لاچاری

 

اے  دولاچاری ئے کسّہ انت۔  یکّے آ وتی عادت پیلو کنگی ات و دومی آ  وتی شْدئے  آس توسگی ات۔ چپ و چوٹیں کوہانی ندارگے تاں دْوراں روان ات۔ ریل ئے  دگ دریاو سیاہ وسنگوئیں کوہانی میانا  سہریں ریکانی سرا چیر گیتکگ ات۔ ریل انّی کمو دیراں پیسر جنوآ  چہ در اتکگ ات۔ نوں پٹڑی(دگ) سرا چو آہن ئے  مارا  شیپ گرگا ات۔ آچو گارئے  تہا پتروکیں دلوتے ئے پیما کدی سْرنگ ئے  تہا ناگہاں  پترتگ و گار بوتگ ات وپدا بچا کمو دیمترا دوبارہ زائر بوتگ ات۔ گاڑی ئے آخری ڈبّہ ئے تہا یک شر رنگ و پزّوریں  ورنائیں  جنکے نشتگ ات۔ آنہی دیم پہ دیما یک سیٹے ئے  سرا یک ورنائیں  بچکے نشتگ ات۔ آ ہر دو بے توار اتنت بلئے گہے گہے یکّے  دومی ئے   دیمگا چارگا اتنت۔  جنین ئے  عمر چو بیست و پنچ سالئے  پیما ات۔ آ کھڑکی ئے   نزیک آ  نشتگ و ڈنّئے  ندارگاں  چاراں وتی بالادا  وشنود کنگا ات۔ آ چو انچائیں چلوپگ کاریں  جنینے   پیما  جانا پْرّو پزّور ات۔  آنہی ئے زنڈیں  رژنائیں  چم، پزّوریں  گور و  پراہیں سینگ  آنہی جان سلامتی ئے نشان اتنت۔ آنہی سیٹ ئے   چیرا بازیں  پارسلے ایر ات و آنہی ئے کْٹّا  یک ٹوکری یے ایر ات۔

 

ورنائیں بچک چو بیست  سالیگیں  مردے پیما ات۔ آ چو لاگر و  گرم  و جلانی سرا کار کنوکیں مردانی وڑا روچ سوتکیں مردے ات۔ آنہی سیاہ تاپیں رنگ اے گواہی آدیگ ات کہ آ ماں  جلانی سرا  کار کنگا  عادت انت۔ آنہی کشا  یک مٹکا یے ایر ات۔ آنہی ئے سرجمیں مال و مڈّی ہمیش ات۔ مٹکا ئے تہا بید یک جوڑی یے  گْد، سواس ویک جیکٹے ا ٓ دگہ ہچ نیست ات۔ آنہی  وتی بردو ٹیکم ہر دو یک سادی ٹکّرے آ بستگ اتنت و وتی سیٹ ئے چیرا ایر کتگ اتنت۔  بگندئے آ پہ کارئے   شوہازا روگا ات۔ مئی ئے ماہ ئے آخری روچ اتنت۔روچ ماں دریائے  لمبا گشئے  آچ پر ریچگا ات۔ ریل ئے  پچیں کھڑکیاں چہ وش و سارتیں بو آہگا ات۔ مالٹائے نیوگ زیبناکیں پْلّاں  چہ لڈّتگ اتنت۔ آہانی وشبو جنگل ئے گلابانی وشبواں گوں  ہوار بوہگا پد یک اجبیں  وشبویے آتارگا اتنت۔ اے ہندا گلاب سک باز ات۔ ہر دیمگا بچار بس گلاب  اتنت۔ گلابئےِ میزرانیں وشبوہاں دائم گوات آ را گوں وشبواں  سر ریچ  کتگ ات۔ اے مست کنوکیں  وشبو ئے سوبا   ہر کسی تبادائم یک کیف وچاڑے مان ات۔

 

ریل۔۔۔۔۔۔ سکاّں آہستک روگ ات۔ انچو گشئے زاناں آ  اوں اے ابرم ئے  باگ ئے تہا آہستک آہستکا  گَشت  کنگا ات۔ ریلا  لہتیں کسان کسان و  اسپیتکیں  لوگانی گورئے  سٹیشنانی سرا بار بارا داشتگ ات و پدا لہتیں سہتا پد زورداریں سیٹی یے ئے  توار کتگ ات و ریلا  پدا روگ بندات کتگ ات۔ آ وہداں  ہچ مساپر ریلا سوار بوہگا نہ ات۔ انچش گمان بوہگا ات کہ گشئے زاناں  سرجمیں دگنیا گِڈّگا ات و ہزّام ئے اے گرمیں سہبا  کس پہ سپر کنگا  ساجو نہ ات۔

 

