زندئے گورگند

زھگا فوٹو آنی کسانیں البم آنہی دستا دات کہ ”تاتہ اے لال ئے آروس ئے فوٹو اَنت“۔ ”منی فوٹو آھتگ اِنت کہ نہ؟“

”ھو! تئی باز جوانیں فوٹو آھتگ انت“ تئی تہنائیں فوٹو سک شر درآحتہ، زھگ چہ گسا درآحت و آنرم نرم و وش وشا وتی دپسندیں شئیرا گشانافوٹو ھاں چارگا لگ اِت۔

من ھما انجیرن پتن تاکیں

بُرز کوھانی شما رُستہ

سرمنی ہچ گواتا نہ چَنڈ ینتہ

بُنڈ منی ہچ ہو رانہ میسینتہ

ہمیشی تہا آنہی لنککاں بے تاغا تیں دردے بنا کرت، آنہیا فوٹو انی کتابک جھلا ایر کرت، و وتی لنککاں پر نچگا لگ اِت۔ پاد آحت گلاسے زرت چہ کولر ا آپ ئے مان کرت پدادسدان ئے چیرئے ”زپ“پچ کرت و ڈسپرین ئے دودانگ ئے در کرت و آپانی تہا دور دات۔آزی وتی دستانی درد ئے علاجا ہسپتالا شتگ اَت۔ڈاکٹر ا آئرا ہمے سوج دات کہ ہردیں تئی دستانی درد اباھند کرت تہ دو کڑو ڈسپرین آپانی تہاماں کن و بور۔ اے درد ا دگہ علاج نیست۔ چیا کہ مزن سنی آ بازیں مردمانی رگ و بند نزور بنت و درد کن انت۔ آنہیا گلا سئے آپ یک ساہا تنگ اِت انت او پدا دستانی پر نچگا لگ اِت۔ آنہیا وتی دلا گشت۔ من پمے زوتی انچوپیر بوتُن کہ منی رگ و بنداں منا جواب دات!۔ ڈاکٹر انچو جھک جنت۔ منی دستاں ضرور انچیں نظرے بوت۔ ہرکسا ہمے گوشت کہ نازرک ئے دہ لنکک نہ انت، دَہ چراغ انت۔ آں وثی دستانی چار گا لگت۔ آنہی دراج وبار گیں لنگ کہ چوریک ئے رُستگیں چوچکا اتنت۔ پہ درد ئے زحمتا بندانی دپا گک بندگا اتنت۔ دستانی پشت ئے رگ چوکہ من نقشہ ئے دریابانی پیش دارگ ئے نشان ئے وڑ سبز و ٹنگر تگ، گشئے چہ پوستا درآھتگ و سربرا ایرتنت۔ کجام کار بوتہ کہ آنہی دستاں نہ کُرتہ۔ موسم گُشی من، درتو گشی من، تناب و بقالی، پُڑی وار، جالار، کپک و نال، تامیتک ئے نال، چندن ھار ئے موسم، ہچ چوشیں دوچے نیست کہ چہ آنہی دستاں ردبہ بیت۔ انچیں تونانے گوپت کہ مردم پہ چارگا ھیران بوت۔ آنہی وتی برونک ئے دیم ئے شفی گوں حریریں مہراں آنہی وتی دست ئے گُوپتگین یے۔ ھرکہ ھیران ات کہ گوں اے ناز رکیں دستاں کونٹانی زیریں شتان چوں مہراں چنت۔ہلکا مہر چینیں جنک بازات، بلے نہ کہ چوآنہی، گوں وتی سبکیں بردستاں، انچیں شیپانکے جت کہ پژم چواسپیتیں کھوکر ا پاد آھت انت و انچیں بارگیں جلکے رست گشئے پژم نہ انت آبریشم ئے تاب انت۔ آنہی سنجری ئیں ٹپرا کس ایر کرت نہ کرت۔ ماھے یک و دومشک و کلی آئی ضرور رنگ کرت۔

زمستان کہ شروع بوت آنہیا پہ بہار گاہ ئے شیراں، ھینزک ئے رجگ شروع کرت۔ کشون ئے مزن مزنیں ٹین پراتنت و لہر کت انت۔ آنہی ماس برے برے زھر گپت کہ ’اوماسی تراوتی جان ئے سمااست کہ نیست۔ بازیں کشونانی گُکاں تئی دیم رام بستہ۔ آدگہ جنکاں بچاردرستیں روچ وتی ششت و شود و مشت و موشا انت۔ یکے تو ئے کہ نے وتی جان ئے سما انت، نے کہ وتی رنگ ئے۔ آنہی دزگہاراں گوں آنہیا مسکرا کرت و گشت۔ خدائی خیرا تُن چونیں گنوک دادے۔ آں ہما نہیا ہماں چیز ادنت کہ قدر ا ئے نہ زانت، اگہ اے کاراں مابکر تین اَن ماچو ٹکر ا بوتن، بلے تئی دیم چوشیر ئے پترکا انت۔ آنہیا کندت و گشت من وتی ماس ئے ناز ینکاں پورہ کنین، منا نازینتگ ے کہ:

