سورہ یاسین

یہ آخرِشب کا سناٹا
اس نیم اندھیرے رستے پر
جلدی میں قدم بڑھاتی ہوئی
میں ایک اکیلی عورت ہوں
بڑی دیر سے میرے تعاقب میں
اک چاپ ہے جو چلی آتی ہے
گھر۔۔۔۔۔۔!
میرا گھر۔۔۔۔۔۔ !
میں اپنے گھر کیسے پہنچوں
سوجھے حلقوم اور بیٹھے دل سے سوچتی ہوں
شاید میں رستہ بھول گئی
یہ راہ تو میری راہ نہیں
اس راہ سے میں کب گزری تھی
سب گلیوں پر یہاں نام لکھے
اس گلی پہ کوئی نام نہیں
اور دور دور تک دم سادھے
یہ سارے گھر انجانے ہیں
لو پیلے چاند کا ٹکڑا بھی
کالے پتوں میں ڈوب گیا
اب کچھ بھی نہیں
بس میرے منہ میں خوف سے بھاری اور مفلوج زباں ہے
یا
تلووٗں سے اوپر چڑھتی ہوئی
میرے انگ انگ میں رچی ہوئی
اک خنکی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