Extraordinary Leave

 

روز صبح سات بج کر بیس منٹ پر میرا بستر

بیدار ہوجاتا ہے

الارم کو ہر بار پانچ منٹ کے لیے سنوز

کرنے کا مقصد

ان احساسات کو سلانا ہوتا ہے

جو رات میں جاگ جاتے ہیں

میں پچھلے چودہ سال سے آنکھ کھلتے ہی

اپنا وجود بستر کی سلوٹوں سے

چنتی ہوں

اور اپنے خواب تکیے کے نیچے سلا دیتی ہوں

اپنے بال اور خواب سمیٹنے میں

زیادہ دیر نہیں لگانی چاہیے

موبائل کے نوٹیفیکیشن دیکھنے سے پہلے

 

 

میں اپنی آنکھیں واش روم کے آئنے پر

چپکا دیتی ہوں

انگلیوں پر وقت گنتے ہوئے

چہرے پر نمودار ہونے والی تاریخ کو

ٹھنڈے پانی سے دھو لینا چاہیے

بیڈ کی چادر جھاڑتے ہوئے

ہمیشہ احتیاط کرنی چاہیے

کیوں کہ تکیے کے نیچے چھپایا ہواخواب

گر کر ٹوٹ سکتا ہے

الماری میں رکھے پرفیوم

خوفناک یاد بن کر مہکنے لگیں

تو اپنا نائٹ سوٹ بدل لینا چاہیے

دسمبر کے آخری ہفتے میں

اگر مارچ کی پہلی تاریخ کی خوفناک شعائیں

آپ کی رنگت جھلسانے لگیں تو

کمرہ چھوڑنے سے پہلے منہ پر

“سن سکرین” لگا لینا چاہیے۔۔۔!

 

ماہتاک سنگت کوئٹہ

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*