غزل

ہے کیسے کیسے خزانے چھپائے تودہئِ ِخاک

ملا کسی کو نہ کچھ ماسوائے تودہئِ خاک

تمہارے ساتھ تو ہوتی تھی بات پھولوں کی

تمہارے ذکر پہ کیوں یاد آئے تودہئِ خاک

وہ مسکراتے ہوئے لب وہ مہرباں آغوش

لپٹنا چاہوں تو اب ہاتھ آئے تودہئِ خاک

یہ ساعتِ گزراں کررہی ہے سرگوشی

حیات کچھ بھی نہیں ماسوائے تودہئ خاک

یہ روز و شب کی تگ و دو یہ ہاؤ ہُو اور پھر

ہے مشتِ خاک بالآخر برائے تودہئِ خاک

یہ گل کہ داغِ دل کشتگاں چمکتے ہیں

ہزار رنگ میں جو لہلہائے تودہئِ خاک

اسی کو آخری آرام گاہ کہتے ہیں

اڑاکے خاک ہمیں یہ بتائے تودہئ خاک