پنہوں آ بھنبھور ء پلوا شیموش کثہ۔ دگا کہ سسی قبر ئے نزیخا پجثہ تہ یک غیبی آ وازے آ آں تاہرینتہ۔ دیما کہ شتہ تہ تازہ ایں قبرے آ ژہ پجھ آڑتغیں سری ئے چُنڈ در ا سراتکی آ دیثئی ۔ یکدم پوہ بیثہ کہ اے تہ سسی قبریں۔ ہمے وختا ہماں مڑد دِہ ہموذا آتکہ ، او باز دڑد ء گوں سسی ئِے حالات پنہوں آ ڈسثئی ۔ پنہوں ہشترا ژہ جہلا ایر کپتہ ۔ او براثاں تسلی داثئی کہ درو کا جکیں مں قبرا دعائے لوٹاں ۔ قبرء وٹا شتہ تہ چماں انڑس بہیر بیثغنتی۔ دعا کثئی کہ ” اے جذا بیثغینانی میلوخیں کار ساز! مناں گوں مئیں دوستا میل “۔
گوں پنہوں دعایا قبر وث چغثہ او پنہوں درک داثئو پیہثہ ۔ قبر گڑتئو اوار بیثہ۔
براثاں کہ دیثہ تہ حیراں بیثغنت ۔ سمانئیں کہ آنہاں چکھر وختا دَہ انڑزی رتکغنت او کئے آ چے بیثہ ، ہچ سما نہ ایں۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*