دی پرنس

 

اے کتاب ءٙ نکولو میکیاولی(1449-1527) اِٹلی ءِ ڈپلومیٹ، فلسفی ءُ تاریخ دان 1512 ءٙ نبشتہ کنت، اے ھما دور اِنت کہ سرجمیں یورپ جنگ ءُ جدل ءِ آماچ اِنت، ھر یکے دومی ءِ بگیری ءٙ پاور ءِ واست ءٙ جنگ ءٙ بیت، اے دور Renaissance period گُشگ ھم بیت کہ دگنیا ءِ تاریخ ءِ تہا اے دور ءِ بلائیں ارزشت ءِ ھست چی ءَ کہ اے ھما وھد انت کہ یورپ مٹ بوگ ءٙ بیت، اے ھما دور اِنت کہ سیاست، لبزانک، فلسفہ ءُ معیشت نوکیں دروشم ءٙ رُدوم زورگ ءٙ بنت ءُ بلائیں بلائیں فلسفی ءُ سیاسی زانتکار ھمئے دور ءِ تہا پیداک بنت، مرچی اگاں بیست ءُ یکمی کرن ءٙ دگنیا مزنیں رنگ ءٙ کامیاب بوتگ گڈا Renaissance period ءِ یک بلائیں کِردے ھست، ءُ دی پرنس کتاب ءِ Renaissance period ءِ تہا سیاسی ھوالہ ءٙ یک بلائیں ارزشتے بوتگ ءُ ھمئے رنگ ءٙ دی پرنس کتاب ءٙ مرچگیں دور ءِ تہا ھم وتی ھما ارزشت داشتگ کہ آ وھد ءِ تہا بوتگ۔۔۔

دی پرنس کتاب ءِ سرجمیں مول ءُ مراد ھمیش اِنت کہ یک بادشاھے کہ نوکیں زمینے ءِ سرا قبضہ کنت یا کہ پہ پت ءُ پیرکی کسے ءٙ پاور رستگ گڈا آ کجام سیاسی ءُ چاگردی بنیاداں چہ ھما دیار ءٙ حُکمرانی کت کنت ءُ وتی پاور ءٙ رکینت کُت کنت، اے کتاب ءٙ نکولو میکیاولی یورپ ءِ میڈیچی پیملی ءِ بادشاہ لورنزو ڈی میڈیچی (Lorenzo De Medici) ءِ واست ءٙ نبشتہ کنت کہ Republic Of Florence ءِ تہا یک برے پدا پاور ءٙ اتکگ۔۔۔۔

نکولو میکیاولی وت ھمئے ریاست ءِ پوجی ءُ سیاسی مردمے بیت کہ بازیں ناکامی ءٙ چہ پاور ءٙ زِبہر کنگ بوتگ اٙنت، نوکیں بادشاہ ءِ دست ءَ نکولو میکیاولی زندان ءٙ بند کنگ بیت، وھدے میکیاولی چہ زندان ءٙ در کنگ بیت گڈا چہ شہر ءٙ در کنگ بیت ءُ وتی زند ءٙ یک گونڈیں میتگے ءٙ گوازینگ ءٙ بیت ءُ ھمئے وھد ءٙ اے کتاب ءٙ نبشتہ کنت، نیکولو میکیاولی وتی گوستگیں ناکامیں تجربات ءُ تاریخ ءِ بنیاد ءٙ نزوریاں پدّر کنت ءُ بازیں سوب دنت ءُ گُش ایت کہ باز انچیں نزوریں کار ھست انت کہ بادشاہ اِش کن انت کہ ھمیشانی سوب ءٙ بادشاھت نِزور ترّ انت ءُ اود ءِ بادشاھانی سر ءٙ دگہ مزنیں ریاست اُرش کن اٙنت یا کہ ھما ھند ءُ دمگانی کوھنیں حکمران پدا وتی دیاراں قبضہ کن اٙنت، گڈا میکیاولی دی پرنس ءٙ نبشتہ کنت کہ یک بادشاھے ءٙ چی کنگی اِنت ءُ چی نہ کنگی اِنت کہ وتی پاور ءٙ رکّینت بہ کنت۔۔۔۔۔

