نوکری ئَے تلاش

عالی ، گیست و سئے سالئے یک نوخ ورنائیں مڑدے اث۔ ڈیلاشہ لاغر و بڑز تِراَث۔ من یدر دیث فائلے گوئِنی، سرکاری دفترانی چَکر جَھذنتی۔ من روشے دَگا اوار بیثغانی۔ مجالسا کھنانا مں پھول کھذا کہ عالی ! تھرا من گِنداں یَدر اے فائل گوناں مانروئے دفتراں چھرّانا۔ تہ چھے کھنغا یئے ؟مناں گوئشتئی صاحب ! تہ تہ سئی اے مں غریبے آں، مں ایف ایس سیئَ رَندا پڑھغ اِشتﺅ داثہ۔ مئیں گرزاں نہ بی اغیں۔ نی من روشے ئَے مزدوری کھناں و وختے وختے سرکاری دفتراں چھرّاں کھیزاں نوکری اے رَسیثوں تہ چکانی گزارا بی۔ ،،
پانزدہ ، گیست روشا رندا اغدے پھزیرے ئَ من دیثہ عالی بازار ئَے پلوا روغیں فائل گونَنتی۔ من پھول کھذا عالی ! مرشی تھاں دفترا رَوّے ؟،، من اشکوذا محکمہ صحت ئَے درجہ چہارم ئِ چی اے نوکری آتکہ، من دے وھذی کاغذاں جمع کھنغ ئَے روغایاں “۔ عالی آ ولدی داثہ۔ من دلا گوئشتہ اے غریبا را کھئے مخت ء نوکری دا۔ ہنچو کاغذانی کاپی کھنغ ئے خرچہ کھنغیں۔
خیر، ہماں روش شذا۔ عالی ئِ گرزاں ہمیش ئَ کہ دراہیں روش ہے کہ محنت مزوری ئَ شذ ہے کہ سرکاری دفترانی چکراں گوں روش ایر بھڑتی۔
دو مہینہ آ رَندا من روشے آ پھزیرا تیار بیثﺅ بازارا آتکغاں کہ ہوٹلا چانھے وراں۔ من دیثہ عالی مونجھائی نِشتی ایں۔ من عالیئَ را کَوّ کھذا کہ گوئرمن بیا۔ عالی آتکہ۔ حَیر مہر و حال حوالا رندا من پھول ک±ھذا کہ مرشی مونجھائی آ مان آغہ، حَیر تہ استیں ؟” ہا صاحب ، حیر مہریں “ دروکا چپ کھذئی او انیشغا چی اے کِرشک داثئی۔ مناں مان آتکہ کہ چی اے گیر آرغئے کوششا کھنغیں۔ صاحب تھرا گیریں دو مہینہ پیشہ پھذیرے ئَ تہ مناں پھول کھذغہ کہ عالی ! مرشی تھاں دفترا رَوغایئے ؟ من تھرا ولدی داثغہ کہ محکمہ صحت ئَے درجہ چہارمے نوکری آتکغاں ، من دے وھذی کاغزاں جمع کھناں۔
”ہا مناں گِیریں ، گڈ چھون بیثہ ؟“ من پھول کھذا۔ من وھذی لوغئَ ھَند شَوّتکﺅ چیار لکھ روپیہ نَزّآرتہ و من محکمہ صحت ئَ بابو ، علی دوست ئَ را داثغاں کہ مناں نوخیں آتکغیں بھرتی آں شہ درجہ چہارمے یک نوکری ئے داث۔ بابو علی دوست ئَ مناں زبان داثہ کہ ہر کَذیں نوکری آتکغاں ، یکّے تھئی نام ئَ کھناں ،،
عالی ئَ دانی وھذی ٹھﺅک آنسر نہ کھذا کہ من اِشتاف گر بیثﺅ گوئشتہ : گڈ جوانیں کھیزاں تھئی کارے بی ، تھہ دے بیروزگاری ئَ شہ ذلیل بی اغہ۔ ،،
صاحو ، نوکری آتکغاں پر مئیں نام نیاتکہ۔ عالی آ غمزدی آ گوں ولدی داثہ۔ ; اوہو ، امسوزیں یار ، بابو ئَ زر دے گِپتغاں و نوکری ئَ نام دے نیاتکہ، ، تھہ بابو ئَ شہ پھول کھذا کہ پچھے تھئی نام نیاتکہ ؟،، من پھول کھذا پر بابو آ گوئشتہ کہ نوکری ڈی ایچ او صاحب ئَ وھث بہا کھذ غنت۔ و تھئی نام ئَ نوکری ہپت لکھہ تھی یکے ئَ گوئر شوَتکئی“۔ عالی ئَ ولدی داثہ۔
گڈ تھہ بابو ئَ شہ وھذی پیسو گِپتغاں ؟،، من زی وھذی پیسو بابوئَ شہ لوٹیثغنت ، مناں گوئشتی کہ دانی من خرچیثغنت، سالے ئَ رَندا مئیں پیسو گلے دَر کفی گڈ تھہ بیا تھئی پیسواں گَڑدیناں دیاں،، عالی مونجھائی ئَ ولدی داثہ۔