جنینا سہت پہ سہتا وتی چم بند کتگ اتنت بلئے وہدیکہ  ہر وہدا آنہیا مارت کہ  آنہی ئے کْٹّ ئے سْنْدک شتریت و کپیت  تہ آنہیا ناگہاں وتی چماناں پچ کتگ ات و  سْندک  گوں  زوراں داشتگ ات و پدا  لہتیں  سہتا ڈنّا چارتگ ات ئے و پدا کوچنڈگا  بوتگ ات۔ آنہیا پیشانی ئے  سرا ہیدئے   ترمپ  تچگا اتنت و آ گوں نگیگیا سا ہ کشّگا ات انچو گشئے زاناں  آ دم توس بوہگا ات۔

 

ورنائیں بچکا وتی زنوک سین ئے  سرا تکہ داتگ ات و  چو منّت کشّیں  دہکانانی پیما وش واب ات۔

 

ریل چہ  سٹیشنے آ در اتک و  ناگہاں جنین وابا چہ جہہ سراِت و سْندکا چہ یک ڈبل روٹی یے، لہتیں لہڈ داتگیں ہیک و  تازہ ایں  میمیچ و تْرند آپ کش ات ئے  و ورگا بوت۔ ورنائیں  بچک اوں پاد اتکگ ات۔ آ جنینا را  ورگا  چارگا ات آنہی ئے  چم  جنین ئے   دستہ بگر داں دپا  ہر لنکہ آ سک اتنت۔ آنہی ئے گْل تہا شتگ اتنت، آنہیا وتی  ہر دو دست  سینگ ئے سرا بستگ اتنت و  وتی لنٹاں مچگا ات۔ آ ذالارا کدی کدی نیم چمیا چارگا ات و کدی کدی آ دوئینانی  چماں ڈکّ وارتگ ات تہ آ سٹ اِتگ ات و وتی دیم ئے   آ دیما  کتگ ات۔

 

جنینا  ہر لنکہ ئے  ورگا پد گٹّے  تْرند آپ  نوش جان کتگ اتا پہ ساہ کشّگا  کمو  دست ئے داشتگ ات، ہمے ہسابا کمو دیراں پد ہر چیز چہ نگاہاں گار بوتگ ات، ہیک،  ڈبل روٹی، میمچ، تْرند آپ  ہچ نہ بچّ اِ تگ ات۔ جنین ئے  نانانی ورگ وہلاس کنگا  گوں ورنائیں بچکا وتی چم بند کت انت۔

 

جنینا کمو نگیگی مارت و آنہیا وتی دست پْشتا  بْرت و وتی مْرّ یں  سین پوش  ئے  ٹاسین پچ کت ہمے سہتا  ورناآ اوں وتی چم پچ کت انت و آنہی ئے  دیمگا چارت۔

 

جنینا آ ورنائے  نگاہانی ہچ پرواہ نہ داشت و بے تواری آ گوں وتی جیگ بندئے  بٹناں  پچ کنگا بوت چیا کہ نہی ئے سینگ ئے  سرئے  رْستگیں کوہانی سوبا آنہی ئے  جامگ پْشتی نیمگا  سک تْرند بوتگ ات۔آنہیا انچو کہ بْرزی دو بٹن پچ کت آنہی ئے دیم ئے  سرا تاہیرئے  رژنے تالان بوت۔ وہدیکہ آ پْر تاہیر بوت تہ ناگہاں آنہیا گوں ورناآماں اطالوی زبانا  گشت  ” چوں گرم انت کہ نفس پْر نہ بیت”۔ ورناآ ماں ہمے زبانا گوں ہمے گالوارا پسّہ دات ” ہو۔۔۔ اے پیمیں موسما کجا سپر کنگ بیت ایں “۔

 

چے تو پائیٹ مونٹ ئے جاہ منندے ئے؟ جنینا جست کت۔ ھو من آستیا چہ پیداکوں۔ منی سیادی گوں کسالی آانت، جنینا گشت۔ آ ہردو ہمساہیگیں کوچگانی جاہ منند اتنت۔ آہاں وت ماں وتا  گپ کنگ بنا کتگ ات و  مدامی ایں  وڑا ہما انچائیں  گپّاں  لیس و پلّیس  کنگا اتنت کہ ہمے پیمیں ہبر اے وڑیں مردمانی عادت ات۔ آیاں وتی لوگ و  سیادوآزیزانی باروا ہبر کنگ بنا کت تہ سر پد بوتاں کہ آ یکّے دومی ئے  بازیں پجّاروکیں   مردماں  زان انت۔ آ نوک نوکیں نام گرگا بوتنت و  پجّاروکیں  مردمانی نام آیانی میانا نزیکی آرگا ات۔ آیا ں وتی ہبر ئے کنگ پدا بنا کت۔

 