ناز جانا جنکو لوٹنت

ووچا دوچک و استاہی

علم ئے وانگ و ملائی

جُل و گالی ئے بنگیج آ

سچکانی تگردے گواپا

سینگی گڈک ئے لیبا پہ

”تہنا تراتئی ماسا نازینتہ، مارہم مئے ماساں انچو نا زینتہ“

”گڑاشمئے دست کئے آ داشتگ انت“۔ آنہیا پسہ د ات، آتہنا پہ وتانہ بلکہ درستیں دوست و نزدیک، دروھمسا ھگانی کارے کرت۔

بلے دانا ھاں راست گُشتہ کہ جنین پہ بخت نان وارت، پہ عقل و شکل نان نہ وارت۔ بتلے گشنت کہ ھوک ئے سرے بیت بخت ئے ٹکرے بیت۔ اے بتل آئرامٹ کپتگ ا ت۔ آں چہ کسانی آ وتی ناکو ئے بچ بنگل ئے ناما اَت و بنگل ئے گہارآنہی براس ئے یکیں گہارات۔ آنہی براس ئے آروس بوت، آوھد ابنگل کراچی آ وانگا ات و گشت تانکہ من وتی وانگ ھلاس نہ کرتگ گوں من سُور و آروس ئے ناما مگر اِت۔ آنہی براس ئے گسا دوچک پیدا بوت۔ گڑا گہار و ماس و پسا بنگل پہ وارگی آروسا رازی کرت۔ آروس ئے شپا ترو آ پس ئے گہارا سالونک و بانوردست ماں دست دات انت و پہ آوانی نوکیں زندئے وشی وتپا کی و آسودگی آنیکیں دعا لوٹ ات و درآحت۔ بنگل پاد آحت دروازگ ئے بست۔ پداآئی بانوری گشان ئے تل ئے سپیتیں گشان ئے سرادور کرت نفل ونت و آحت۔ نازرک ئے کشا نشت۔ بچار نازرک من دروگ بندیں مردے نہ اُن و نے کہ منا دروگ بندیں مردم دوست بیت۔ تو چماکسانی منا چہ جنی دوست نہ بوتگ ئے۔ پدانوں زمانہ دیما شُتہ، نوں علم و وانگ ئے زمانہ اِنت۔ لائقی و قابلیت ئے زمانہ انت۔ من ونتہ مزنیں تعلیمے کرتہ۔ باندامزنیں افسرے جوڑبین، ھوکہ توونتہ۔ بلے قرآن شریف، پنچ کتاب و گلستان و بوستان ئے وانوکاں مروچاں کس وانندہ نہ لیک ایت و نئے کہ کونٹ و گالی گوپوخ و دوچ ئے استادی آ منی ”سوسائٹی“ئے تہا کسے لائقی خیال کنت۔ رنگ و شکلا کس نہ شودیت و نہ وارت۔ پشت در پشت یکیں کہولا سُور و آروسا چہ زھگانی تہا، ذہنی پسماندگی، پیدا بیت و زھگ احمق و ابدال بنت۔و من نہ لوٹیں کہ منی زھگ چودُر محمد ئے زھگاں گنوک و معذور بہ بنت۔ پمیشکا من کراچی آ گوں وتی ھم سبقیں ہندوستانی مہاجر جنکے آ آروس کرتہ۔ ماس و پس من ھال نہ داتگ انت۔ بلے زوت ھال اش دئین۔من امیت کنیں کہ تو گوں آواں اے بابتا ہچ ھبرے نہ کن ئے و نے کہ چمن مزنیں امیتے کن ئے۔ چیا کہ تو منی ضرورت نئے، بلکہ منی ماس و پس ئے ضرورت ئے۔ پہ آوانی گُشگ ئے ھاتر ا من گوں تو آ روس کرت و دومی وتی گہار ئے ھاتر اکہ تو آئی بدلی ئے، و منا وتی گہارسک دوست انت!!!

