وے کیہڑا ایں

میرِیاں آندراں نال منحبی اُندا
میرا دِل داون آلے پاسے رکھیں تے اکھاں سرہانے بنّے
میں سرہانے تے پُھل کڑھنے نیں
دھرتی دی دھون نیویں ہووے
تے اوہدے تے اسمان نہیں چکا دَئیدا
بابا کوئی کِیڑا کڈھ
کُرونڈیا ہودے تاں مینوں لڑا دئیں
میرا ای اے نا
تُوں آپے ای تاں آکھیا سی جے اسیں دِھیاں نُوں داج اِچ کیڑے
ای دینے آں، فیر دے دے
بابا! دِھیاں پُتر اِکو جیہے کیوں نہیں ہوندے
جےدِھی وڈی ہووے تاں تُساں ٹُک ٹُک کے پُتر جیڈی کرلیندے او
جے پُتر وڈا ہووے تاں دِھی فیر پَونی، فیر ادّھی، فیر کھنّی
بابا وے سُولی تے سپ چڑھیاں….ہنیری آونی ایں….الاّں نُوں
گھبرا پیا پَیندا اے
دِھیاں مرجانیاں نُوں گھبرا پَیندا اے
جِیبھاں دی جھالر آلا فراک پاکے میں کندھ ٹپی
مینوں فیروی بولنا نہ آیا
باباوے بابا! دھرتی دی دَھون تے سپ چڑھیا، ڈب کھڑبا
وِیراں دِیاں دَھوناں تے سپ چڑھیا
اسیں ادھیاں بھلیاں، اسیں پَونیاں چنگیاں
ساڈی ڈھیری تے پیلُو پکیاں تے وِکدیاں وِکدیاں بزارے آگئیاں
چوانیاں چب چب کے ساڈے دند ٹُٹے
اساں کیہڑے دودّھ نوں روئیے
ڈنگیاں چوانیاں دابھلا کون بھان دیندا ای
ایہہ کون ایں میرے بھجے ہوئے پاسے بھنن آلا
وے میریاں اکھاں سرہانے بنّے رکھیں میں سرہانے تے پُھل کڈھنے نیں
سچجیاں دِیاں پوراں وِنّھیاں ایس جہانے
رنگیا وے! ہتھ دھولین دے
اِک ورھا میں ہور اپنے پِنڈے نالوں ٹُک لواں
تینوں پتہ نہیں اج میں جماعتے چڑھی آں
تے نالے ساڈی چتری نے بچہ وی دِتا اے
توں کہنا ایں ہُن اسیں ایتھوں ٹُر جانا ایں
نہیں تاں ٹاہلیاں دابُور جھڑن لگ پئے گا
تے راہ ڈکے جان گے
پر سپاں نُوں دھرتی راہ دے دیندی اے
اساں لنگھ جانا ایس دھرتی ہیٹھ سمائے کے! ہیں بابا!
میرے بچے مینوں موڑ دیں گانا؟
آوندے ورھے ایہناں نُوں موتی دانہ نکلنا ایں تے توں آکھنا ایں
تڈی دَل دوہتروان
دوہتروان بےایمان
ساڈے کڈھے ہوئے سرہانے لے گئی تے نالے کھیس وی، تے
بُکلاں وی تے موسم وی
آؤندے ورھے نُوں تاپ چڑھے تے جاندے نُوں کوڑھ پوے
میرا اج میری تلی تے دھر دے بابا
میرا سچ میری تلی تے دھر دے بابا
ادھی راتیں فیر تُوں ماں نوں آکھنا ایں
داج آلے اندر سَوں جے دھی ویاہونی اُوتے
تے آپوں میری بُکلے آوڑنا اے
تے میں ادھی رات نہیں ہوون دینی
اج میری دَھون تے سپ چڑھیا اے

 

ماہنامہ سنگت کوئٹہ

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*