آں جہانی

اے بہارئے موسم اث، بہار ئے وشیں مدّا ھر شئے سرا وثی رنگ پرینتغ اثنت۔آں گل پلاں شہ گوئزغا اث۔ ڈول ڈولیں گلاں شہ ڈول ڈولیں وشبو ھبکار اث۔ جوفووڑی ایں بینغ مہسک گلاں ژہ بینغ مچّ کنغا پہ گلاں گوئر تشانا مارو غ اثنت۔ وشبو، رنگ و زیوائی ئے دیوانغیں پرّک (لکوری)گلانی سرا چھاپ و ھنبلاں جنغ اثنت۔ چھیئے ھیڑتیں ڈانڈی گل گلانی سوزیں تاخانی سرا نشتو آنہانی ورغا سیرا کنغا نہ اثنت۔ اے ھیڑت ھیڑتی آ کلیں شئے آں گندغ اث۔
اے جزانا جزاناگلانی نیاما جکثہ، اے شاعرے اث، ھذیں ایشی سرا اے نظارہا مزائیں اثرے کثہ۔ اگر اے مالی دھنڑ یارے بیثیں تہ ایشی وثی ورغا پہ بینغ پولث و پذا مالاں گوئر اے وڑ وڑیں گل بھیلائینت اثنت۔کمیں انگر آنگر گندغا پذا نظارہ ئَ گوئشے وثی استی ءباوجود دہ ایشی لافا یک نوخیں عکسے جوڑ کثہ۔ ” اے کل بہار سوب ایں، کہ ایشی وجہا ژہ ھر شئے اے ڈولا وش رنگ و زیوا ایں۔۔۔” ٹونکے کنغا پذا اغدہ خیالانی لافا کپتہ، ناغمانی یک سہر جھرائیں پرک(لکونری )یے آختو ایشی کوفغ سرا نشتہ۔ ایشی آ کلیں شئے اشتو آنہی وٹا دیثہ۔ آں باز جوائینے اث۔ آنہی رنگ رنگینیں بانزلانی پرراٹا شہ ایشی گوشاں یک ناچیکیں مگر وشیں توارے پیذاغ اث۔ آنہی آ زانتہ کہ لکونری آنہی ئَ را باغ آختی آ دراھی کنغ ایں۔ دیرھے لکونری بال گپتہ، ایشی سویثیں گ±ذانی سرا آنہی آ چھیئے ھمبوئیں رنگ اِشتغ اثنت۔ "ھئےےےے۔۔۔! ھیڑتیں سنگت، مرّو۔۔۔تہ مناں باز دوستئے۔۔۔!، بیا مئیں پِنبلیانی سرا نند،مئیں چماں ساڑت کن۔۔۔!” ۔اے کمیں دیما شثہ اوذا گلانی سرا رنگ رنگیں لکونری مچ بیئغا اثنت۔ اے آنہاں گوئر جکثہ تہ ڈول ڈولیںلکونری ایشی ئے دست ، پاذ، سینغ و پاغ سرا نشتغ انت۔
اے نظارہ لافا آں باز وش اث۔ آنہی یبرے اغدہ انگر آنگر دیثو چھیئے سوچثو، پذا گوئشت ئی:
پھیلو نئیں بہارا پہ
سوزغ اے درشکانی
قیذیں پھلانی وشبو
چھڑو پھلانی پہناذا
بہار ئے وشیں گواث
بے چسیں بے رنگا
بے رنگیں بہارا را
داثہ رنگ لکونری آں
ایشی آ ہمے گال گوئشتو اغدہ نظارہا کنغ اث کہ ناغمانی گُلے ئے بنا شہ سیہ مارے آ ایشی پاذا را ڈنگ جثہ، ڈنگ جنغا گوں جَور ایشی جانا پیہثہ تہ اے بے سیخ بیثو کپتہ، ایشی سرا نشتغیں لکونری بال گپتغ انت۔ نی اے بے سدھ بیانا روغ اث۔
کمیں جھٹے آ پذا اے کھڑوبیثہ تہ دیث ئی ایشی بالاذ جہلا وپتغ و وھاویں۔ وثی جا ن لافا پیہغ کوشیش کث ئی مگر بے سوب بیثہ۔ "من مڑتغاں۔۔؟؟؟ شئیت ہمے رنگ بی من مڑتغ باں۔۔”بے دلی آ بال جزغا رائی بیثہ تہ ایشی گال تیز اث۔ دِرک داثئی تہ بال گپتہ۔ ایشی آ وثی مرک شموشتہ، نی ایشی دست مرگے ئے بانزلانی ڈولا کارا کنغ اثنت۔ اے نی کمینجرے ڈولا بال گرغ اث۔ ڈغار ئے بڑزا شہ شئے گندغ اث۔ "جہلا ژہ بڑز روغ چختر جوانیں۔۔۔۔!” ہر شئے آ دیر و نزیخ کنانا گندغ ایں۔ ۔ ۔ "کھی ۔ ۔ کھی۔۔۔کھی۔۔میہہی بڑزا شہ مور مان کاینت۔” اے کندانا کندانا بال گرغ اث۔ اے پہ ایشی آ نوخیں تجربہ ئے اث۔
