شئیر

رسترانی تڑسا ژہ
مئیں کسائیں چکانی
وھاو دہ شثو گاریں
شف تہ وث سیاہینے
اے تہاری تڑسینی
نامداریں مڑدماں
مئیں کسائیں ورنا تہ
است نرم نازرکاں
پہ اے دُر دروشماں
ہر سیاہیں سائے بی
بیث بی بلائے بی
ہاغہی عذاب بیثہ
وھاو گاریں چمانی
مئیں کسائیں چکانی
روش بی یا نیم روشا
رسترانی تڑسیں نی
مئیں کسائیں چکاں را
چوں کناں نی من ایذا
رسترانی کوکاریں
لوغ چھیاریں چودھاراں
است کلیں ھوں واراں
من گھڑی یے سوچاں نی
کلاں گوں دلا داراں
او منی دل ئے تاراں
دیذغانی استاراں
تڑسے نواں منی لالاں
گوش دارے اے گالاں
زند تہ گرانینے
مِزّلانی گرغا پہ
اے شئے ضروری ایں
مزّلاں شہ گوئزغا پہ
فیصلہ کنغی باں
رستراں گوں مڑغی بی
پہ وثی گہیں روشاں
خار دہ چنغی باں
ھون دہ رِشاں دگاں
دوست دہ کفاں دگاں
زند ئے جوائیں روشاں پہ
شعر دہ جنغی باں
گوئستغیں ھماں گٹاں
اشتغیں وثی یاراں
یاد دہ کنغی بی
بیل دہ رژغی باں
دیذ ھشک تر بیئاں
نیٹ آنسرے دہ کیث
مزلانی ٹکاں داں
رسترانی جوناں را
باز گل ورغا باں
آنہانی بذیں بوآں
گواث دیر برغا بی
لوغ چھیاریں پہناذاں
گلانی بی رنگینی
نوذ گل رشغا باں
کونج گل کرامانا
گوں کووتاں پجی ئا
مہرے کاراں سوغاتاں
چھمغانی آوازاں
کوہ دہ گشاں شعراں
لوغ ئے چھیاریں پہناذاں
ھمبوئیں گواث کشاں
روش ھمے شوے بیثو
او منی گلیں چکاں
ٹونک کل ھمیش انتو…!

ٹونک سرجمی ئا نی
زڑتہ چکاں موریناں
رسترانی مچھی ئا
رسترانی کوکاریں
حیسی ایں سرا گوں چک
رسترانی دیما انت
رسترانی مچھی ئا
موختانی آوازاں
مئیں مزاریں چکاں را
سوب شل نصیو باثاں
زندگی ئے مزلاں
مؤژاں کئیزاں مانڑاثاں