ڈاڈھر

 

اے ڈاڈھر ایں۔ اے علاقہ بلوچستان ئے کہنیں وسماں شہ یکے زانغ بیث۔ اے ھندا شہ گپلے پندھا مہر گڑھ ایں۔ مہر گڑھ باروا آرکیالوجسٹ گوئش انت کہ اے اولی انسانی وسماں شہ یکے یعنی سر سری تہذیب شہ مہر گڑھ ئا رواں بیثہ۔ میر چاکر دورا ڈھاڈر یہ مشہوریں شہرے بیثہ۔ گوئش انت کہ ڈاڈھرا ملک میران ئے کلات بیثہ۔ ملک میران بھڑیں مڑدے اث، آں رند لاشار ئے سی سالی جنگا  نلی گٹا جنغ بیثہ۔

اللہ بیار ملک میرانا
رِند ئے تنگویں ھِیرانا
میرانیں ھماں درشکے بر
شہ سندھا  کارنت ئی سوذاگر

ڈاڈھر ئے شہر بولان گٹ ئے دف سرا آباد ایں۔ کہنیں دورا اے شہر ئے یک جنگی اہمیتے است اث۔ گوئش انت کہ بولانا شہ گوئزغ مستریں طاقتے ئا پہ دہ مزائیں جہدے ئے کار اث۔ ڈھاڈر اوائلی دورا وثی توپکانی وجہ ئا شہ دہ مشہور بیثہ۔ ایذا شہ ڈاڈھری توپک تیار بیئغا پذا تھی ھندا دیم دیئغ بیث اثنت۔ اے ڈاڈھری توپک روش مروشی ئا شوقینیں مڑدماں گوئر ایر انت۔
ڈاڈھر ئے کہنیں شاہی بازار داں نی ئا استیں۔ ایذا شہ سنی سوران، بھاگ ناڑی، سیوی، کوئٹہ او تھی بازیں ھنداں دگ رو انت۔
ایذی مڑدمانی کار مالداری و کڑد او کشار ایں۔ روڈ ئے ھڑدوئیں کشاں مڑدم فصلانی لافا کارا وھذان پدھر بنت۔ ایذا مالانی گڑدنا بستغیں ٹلی دھنار و گووالانی روحاں را دھیرواں دینت۔ کہیرانی چوٹواں چروخیں لیڑوانی بگ شہ دیرا چماں سیر دینت۔
مکتبہ درخانی دہ ھمے ڈیہہ ئیغ اث۔ مکتبہ درخانی ئا خصوصاً عیسائی مشینری خلاف یک مستریں کردارے ادا کثہ، آں دہ ھمے علاقہ ئا بیثہ۔ مکتبہ درخانی ئا بلوچی و براھوی زوان ئا نہ صرف قرآن پاک ئے ترجمہ کثہ بلکہ تھی مذھبی لٹریچر ئے سرا دہ بھڑیں کارے کثہ۔
ڈاڈھرا شہ چھیئے کلومیٹر دیر سیوی و ڈاڈھر نیاما ناڑی کئور ئے ہر ول لافا یک بلوچی دفترے مان ایں۔ ناڑی گوں وثی نوخ آفاں ڈیہہ ئے ڈغاراں ریج کنانا روث۔ ایذا کرپاس، گندیم، زرت، جانبو، سریہہ  کشار گوں وثی سوزیں بوٹغاں چماں ساڑت کن انت۔ پیش، کنر، گز و کہیر اے ڈیہہ ئے مشہوریں درشک انت۔
ڈاڈھر ئے روش ٹکی پلوا مشکاف ئے وسمے آبادیں۔ اے وسم کوہاں شہ کمیں جہلا ایں۔ ایذی ڈغاراں سِخ بازیں۔ اے سِخ باقاعدہ تعمیرات لافا کار کئیث۔ ایذا گیشتری ئا کرپاس کشغ بیث۔ اے ڈیہہ ئے کڑد و کشار سیاہ آف سرا بیث۔ ڈاڈھر ئے ریل سٹیشن مشکاف ئا ایں۔ مشکاف سٹیشن شہرا شہ جوائیں گپلے دیریں۔ مشکاف شہر ئے گیشتریں آبادی کوسغانی ایں۔ ایشاں ژہ علاؤہ بنگلزئی و مستوئی دہ است انت۔
مشکاف باروا مست توکلی گوئشیث:

گواریت شوا نوذاں گوارانا گوئزیت
آں شش گیستیں شہیداں سیر آف کن ایت
گڈ بنا مشکاف ئا رشیت

من مشکاف ئا چھیئے مڑدماں شہ اے شش گیستیں شہیدانی باروا پول کثہ مگر مناں حال کس ئا نہ داثہ۔

ڈھاڈر شہرا شہ کمیں دیر بولان کئور ئا را تاک جنغ بیثغ انت۔ ایشی ئا را بولان ویئر گوئشغ بیث۔ بولان ویئر ئے آف ئا را زراعت ئے محکمہ کڑد کشار ئا پہ بہر بانگ کنت۔ اے ھند یک جوانیں نظارہے پیش داریث۔ اے یک پکنک پوانٹے دہ استیں ایذا یک سرکاری ریسٹ ہاؤسے دہ استیں۔
ہرکذیں بولان ئا پیہہ ئے 5 منٹ پندھ ئا پذا دربھی نامیں ھندے کئیث۔ اوذا کُنرانی درشک باز انت۔ مارچ ئے ماہ ئا اے کنر پش انت۔ چک ھمے کنراں پلاسٹکانی لوتاں مان کن انت و بہا کن انت۔ اے کنر وثی وشی وجہا شہ باز مشہور انت۔ ایذا موسم حسابا سبزی دہ بہا بنت۔ روڈ کندھیاں سبزی والہانی منّح ماناختی انت۔
ڈاڈھر و سیوی بلوچی مزائیں سیستانی شہر انت، افسوس کہ اے شہر نی اولی رنگا نہ انت چو کہ چاکری عہد اثنت۔ اے شہرانی بے حالی گوئشے کہ ھماں سیوی میلہ ئا بیثہ کہ رند و لاشار ئے اسپ تاشی ئے کٹ و ہار کینغ بیثو دلاں نشتہ۔ چو کہ گوئشنت:
ریحان رامن شراں
سیوی ڈاڈھر براں

اے الکہہ مہرانی ٹکاں سینغا داشتی ایں۔ مست و شیح ئے مہرانی پندھ اے ڈغار ئے سینغ سرا نشک انت۔ مکتبہ درخانی ئے عالمانی ٹک دائیں زیندغ انت، و وثی استی پاراں دینت۔
شیھ مریذا ھانل ئے عشق ئا ڈیہہ اشتہ مگر ھانل داں روش مروشی اے ڈیہہ ئے سینغ صبری ئا وپتغ و وھاویں۔ مہر ونڈوخ و مہر پولوخ شہ دیر دیرا مہرناخیں ھانل ئے گور زیارت کنغا کاینت۔
ڈاڈھر مئیں خیالا بلوچستان ئے ھماں چندیں علاقہانی لافا اواریں کہ پیلویں سال سوز ایں۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*