آ ذال  سْور کتگیں ذالے ات۔ آنہی ئے سہہ چک اتنت۔ آنہیا زہگاناں وتی گوہارئے گورا ایر کتگ ات وانّو فرانس ئے یک  ازگاریں  گسے آ پہ کارئے کنگا روگا ات۔  اودآنہی کار آ لوگ ئے بی بی ئے  نْنکاَرا شیرئے میچینگ ات۔  آ ورنا اوں  پہ کارئے شوہازا در اتکگ ات۔ آئیارا گشگ بوتگ ات کہ مار سیلزآ  کارو  روز گار رسگ ئے اْمیت باز انت۔ چیا کہ اودا  بان وماڈی بندگ ئے بازیں کارے بوہگا انت۔

 

اے گپّ ورپاں پد آ ہر دوئیں بے توار بوتاں۔ گرمی نوں  سگّگاچہ ڈن بوہگا ات۔ گوات ئے  ہمراہیا دنزو منز اوں چست بوہگا اتنت۔ گلاب و مالٹائے بواوں تیز بوتگ ات۔ دوئیں مساپر  یکبرے  پدا  واب ئے وادیانی تہا گار بوت انت۔ ہمے میاناورنائے  چم کمو  پچ بو تنت تہ آئیا وتی دیما نشتگیں جنین ئے  دیمگا چارت۔ جنین ئے چم مْچ اتنت وآنہی ئے دیمئے  سرا نگیگی  تالان ات۔ ورنا تاں دیراں آئیا چارگا ات۔ پدا آئیا وتی چم بند کت انت و ناگہاں پدا ہر دوکانی چم یکپارگی پچ بوت انت وآ یکے دومیا چارگا بوت انت۔ روچ دریا ئے نیمگا روان ات و  دریائے  نیلگیں آپ ابیتک ابیتک بو ہگا ات۔ گوات ئے تہا کموکیں  سارتی یے ودی بوتگ ات۔

 

ورنا آ مارت کہ جنین ئے چم بے کرار بوتگ انت و آنہی ئے دیم  تپستگ ات انچش گشئے زاناں آئیا را ساہ ئے  کشگا  تکلیف بوہگا ات۔  آنہی ئے  جیگ نوں  سرجمیا پچ ات و آنہیا نگاہانی  تہا اجب  وابینگی یے سہرا بوہگا ات۔ منا  زیکین انت کہ من کسے آ را شیر نہ میچینتگ۔ جنینا سْک سْکا گوں گشت۔ انچو گمان بوہگا انت کہ من بے ہوش باں۔۔

 

ورنا بے توار ات، آنہی ئے فہم ہچ کارا نہ ات کہ آئیا  چے پسّہ بدنت۔ جنینا گشت کہ ہر وہداکہ یک  جنینے چو منی وڑا شیرا پْر بہ بیت تہ پہ آئیا  روچے کما چہ کم  سہہ برگا شیر میچینگ  ہژدری انت اگاں ناں تہ  آ اجب  دم توس بوہگ ماریتیں۔  منی دلئے  سرا پورا بلائیں بوجے ایر انت۔۔ شیر ئے بازی اوں ازاب کنت۔

 

جی۔۔۔ جی  ہو۔۔۔ راست گش ئے  تو۔۔۔ تو الّما  سک نگیگ  بوہگا ئے؟  ورنا آ  گشت۔

 

جنین ئے  دیم زرد بوہگا ات  وآنہی ئے سرجمیں بدن چہ ہیداں چہ میچل بوتگ ات۔ آ الّما بے ہوش بوہگی ات۔ منا بس لنکْکانی سرا زور پر دیگی انت۔ جنین چو سْک سْکی ئے  پیما جبڑگا بوت۔  پدا گشئے زاناں شیرئے  چمّگے  پچ  بیت ایں۔ گندگا اے چیز اجب  لگّیت بلئے  اے ہبر  دروگے نہ انت تو باور نہ کنئے  کہ کسالی آ  مئے بازیں  ہمساہگے پہ منی چارگا مچ بوتگ ات۔

 

انچو گش ئے ہاں۔۔۔۔۔؟

 

ہو۔۔۔۔۔۔ راست گشیں۔۔۔ من ترا انوں پیشداشت  کت کنیں  بلئے  چو کنگاگوں منا ہچ تاہیر نہ رسیت پر چا کہ لنکْکانی  زور پر دیگا گوں اینکس  شیر در نئیت ایں  کہ منی دلئے سرئے  بوج کم بہ بیتیں۔۔ جنین بے توار بوت۔

 

ریل سٹیشن ئے  سرا کمو  اوشتات۔ پلیٹ فارمئے سرا ماں اگڈیاں پتاتگیں پوشاکاں گوں یک سکّیں  کمزورو ناتوانیں  جنینے آ  وتی چک بڈآات۔ گونڈو گریگوگا ات۔ جنینا آسردے  کش ات و گشت۔ من اے جنیناکمکا کت کنیں و   آ گونڈومنی کمکا کت کنت۔