بال گرانا اے وثی ھلکا سر بیثہ۔ وثی ایوکیں بچ گریانا دیث ئی، ڈکھی بیثہ۔۔” پچے گریئغئے مروھاذر؟” بچ آ ھچ ولدی نہ داثہ،دست گیڑت ئی دست نئیث۔ گیر آخت ئی کہ مڑتہ۔۔۔۔ ! دل ارمانی بیث ئی کی آنہی چ±ک آنہی دیما گریئغ ایں مگر ہچ کث نہ کنت۔
یہ پیریں زالے آختہ پول کث ئی، ” پچے گریئغایئے گونڈل۔۔؟“۔ ” آئی۔۔۔من شذی آں” چُکا گرے آ نا حال داثہ۔ اشکنغا گوں ایشی ئے دل گوئشے کہ ترکثہ، مگر اے بے وس اث۔ "بچ تھئی ماث،تھئی پث تھاں ھند انت؟” ۔نکھو آ چکا شہ مہرا گوں پھول کثہ۔ "ابا مڑتہ، آئی سِیر بیثو اژمن دیر شثہ۔۔” چکا پھنڑکانا جواو داثہ، تہ نکھو چھم دہ آف بیثغ انت، آنہی ٹونک دِہ گراں بیثہ۔ ” ہا۔۔بچ۔۔اے جہانا چھوری ایں چکھانی کس نئیں۔۔۔!” گنڈھ بوختو آں چکھا را چھیئے ورغا پہ داثہ۔ چک چپ بیثہ۔ اے وٹا نشتو وثی چک سرا گریئغ ایں۔ "دریغاں۔۔۔من زیندغ بیثیناں۔۔۔! نہ مئیں زال سیر بِث شث نئیں مئیں صذ مرادیں چک ئے اے حال بیث اثنت۔ ” اے ہمے خیالانی لافا بے سدھ بیثہ۔
ناغمانی خیال کث ئی تہ زانت ئی کسے ایشی آ لوڈایاں دیئغ ایں۔ ساہا ژہ بے ساہ بیثہ، زانت ئی حساب کتاب وخت بیثہ۔ کمیں وثی عملانی سرا نغاہ چھرینغا پذا تڑسثہ”مناں بشک۔۔۔مناں بشک۔۔۔!”
"شاعر ھوشا بیا۔۔۔ چھے بیثہ تھرا، تہ وھاو لافا چھے چھے گوئشغ اثئے؟ ”
زانت ئی کہ زیندغیں شکر کث ئی، آنہی سنگت ھﺅران آنہی دیما جکثی اث۔ ” چھے بیث ئے؟” ھﺅرانا حیرانی آ پول کثہ۔ "پولا مہ خں یار، جوائیں وھاوے گندغ اثاں، ناغمانی خراب بیثہ۔۔۔ھئےےےےے۔۔۔ساہ کشت ئی۔۔!” ھﺅران کندغا شروع بیثہ۔
اے وثی وھاو ئے پریشانی لافا دکانا نشتہ۔ ایشی دل دائیں دریپغ اث۔ اے ہمے خیالانی لافا گرک اث کہ ھپت سالی چکے آختہ "ناخو۔۔! ورغا پہ چھیئے دئے۔۔۔لنگھنڑاں۔۔!” "برو گار بی۔۔۔، ہرکس مختا ھیلیں۔۔” ایشی آ زھرا شہ گوئشتہ۔ اے وثی خیال بیثہ تہ چکا چھیئے زڑتہ ، زیرغا گوں ایشی نغاہ دِہ کپت ئی۔ چک رندا کپتہ، آنہی آ را یک دو مشت جثو، وشی پلث ئی۔ ھﺅران بھیڑانا آختہ، گوئشت ئی۔۔” بل یار بے ماث و پثیں چکے، ھمیشی آ دئی” زہر گرانا ھماں وشی دکانا ایر کثو گوئشت ئی "من عالم ئے ٹھیکہ زڑتہ چہ۔۔۔” ھﺅرانا کٹ سرا نندانا گوئشتہ "بیا شاعر تہ وثی وھاوا گوئش، چھے وھاو دیثہ تہ۔ چکا پھنڑکانا وثی دگ گپتہ۔