اے کتاب ءِ تہا میکیاولی نبشتہ کنت کہ اے مسلہ نہ کنت کہ یک بادشاھے چون یک علاقہے ءٙ پاور ءٙ اتکگ، بادشاہ ھرچ وڈیں دروشم ءٙ پاور اتکگ مسلئہ نہ کنت، مسلئہ اِیش انت کہ نوں پاور چون رکینگی اِنت، اے واست ءٙ الّم اِنت کہ بادشاہ ءٙ وتی ریاست ءِ واست ءٙ لہتے انچیں تُرندیں بن ہشت (Foundations) جوڈ کنگی اِنت کہ کس ریاست ءٙ پروش دات مہ کنت، اے بن ہشتانی تہا (Military, Economy, Law and order) ھست اٙنت۔۔۔ نیکولو ءِ گُشگ اِنت کہ اے ھما بن ہشت انت کہ ریاست ءِ اے چیز مضبوط بِہ بنت گڈا آ بادشاہ ءٙ کس پہ حکمرانی ءٙ داشت نہ کنت۔۔۔۔۔

نکولو گُش ایت یک بادشاھے اولی کار وتی ریاست ءِ واست ءٙ اے بہ بیت کہ وتی علاقہ ءِ رکینگ ءِ واست ءٙ مضبوطیں لشکرے جوڈ بہ کنت، یک انچیں مضبوط ءُ تمردیں لشکرے بہِ بیت کہ بادشاہ ءُ ریاست ءِ رکینگ ءِ واست ءٙ مدام ساڈی بِہ بیت۔۔۔۔ ایشی ءَ ابید نبشتہ کار گُش ایت کہ ریاست ءِ کرّا مال ءُ دولت ھمینچو بہ بیت کہ ھر وھد ءٙ ریاست ءِ زلورتاں سرجم بہ کنت، نبشتہ کار لشکر ءُ مال ءُ دولت ءٙ سک باز اٙرزشت دنت ءُ گُش ایت کہ اے دوئینانی نہ بوگ ءٙ چہ ریاست سک نِزور تر انت ءُ ریاستانی سرا گیشیں اُرش ھمئے سوب ءٙ کنگ بنت، نیکولو گُش ایت باز انچیں بادشاہ بنت کہ وتی مھلوک ءِ دل ءٙ ترس ءُ بیم جوڈ کن اٙنت ءُ مھلوک ھمئے ترس ءِ سوب ءٙ بادشاہ ءِ ھلاپ ءٙ گپ نہ کن اٙنت ءُ ھر وھد ءٙ بادشاہ ءِ پاسداری ءٙ کن اٙنت ءُ بازیں بادشاہ انچیں بنت کہ مہر دٙیُوک بنت ءُ مھلوک ءٙ گوں شرّیں سیادی دار اٙنت، بلے گُش ایت کہ ھمئے بادشاہ کہ رحم دل بنت ایشانی ءِ سرا گیش اُرش کنگ بیت ءُ Internally and externally ایشانی پاور challenge کنگ بنت، ھمئے ھاتر ءٙ یک بادشاھے ءٙ سک باز رحم دل بوگی نہ اِنت بلکیں وتی پاور ءٙ Maintain کنگ ءِ ھاتر ءٙ اے الم اِنت کہ وتی مھلوک ءِ ءُ وتی دشمن ءِ دل ءٙ ترس ءُ بیم جوڈ بہ کنت۔۔۔۔۔۔

نکولو گُش ایت یک بادشاھے ءِ واست ءٙ الم اِنت کہ وتی زمین ءِ بابت ءَ سرپد بہ بیت، تاریخ ءِ ھم سرپدی بہ بیت ءُ زہنی ھوالہ ءٙ ھم تیار بہ بیت، بادشاہ کجام وڈ ھم بہ بیت بلے آئی ءِ تہا سیاسی بودشت بہ بیت یک ریاستے ءِ سرا حکمرانی کنگ ئے ءُ وتی مھلوک ءِ نفسیات ءٙ ھم بِزانت تاکہ آیانی سرا شوکیں رنگ ءٙ حکمرانی کُت بِہ کنت، باز بادشاہ ھست اٙنت کہ دگرانی گپانی سرا بادشاھت کن اٙنت ءُ وتی جند ءِ تہا ھچ وڈیں بودشت ئے نیست، اے رنگیں ریاست گیش پروش ور اٙنت ءُ اے ریاستانی سرا دگر قبضہ کن اٙنت۔۔۔۔۔