آئی نُک تن نادوکاں انچو تہل بوت گشئے مارموتکے پکی یے بے آپا ایرئے برت۔ وتی سُہریں و ھشکیں لنٹان ئے گٹ چت و چمانی گلگلیں اَرس ئے ایربُرت انت۔

ماس و پس راج و کہول چہ بنگل ئے آروسی آ سئی بوت انت، بلے چے اش کرت۔ جنے گپتگ ئے، گناھے نہ کرتگ ئے۔بنگل ئے رضابوتیں تہ آئرادیری ھلاس ئے کرت،بلے نے کہ آئی پس و براساں اے بدنامی زرت نے کہ آنہی وتی دلا چوشیں گواہی دات۔ آنہیا گشت”جنک سُہریں پر زونکے نہ انت کہ روچے یکے ئے دیم آ پچ بہ بیت۔ منا تئی بنگل ئے نام و ناکو ئے مہر و دوستی بس انت۔ قسمتانی پیسلہ ماں آسماناں بیت ہرچی کہ منی قسمت“۔

پداروچ و ماہ چوماں سالاں بدل بوت انت، اے ہمانہی سر ا کہ گوستگ انت ہمازانت۔ مہربانیں ناکو آ مروچی چار سال بیت کہ آئریلہ ئے داتہ۔ تروگوں بنگلاانت۔ چیا کہ مرد و جن ہر دومزنیں افسرانت، اے شہر و پراشہر دورہ آ گردانت۔ گس و زھگانا سنبھالو کے لوٹ ایت۔مروچی ایمانداریں نوکر کجارس ایت۔ اولا پس ئے ھاتر اَت نوں پہ کئیگی ماسا بلیت، یکے دنیا ئے گزر،چونا بتلے کہ ”پیریں پہ دوکار ا شر انت۔ دیگ ئے گرادگ و گس پانی“ خیر ھدائی ثوابا و وتی بچ ئے دیگ آ گرادگے نہ پرمائت، وتی بچ ئے گس ئے پانگی و چُکانی سنبھالگا آنہی دل سرد بیت۔ نوں آتہنا نا کوئے ھنکین ئے پانگ انت۔ کس پہ زور کش ات ئے نہ کنت۔ وارت وتی پس و براسانی آ،یا وتی دست ئے پوریاتا۔ ھما گد کہ بیست سال ساری پہ پانزدہ آ دوتک اِ ش اماھانی کِرا مروچی سے او چار ہزار اِنت۔

آنہیا پداوتی لنکک چارتنت۔ آنہی زرّی لنکک ئے پیر وزہ ئے چلہ پہ آنہی چماں گشئے مران ات۔ اے چون؟۔آنہیا وتی سرچنڈینت گشئے ھمے ھیالا دور کنگ لوٹیت و پدافوٹوآنی چارگا لگ ات۔ وتی تہنا ئیں فوٹو ئے چارگا گشئے یک چُرتے ئے تہاشت۔ پاد اَحت دیوال ئے میخ ئے سر ا درتکگیں کلیت ئے جہلا کرت انت و مزنیں میخ دانیں ھندوقے پچ کرت۔ یک یکا پچانی کشگا لگ اَت، یک، دو، سے، چار، پنچ، شش۔۔بیست ئے حساب کرت ایشاں گورا کنگ ئے وھد کدی کیت؟۔ من نوں ایشاں چون کنیں۔منی چے کار ئے کاینت۔ درست ئے تہت ئے سر ا چگل دات انت۔ چہ صندوق ئے بُنا یک کوہنیں البمے در کرت۔ پدالنککانی سر ا حساب ئے جت۔ ’سی‘۔اے البم آ سی سال انت؟ اَرے۔۔۔روچ و سال چوں گوزانت!!!!

پیشی کیمرہانی گپتگیں کساں کسانیں فوٹو آنہی نظر ا نہ آحت انت۔ آنہیا پہ دلیلا زانت کہ اے کئے و آکئے انت۔ شکل اش پجارگ نہ بوت انت۔ دریگتیں اے کیمرہ ہماوھدا ببوتین اتنت، بلے ہمیشانی تہا آنہی یک فوٹوے ات کہ آگوں وتی دزگہارے آ چیر وکائی جناح روڈ ئے فوٹو گرافر ے آ چہ کشائینتگ ات۔ آنہیا ہمے فوٹو چہ البم آ درکرت و گوں نوکینا برابر ا داشت چہ دوئیناں من کجام اوں؟!!

اے کہ چو قلات ئے نوک پتکگیں سوپا انت یا اے کہ دیم ئے چو چو نستگیں امب آانت۔ایشانی ہر چی پرک انت۔چم، دپ، پونز، دنتان، من وتا راوت پجا نیاریں۔آں وتی سرا وت کندگا لگ اِت، انچو کند اِت کہ آنہی ارس درآحت انت۔ہمیشی تہا فوٹو چہ آئی دستاں کپت انت۔آئی کندگ بس بوت و آنہیا وتی لنککانی پر نچگ بنا کرت۔

ماہنامہ سنگت کوئٹہ