 

تو وا اے  اندازگ الّما جتگ کہ من یک ازگاریں ذالے نہ اوں۔ من وتی  لوگ و کسان کسانکیں  زہگاناں یل داتگ کہ کمو زر بکما ئینیں  بلئے گندئے اگاں منا اے گونڈوئے شیر ئے میچینگ ئے  اجازت دیگ بہ بیت ایں  تہ من اشی ئے ماتا را  پنچ فرانک دیگا ساجو اوں۔۔ اے رنگا اے گونڈوئے  گژن ہلاس بیت ومن اوں  آرامئے دل باں۔ منا نوکیں زندمانے رسیتیں۔

 

آ پدا بیتوار بوت۔ آئیا وتی گرمیں دست با زرنداں  وتی پیشانیا لتارت۔ آنہی ئے پیشانی چہ ہیداں میچل ات۔ آئیا نارگا گوں گشت۔۔۔ نوں۔۔ نوں من سگّ ات کت نہ کنیں۔ منا  انچو گمان بوہگا انت کہ من دم توس بیں مریں۔  جنینابے سماہی آ  گوں وتی جامگ درت۔ ورنائے  چم  در اتک انت۔ آ ذال ئے سینگ سک پزّور ات۔  جنین ئے نارگ ودّان اتنت۔  آہ۔۔۔۔  ابّو۔۔۔ آہ۔۔۔اْف۔۔۔۔ نوں  من چے بکنیں۔۔۔۔

 

ریل  یکبرے پدا روگا بوت۔ تیزیں گواتانی ہمراہی آ یکبرے پدا  وشبوہانی دردے  آہگا بوت۔ ریل یک  پْلّے ئے سرا گوزگا ات۔ کدی کدی دریائے تہا کسان کسانیں کٹی یے گندگ بوتگ ات۔ بلئے انچش گشئے زاناں اوشتاتگیں دریائے تہا واب ات۔ ورناآ تْرسان و کمو لہج کنانا  گوں جْست کت۔۔۔

 

مادام!    من بگندئے  کمو تئی کمکا  کرت بکنیں۔۔۔۔۔؟

 

جنیناگوں۔۔۔ ناتوانیں  توارے آ پسّہ دات۔۔۔۔۔ ” ہو”۔۔۔ اگاں تو بلوٹ ئے  تئی منّت وار باں۔۔۔۔ نوں من ہچ سگّت  کت  نہ کنیں۔۔۔

 

ورنا کونڈانی سرا نشت۔۔ جنیناکہ وہدے دوئیں دستاں گوں وتی گور (گودان)  گپت و  دیما بْرت  تہ شیرئے یک ترمپے  در اتکگ ات  تہ ورناآ اشتاپیاگوں  آ چٹ ات و پدا  اشتاپی آ گوں شیرئے   مچگا بوت۔

 

آنہیا وتی ہر دو دست جنین ئے سینا  سک کتگ اتنت و  آہستک آہستکا شیر مچگا ات۔

 

کمو دیراں پد جنینا ناگہاں  گشت۔ ” اے دیما نوں بس کاں آ دیما مچ”

 

ورنا آ گوں مزنیں تابعداری آدومی دیما دپ سک کْت۔ جنینا بے ہیالی آ گوں  ہر دو دست ورنائے  بڈّئے سک کت انت و  تاہیر گرگئے گوما ساہ  کشا  بوت۔ نوں  آ مالٹاہانی بوہاں چہ مزگ  گر گ ات۔  ” چاگرد چینکس  زیبدار انت” آئیا گشت۔ ورنا آ ہچ پسّہ نہ دات۔ آ چو کرنی ایں  تْنّیگا  چہ اے ہْدا ئے  داتگیں چمّگا چہ وتی  تْنّاپروشگا ات۔ آئیا انگت گیشتر پہ وتی بالادئے وشنود کنگا وتی ہر دو چم بند کت انت۔  بلئے جنینا  آ ئیارا کمو پشتا  تیلانک دیانا گشت۔۔۔ ” بس کاں نوں  امینچک بس انت۔ نوں منا تا ہیر رستگ، تو منا نوکیں  زندے داتگ ”

 

ورنا چہ آستونکاں  گوں وتی دپا پاک کنانا پاد اتک۔ جنین  وتی سینگا پردیانا گشگابوت۔

 

” تئی لکھ منّت  واجہ۔۔۔۔۔  من چہ تئی نیکیاں ہچبر  در نیا ئیں۔۔۔ ”

 

ورنا آ گوں گریواسکی توارے  آگشت۔۔۔

 

” منّت وار من تئی بباں۔۔۔۔ بانک۔۔۔  کہ  منا چہ گوستگیں دو روچاں    اسپیت تام  حرام انتِ۔