دگہ جاگہے گُش ایت کہ باز انچیں بادشاہ ھست اٙنت کہ پہ مال ءُ دولت Mercenary بِزاں کہ کرایہ سرا دگرے لشکر ءٙ وتی ریاست ءِ رکینگ ءِ واست ءٙ دار اٙنت، اے وڈیں لشکر ریاست ءٙ گیش تاوان دنت، اے وڈیں لشکر بادشاہ ءٙ چہ گیش وتی نپ ءِ واست ءٙ جنگ کن اٙنت، پمئے حاتر ءٙ بادشاہ ءِ واست ءٙ اے الم اِنت کہ وتی جند ءِ تمردیں لشکرے بہ بیت کہ ھر وھد ءٙ بادشاہ ءِ مفاد ءُ ریاست ءٙ رکینت بہ کنت۔۔۔۔

بادشاہ زہنی ھوالہ ءٙ ھمنچو تیار بہ بیت کہ ھر وھد ءٙ پاور ءٙ برابر کت بہ کنت ءُ اے ھم الم اِنت کہ بادشاہ بہ زانت کہ منی اسل مردم کے اٙنت، بادشاہ کہ پاور ءٙ بیت گڈا آئی ءِ کش ءُ گور ءَ باز مردم کئیت ءُ آئی ءٙ نزّیک بیت ءُ وتی نپ ءِ واست ءٙ، بادشاہ ءِ واست ءٙ الم اِنت کہ بھروسہ مندیں مردم وتی نزیک ءٙ بہ داریت ءُ ایڈمنسٹریشن ءِ تہا انچیں مردم بیار ایت کہ ھر وھد ءٙ بادشاہ ءُ ریاست ءِ فائدگ ءٙ بِہ رکین ایت نا کہ وتی، اے رنگیں مردم بادشاہ ءُ ریاست ءٙ سک باز تاوان دے انت۔۔۔نکولو میکیاولی اے کتاب ءِ تہا Roman Empire ءِ بازیں Emperors ءِ درور ءٙ دنت ءُ گُش ایت کہ بازیں Emperors اتکگ اٙنت ءُ شوکیں دروشمی ءٙ پاور Maintain کُتگ ءُ امپایر ءٙ پائدگ داتگ، بلے بازیں انچیں ناتجربہ کار بوتگ اٙنت کہ آیاں مدام امپایر تاوان داتگ ءُ پدا گُش ایت کہ نو وھد مٹ بوتگ بائید انت نوں بادشاہ ھمئے نزوریاں بہ زان اٙنت ءُ وتی بادشاھت ءِ ھاتر ءٙ شرّیں گامگیج بُزور اٙنت گڈا وتی ریاست ءٙ رکّینت کن اٙنت۔۔۔۔

اے کتاب یک Organizational Structure ءِ پھمگ ءُ آئی ءٙ شرّیں رنگ ءِ دیگ ءِ ھاتر ءٙ سک جوان اِنت، ءُ مرچگیں دگنیا ءِ تہا ھم بلائیں سیاسی ءُ چاگردی سروک اے کتاب ءٙ وان اٙنت ءُ وتی ریاست ءُ ادارھانی تہا میکیاولی ءِ اے سر ءُ سوجاں کارمرز کن اٙنت۔۔۔۔۔ ما وتی بہ زاں بلوچ چاگرد ءِ تہا اگاں بچار ایں گڈا مئے ھم ھرچ رنگیں ادارہ، سیاسی بِہ بنت یا چاگردی ءُ لبزانکی ھمئے نزوریانی آماچ اٙنت ءُ اے کتاب مرچی ھم مئے سنگتانی واست ءٙ یک جوانیں سوگاتے کہ ایشی ءَ بوان اٙنت ءُ وتی ادارھانی شر کنگ ءِ ھاتر ءٙ اے کتاب ءِ کمک ءٙ بُزور اٙنت۔۔۔۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*