تاریخہ لافا نفرئے کڑد

جہان ئے مزدوراں ، یک بی انت!
1
ہمے صدی ئے ہشتمی دھاگ ئے آخری نیما کابلنزامقالہ اے لکثہ :” مغز او حواس ، ترقی حیثیتا “۔ او ہمشی اندرا سپنسرئے پچارا کناناں آنہیا دعوی کثہ کہ حواس، انسانہ ترقی لافا مزائیں کاراں کننت ،او مغز چھڑو یک کستریں دوہمی نمبر ئے کوٹغ پاٹغیں حیثیت ئِے کاراں کنت۔ یک ”شرف مندیں سوشالو جسٹ اے “ آ کابلٹز ئے ولدی داثہ ۔او ہمنگیں خیالے چکا حیرانی درشان کثہ آں کہ مغز آ ”پاذانی پلوا“ ہندہ داث۔ بے شک ” عز تمندیں سوشالوجسٹ “مغز ئے پلوبندائی کنغامں حقہ چکایث ،پر، اغر آنہیا اے ثابت کثیں کہ کابلنزہ ٹوکئے پیش دارغہ ڈول چٹ بے مناسبیں تو آں زیات حقہ چکہ بیث۔ اصلامں ”اجزا“ ئے تھیوری وث بے مناسبیں پچیکہ آں سماجی زیندھ ئے بازیں تکاں بے اصولی ء گوں گیش ایث و گیواریث۔ آنہاں جُذائیں چیزانی حیثیتہ داث و آنہاں یک خاصیں ڈولے ئِے طاقتانی اندرہ بدلہ کنت کہ ژہ بازیں پلواں ، او نابراوریں کامیابیاں گوں سماجی انسانہ ترقی ئِے راہ ء چکنت۔ پر، اے نظریہ کابلٹز ئے پیش داشتگیں دروشمہ اندرا اغدہ زیات بے مناسبیں کہ آنہیا تہ سماجی انسان ئے سرگرمیانی بازیں پہناذ دِہ نہ ، بلکنا انفرادی ذہن ئے ڈول ڈولیں حلقہ خاصیں سوشالوجیکل مڑدمانی اندرا بدل کثغنت ۔ تجریدئے ہمے منزل بالکل ہر کولیس ئے تو نڑیانی ڈولا آخری منزل ایں۔ مردم شمیذاں اگھا اصل شتہ نہ وی، پچیکہ شمشی آ دیما پیلو ی آ مہمل ایں ٹوکانی ملنڈی ایں وطن شروع بی ۔ ” شرف مندیں سوشالوجسٹا“ بایداث کہ لگھاپہ لگھائی ہمے ٹوکہ سرا کابلٹز و آنہی وانوخانی نگاہ ترینتیں ۔ بیثہ بی کہ تجریدئے ہمے ڈونگھا ئیانی پدھر کنغہ اندرا، کہ دَموذاں کابلٹز وثی ہسٹری ئے زوراخیں “جزو“ ئے معلوم کنغہ کوشیشا رسینتہ ، ”عزتمندیں سوشالوجسٹا “ قضائی آ ہمے اجزائِے تھیوری ئِے کرٹسز مہ اندرا ودھک داثہ کثیں۔ اے ہماں وختا پرما کلّاں باز فائدھی چیزے بیث۔ پر،آں ہمنگہ کنغئے لائخانہ یث۔ آں وث ہمے نظریہ ئے منوخے اث او کابلٹزا ژہ چھڑواے ڈولا جُذا اث کہ آنہی دل ، الیکٹسز مہ پلوایث ۔ ہمے خاترا آنہیا سجہ ایں“ اجزا “ برابر برابر ی آ مزن مانا تکنت ۔ پذا آنہی مغز ئے الیکٹسزم پسندی ئِے خاصیں ڈولا اکیلا ئیں اظہار ، ڈائلیٹکل میٹیریلز مہ سرا آنہی حلمہانی اندرا بیثہ۔ ڈائلیٹکل میٹریلزم آنہیا ہمنگیں عقیدہ اے گنڑاِث کہ آں ، باقی سجہ ایں جزو اں معاشی جزوہ چکا قربانہ کنت ۔ آں تاریخہ اندرا نفر ئِے کردہ زیرو آ ژہ زیات حیثیتہ نہ ذاث۔ ہمے ”عزتمندیں سوشالوجسٹا“ اے خیال دِہ نیا تکہ کہ اجزائِے تھیوری ڈائلٹیکل میٹیرلزم ئِے طبیعت ئے خلاف اَیں۔ کہ چھڑو ہماں مرد ڈائلیٹکل میٹیریلزمہ اندرا تسلیم و رضائے عقیدہ (Quietism) ئِے جوازے دیثہ کنت، آں کہ منطقی ڈولا فکر ء کنغئے لائخامہ وی۔ ہمے بار ہا اے گشغ ضروری ایں کہ مئے “عز تمندیں سوشالوجسٹا“ ژہ ہماں غلطی کہ بیثہ آں چھڑو ہمانہی آ نہ کثہ بلکنا بازیں دُہمی مڑداں دِہ کثہ، دانڑتی دِہ بیغیں ،او غالباً آئندہ دِہ بیاناں روث۔
میٹیریلسٹانی چکا تہ ہماں وختا دِہ ”Quietism“ ء پلوا لاڑو بیغ ئے سیاہغ جنے جیثغنت وختیکہ آنہاں دانڑتی نیچر و تاریخ ئِے وثی ڈائلیٹکل تصور ئِے ترتیف و دروشم دِہ نہ کثغنت ۔ ”زمانہ ئے ڈونگھائیانی “سیل وسوادھ کثی آ بغیر“ بیائیں کہ مامشہوریں انگریز سائنس دان پریسٹلے او پرائس نیاما بیثغیں بحث ئِے گیراوندی آ تازہ کنوں ۔ پریسٹلے ئِے تھیوری آنی تجزیہ آ کناناں پرائسا، اے دعوی دِہ کثہ کہ میٹیریلزم اختیارہ تصورئے دژمنیں ، اواے کہ اشی اندرا نفرئے وث واکیں کار ئےِ ہچ گنجائش نے ۔ اشی پسوا دیاناں پریسٹلے آ روزینہ ای تجربہ ئِے حوالہ داثہ۔ آنہیا لکھثہ ” مں کہ بہر حال یک بے ساہ و کپتغیں حیوانے نہ یاں، وثی ٹوکہ نہ خناں، من اَشتہ پولہ کناں : تہ ژہ اشیا زیات دل ہیڑت و گرم جوشیں ، ژہ اشی آ زیات تکڑا، او ،لاز میں مقصدانی ، ژہ اشی آ زیات ڈکھیائیں پٹ و پولہ پکوگندئے ہما نکر کہ ہماں مڑدانی اندرا دیثہ کیث ہماہاں کہ آں پجھہ کاری کہ جبرئے عقیدہ ئے منوخنت ؟“ ۔ پریسٹلے ئے نغاہا ہماں مذہبی جمہوری اِیں فرقہ اث کہ جبر ئے عقیدہ ئے مسیحی مریذانی ( Chirstian Necessarians) ناما مشہورث ۔ مار اے سمانَیں کہ ہماں فرقہ ہمے سندھو آ باعمل اث یا نہ ہما نکر کہ پریسٹلے آ گنڑث ، پر اے ٹوک لازمی نَیں ۔ ایشی بار ہا کستریں شک دِہ کثہ نہ یئے کہ انسانی ارادہ ئِے میٹریل تصور جوش والائیں عملی کارا گوں پیلوی آ ہم گرنچیں۔ لانسن گشی کہ ”ہما سجہ ایں عقیدہاں ، کہ انسانی ارادہ ئے جہدو عمل ئے لوٹوخ اثنت ، اے دعوی کث کہ ارادہ بے وس ایں۔ آنہاں اختیارئے عقیدہ رد کثغنت او دنیا قضا وقدر ( Fatalism) ئِے محتاج کثغث “۔ لانسن اے گنڑغہ لافا غلطی سرا اث کہ ہماں چیزا کہ آجوئیں ارادہ (اختیار) گشنت آنہی ئے ہر تردید تقدیر پرستی (Fatalism) پلوا باڑت ۔ پرہمے غلطی آنہی آ یک باز دلچسپ ایں تاریخی حقیقتے پلوا دلگوش کنغامں اڑنویثہ: اصلامں ہسٹری ڈسی کہ فیٹلزم دِہ یکو زوراخیں عملی سرگرمی ئے دگ ئِے اڑ نویثہ بلکنا کڑدے زمانہانی اندراتہ آں ہمنگیں سرگرمی ئے واسطا نفسیاتی بھیرے آ لازمی بنیادے اث۔ اشی ثابت کنغاپہ ماپیوریٹن فرقہ ئے مثالہ پیش داروں کہ زورئے لحاظا ہبدہمی صدی انگلینڈ ئِے سجہ ایں پارٹیاں ژہ گوئستیایث۔ او محمد ئے منوخانی مثالا دوں کہ آنہاں یک گوئنڈیں وختے اندرا ہندو ستانا گِردَہ سپینا ، گل زمین ئے یک مزائیں بہرے وثی پاذانی شیرا آڑتغث۔ ہماں مردم کہ اے گنڑنت کہ پرما واقعہانی یک خاصیں سلسلہ اے ئِے لازم بیغئے قائل بیغ پہ اے ہبرا کھوڑیں کہ ماوثار ہمے واقعہانی اندرا کمک بیوخ یا آنہانی اگھ ئَ گرغ ئے سجہ ایں امکانا ژہ بے نصیوکنوں ، بالکل غلطی سراانت ۔(1)

ایذا ہر ٹوک ایشی سرا ایریں کہ آیا منی کار لاز میں واقعہ آنی زنزیر ئِے یک لاز میں کڑی ئے استیں یانہ ۔ اغراستیں تو منی دودلوئی ہمکر کم بیث او مں ہما نکر زیات پکوئیں ارادہا گوں کارا رواں باں ۔ او ایشی اندرا حیرانی ئے ہچ ٹوک نیستیں : وختیکہ ماگشوں کہ یک مڑدے وثی کاراں لازمی ایں واقعہ آنی زنزیرہ لافا یک لازمی ایں کڑی ئے گنڑیں تو، مئے مطلب اے بی کہ ہمے مڑدہ نزیخا واکہ ارادہ ئے ہمے ناموجودگی آنہی مغزہ لافا اے ڈولا پیہی کہ آں ہر ڈولے آ کہ کارا کنغیں شمانہیا جذائیں ڈولے آ کارہ کثہ نہ خنت۔ اے بالکل ہما ذہنیت ایں آں کہ لوتھرئے اے مشہوریں ٹوکاں گوں ظاہر بی: ” مں اشی چکا جکثی آں۔ مں اشی آ سوادوہمی ہچ کارے کثہ نہ خناں“۔ او شماں ذہینیت ئے برکتا کہ مخلوک باز زبریں زور او طاغتہ درشان کننت ، حیران کنوخیں اکّیلائیں کاراں کننت۔ ہیملٹ ژہ ہمے ذہینیتا پوک اث، ہمے سببا آں چھڑو گریغ و پٹغ او گنڑتی و پکر کنغ ئِے لائک اث۔ او ہمے سبب ایں کہ ہیملٹ ء ہچبر ہمنگیں فلسفہ اے قبول کثہ نہ کث کہ نزدیخا اِش واک چھڑو ہماں جبریں کہ شعورئِے دروشماں بدل بیثہ ۔ فشٹے آ با لکل راست گوئشتہ : ” ہما نگیں کہ انسانے بیث ہماں ڈولیں آنہی فلسفہ اے بیث“۔

ورداس

1۔ اے مشہوریں ٹوکے کہ کالوِن ئے نظریہ گشی کہ انسانانی سجہ ایں کارژہ خدائے پلوا مقرارین انت ۔ (فیٹلزم آ ژہ مئے مطلب ہذائِے منشاایں کہ شمانہیا ھذا اے فیصلہ آ کنت کہ ہر مڑدمے آ لازمی ڈولا چے چے ڈائے بی۔ ہمے نظریہ گشی کہ ہذا وثی کڑدے بندغ چونڈ ء کنت کہ آں بلاں نا انصافی آ ژہ لتاڑتغیں قوماں آجو کننت۔ ہمے ڈولیں یک بندائے حضرت موسیٰ ؑ اث کہ بنی اسرائیل آجوکثئی ۔ ہر ٹوکے آ ژہ اے اندازہ بی کہ کرامویل آ دِہ وثاریک ہمنگیں ھذائی مقرار کثغیں مرڈے گنڑاِث ۔ آنہیا یکووثی عمل ھذائی اراد ہانی نتیجہ گوئشتنت او آنہیا ایمانداری آ گوں ہمے ٹوکہ سرا ایمان داشت۔ آنہی واسطا کلے کارانی چکا نصیوئے مُہر جنوخث ۔ پر ہمے چیزا آں دھک مں دھکی سوب گرغ ئے کوشیشا ژہ نہ داشتہ بلکنا آنہیا ہمشی گرغ ئے کوشیشا رایک پروش نہ وروخیں طاقتے بشکثہ۔